തിരുവനന്തപുരം: പശ്ചിമേഷ്യയിലെ യുദ്ധസമാനമായ സാഹചര്യം ആഗോള എണ്ണവിപണിയെ പിടിച്ചുലയ്ക്കുമ്പോള്‍, കേരളത്തിന്റെ തലസ്ഥാന നഗരിയില്‍ പെട്രോള്‍ വില ലിറ്ററിന് 110 രൂപ എന്ന റെക്കോര്‍ഡ് നിലവാരത്തിലേക്ക്. വെള്ളിയാഴ്ച രാജ്യവ്യാപകമായി പെട്രോളിനും ഡീസലിനും ലിറ്ററിന് മൂന്ന് രൂപ വീതം വര്‍ദ്ധിപ്പിച്ചതോടെയാണ് സാധാരണക്കാരന്റെ കുടുംബ ബജറ്റ് താളംതെറ്റിക്കുന്ന നിലയിലേക്ക് ഇന്ധനവില ഉയര്‍ന്നത്. ഇന്ധനവിലയ്‌ക്കൊപ്പം സി.എന്‍.ജി വിലയിലും കിലോയ്ക്ക് രണ്ട് രൂപയുടെ വര്‍ദ്ധനവുണ്ടായത് ഗതാഗത മേഖലയെയും സാരമായി ബാധിച്ചിട്ടുണ്ട്. തിരഞ്ഞെടുപ്പുകള്‍ക്ക് പിന്നാലെ മോദി സര്‍ക്കാര്‍ ജനങ്ങളെ കൊള്ളയടിക്കുകയാണെന്നാരോപിച്ച് കോണ്‍ഗ്രസ് ശക്തമായ പ്രതിഷേധവുമായി രംഗത്തെത്തിക്കഴിഞ്ഞു.