തിരുവനന്തപുരം/കണ്ണൂര്: എക്സാലോജിക്-സി.എം.ആര്.എല് കേസില് മുന് മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയന്റെ വീട്ടില് എന്ഫോഴ്സ്മെന്റ് ഡയറക്ടറേറ്റ് (ഇ.ഡി) നടത്തുന്ന റെയ്ഡിനെച്ചൊല്ലി കേരള രാഷ്ട്രീയത്തില് വന് വിവാദം. മുഖ്യമന്ത്രി വി.ഡി. സതീശന്റെ ഡല്ഹി യാത്രയും ഇ.ഡി റെയ്ഡും തമ്മില് കൂട്ടിക്കുഴയ്ക്കുന്നതില് അര്ത്ഥമില്ലെന്ന് ആഭ്യന്തര മന്ത്രി രമേശ് ചെന്നിത്തല വ്യക്തമാക്കിയപ്പോള്, ഇത് ബിജെപിയും കോണ്ഗ്രസും ചേര്ന്നുള്ള സംയുക്ത രാഷ്ട്രീയ ഗൂഢാലോചനയാണെന്ന് സി.പി.എം മുതിര്ന്ന നേതാവ് പി. ജയരാജന് ആരോപിച്ചു. കഴിഞ്ഞ ദിവസമാണ് കേസില് ഹൈക്കോടതിയുടെ സ്റ്റേ നീങ്ങിയത് എന്നതും ശ്രദ്ധേയമാണ്.
ഇ.ഡി നടത്തുന്ന റെയ്ഡ് സംബന്ധിച്ച് കേരളത്തിലെ പോലീസിനോ ആഭ്യന്തര വകുപ്പിനോ യാതൊരു അറിവുമില്ലെന്ന് ആഭ്യന്തര മന്ത്രി രമേശ് ചെന്നിത്തല തിരുവനന്തപുരത്ത് പറഞ്ഞു. ‘മുഖ്യമന്ത്രിയായി ചുമതലയേറ്റതിനു പിന്നാലെ വി.ഡി. സതീശന് ഡല്ഹിയില് പോയി പ്രധാനമന്ത്രി നരേന്ദ്ര മോദിയെ കണ്ടത് കേരളത്തിന്റെ ആവശ്യങ്ങള്ക്കാണ്. അത് തികച്ചും ഔദ്യോഗികമായ സര്ക്കാര് നടപടിയാണ്. അതിനെ ഇ.ഡി അന്വേഷണവുമായി ബന്ധപ്പെടുത്തേണ്ടതില്ല. റെയ്ഡിനായി കേന്ദ്രസേനയുടെ സഹായമാണ് ഇ.ഡി തേടിയത്. കോണ്ഗ്രസ്-ബിജെപി ഡീല് എന്ന സ്ഥിരം പല്ലവി കടന്നകൈയാണ്.’ – രമേശ് ചെന്നിത്തല പറഞ്ഞു.
കണ്ണൂരില് പിണറായി വിജയന്റെ വീട്ടിലെത്തിയ പി. ജയരാജന് കടുത്ത ഭാഷയിലാണ് ഈ നീക്കങ്ങളെ വിമര്ശിച്ചത്. മുഖ്യമന്ത്രി വി.ഡി. സതീശന് ഡല്ഹിയില് പോയി പ്രധാനമന്ത്രിയെ കണ്ടതിന്റെ തൊട്ടടുത്ത ദിവസം തന്നെ റെയ്ഡ് ആരംഭിച്ചത് ആസൂത്രിതമാണെന്ന് അദ്ദേഹം ആരോപിച്ചു. പിണറായി വിജയന്റെ കണ്ണൂരിലെ വീട്, തിരുവനന്തപുരത്തെ വാടകവീട്, മരുമകനും മുന് മന്ത്രിയുമായ മുഹമ്മദ് റിയാസിന്റെ വീട് എന്നിവിടങ്ങളില് കൃത്യമായ പ്ലാനിങ്ങോടെയാണ് റെയ്ഡ് നടക്കുന്നത്.
കേരളത്തെ വിഴുങ്ങാന് നോക്കുന്ന സംഘപരിവാറിന് അനുകൂല അന്തരീക്ഷമൊരുക്കാന് സി.പി.എം വിരോധം മുന്നിര്ത്തി കോണ്ഗ്രസ് ബിജെപിയെ സഹായിക്കുകയാണെന്ന് ജയരാജന് കുറ്റപ്പെടുത്തി. ‘ഇ.ഡി ഇപ്പോള് സംഘപരിവാറിന്റെ ഒരു എക്സ്ട്രാ ഡിപ്പാര്ട്ടുമെന്റായിട്ടാണ് പ്രവര്ത്തിക്കുന്നത്. ഡല്ഹി ഹൈക്കോടതിയില് കേസ് നിലനില്ക്കെ, കളി മാറ്റി കേരള ഹൈക്കോടതിയില് നിന്ന് അനുമതി വാങ്ങിയാണ് ഈ അന്വേഷണം. ഈ നീക്കത്തെ നിയമപരമായും രാഷ്ട്രീയപരമായും സി.പി.എം നേരിടും.’ – പി. ജയരാജന് വിശദീകരിച്ചു.
ഹൈക്കോടതിയിലെ നിയമനടപടികള്ക്ക് പിന്നാലെ ഉണ്ടായ ഇ.ഡി നീക്കവും, അതിനെത്തുടര്ന്നുണ്ടായ രാഷ്ട്രീയ ആരോപണ-പ്രത്യാരോപണങ്ങളും വരും ദിവസങ്ങളില് കേരള രാഷ്ട്രീയത്തെ കൂടുതല് ചൂടുപിടിപ്പിക്കും എന്നുറപ്പാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
നന്ദഗോവിന്ദം ഭജന്സ് ക്രിസ്തീയ ഭക്തിഗാനം ആലപിച്ചാല് എന്ത് തെറ്റ്? ഭക്തിക്ക് അതിര്വരമ്പുകളില്ല; നന്ദഗോവിന്ദത്തിന് പിന്തുണയുമായി ക്ഷേത്രക്കമ്മിറ്റി; പേരുകള്ക്കതീതമായി ഭക്തി ഒഴുകുന്ന നാടായി കേരളം മാറുമ്പോള്
