ലണ്ടന്‍: ലോകരാഷ്ട്രീയത്തില്‍ വന്‍ അഴിച്ചുപണികള്‍ക്ക് വഴിമരുന്നിട്ട് ട്രംപ്-സ്റ്റാര്‍മര്‍ പോര് മുറുകുന്നു. ഇറാന്‍ യുദ്ധത്തില്‍ അമേരിക്കയെ പിന്തുണയ്ക്കാത്ത ബ്രിട്ടന്‍ ഉള്‍പ്പെടെയുള്ള നാറ്റോ സഖ്യകക്ഷികളെ ‘ഓഡിറ്റ്’ ചെയ്യാനും സഹായിക്കാത്ത രാജ്യങ്ങളില്‍ നിന്ന് സൈന്യത്തെ പിന്‍വലിക്കാനും അമേരിക്കന്‍ പ്രസിഡന്റ് ഡൊണാള്‍ഡ് ട്രംപ് ഉത്തരവിട്ടു. ഇതോടെ രണ്ടാം ലോകമഹായുദ്ധത്തിന് ശേഷം രൂപപ്പെട്ട അറ്റ്ലാന്റിക് സഖ്യം ചരിത്രത്തിലെ ഏറ്റവും വലിയ തകര്‍ച്ചയെ നേരിടുകയാണ്. ഇറാന്‍ യുദ്ധം തങ്ങളുടെ യുദ്ധമല്ലെന്നും സമാധാനം പുനഃസ്ഥാപിക്കാനാണ് തങ്ങള്‍ ശ്രമിക്കുന്നതെന്നുമുള്ള ബ്രിട്ടീഷ് പ്രധാനമന്ത്രി കീര്‍ സ്റ്റാര്‍മറുടെ നിലപാടാണ് ട്രംപിനെ പ്രകോപിപ്പിച്ചത്.