കൊച്ചി: കോതമംഗലം എസ്.എച്ച്.ഒ.യ്ക്ക് (സിഐ) എതിരെ സോഷ്യല് മീഡിയയിലൂടെ പരസ്യമായി വധഭീഷണി മുഴക്കിയ കുപ്രസിദ്ധ ക്വട്ടേഷന് തലവന് അര്ജുന് ആയങ്കിക്ക് വീണ്ടും പോലീസിന്റെ പൂട്ട്. അര്ജുന് ആയങ്കിക്ക് മുന്പ് കോടതി അനുവദിച്ച ജാമ്യവ്യവസ്ഥകള് ലംഘിച്ചുവെന്ന് ചൂണ്ടിക്കാട്ടി കോതമംഗലം പോലീസ് മജിസ്ട്രേറ്റ് കോടതിയില് അടിയന്തര റിപ്പോര്ട്ട് നല്കി. പോലീസുകാരെ ഭീഷണിപ്പെടുത്തിയുള്ള ആയങ്കിയുടെ ഫെയ്സ്ബുക്ക് പോസ്റ്റിനെതിരെ പോലീസ് നേരത്തെ തന്നെ കടുത്ത വകുപ്പുകള് ചുമത്തി കേസെടുത്തിരുന്നു. ഇതിന് പിന്നാലെയാണ് ജാമ്യം റദ്ദാക്കി പ്രതിയെ വീണ്ടും ജയിലിലടയ്ക്കാനുള്ള നീക്കങ്ങളിലേക്ക് പോലീസ് കടന്നത്.
ഇക്കഴിഞ്ഞ മേയ് മൂന്നിനാണ് നിരവധി ക്രിമിനല് കേസുകളില് പ്രതിയായ അര്ജുന് ആയങ്കി അടക്കം അഞ്ചംഗ സംഘത്തെ കോതമംഗലം പോലീസ് പ്രത്യേക ഓപ്പറേഷനിലൂടെ അറസ്റ്റ് ചെയ്തത്. ഈ കേസില് കോടതിയില് നിന്ന് കടുത്ത വ്യവസ്ഥകളോടെ ജാമ്യം നേടി പുറത്തിറങ്ങിയതിന് പിന്നാലെയാണ് അര്ജുന് ആയങ്കി പോലീസിനെ വെല്ലുവിളിച്ചുകൊണ്ട് സമൂഹമാധ്യമങ്ങളിലൂടെ രംഗത്തെത്തിയത്. കോതമംഗലം സിഐ പ്രശാന്തിനെ വ്യക്തിപരമായി അധിക്ഷേപിക്കുകയും ലക്ഷ്യമിടുകയും ചെയ്തുകൊണ്ടുള്ള പോസ്റ്റില്, പോലീസ് ഉദ്യോഗസ്ഥനെതിരെ കടുത്ത ഭാഷയിലാണ് ഭീഷണി മുഴക്കിയിരിക്കുന്നത്.
ജോലിയില് നിന്ന് വിരമിച്ച ശേഷം സമാധാനമായി പെന്ഷന് വാങ്ങി ശിഷ്ടജീവിതം നയിക്കാന് സിഐ പ്രശാന്തിനെ അനുവദിക്കില്ലെന്നായിരുന്നു ആയങ്കിയുടെ ഫെയ്സ്ബുക്ക് പോസ്റ്റിലെ പ്രധാന ഭീഷണി. തനിക്ക് ലോക്കപ്പില് നേരിടേണ്ടി വന്ന ഓരോ ദിവസത്തെയും ബുദ്ധിമുട്ടുകള്ക്ക് നിയമത്തിന് പുറത്തുനിന്ന് കൃത്യമായി കണക്കുചോദിക്കുമെന്നും പോസ്റ്റില് മുന്നറിയിപ്പുണ്ടായിരുന്നു. ഒരു ഉയര്ന്ന പോലീസ് ഉദ്യോഗസ്ഥനെതിരെ സമൂഹമാധ്യമങ്ങള് വഴി പരസ്യമായി വധഭീഷണിക്ക് സമാനമായ പോസ്റ്റിട്ടത് കോടതി മുന്പ് നല്കിയ ജാമ്യവ്യവസ്ഥകളുടെ നഗ്നമായ ലംഘനമാണെന്ന് പോലീസ് കോടതിയില് നല്കിയ റിപ്പോര്ട്ടില് വ്യക്തമാക്കുന്നു.
കോടതി നിര്ദ്ദേശങ്ങളെ വെല്ലുവിളിച്ച് വീണ്ടും കുറ്റകൃത്യങ്ങളില് ഏര്പ്പെടുകയും സമാധാന അന്തരീക്ഷം തകര്ക്കാന് ശ്രമിക്കുകയും ചെയ്ത പശ്ചാത്തലത്തില് പ്രതിയുടെ ജാമ്യം അടിയന്തരമായി റദ്ദാക്കണമെന്നാണ് കോതമംഗലം പോലീസിന്റെ ആവശ്യം. കോടതി ജാമ്യം റദ്ദാക്കുന്നതോടെ അര്ജുന് ആയങ്കിയെ വീണ്ടും അറസ്റ്റ് ചെയ്ത് ജയിലിലേക്ക് മാറ്റും.
ഇതിനു പുറമെ പുതുതായി രജിസ്റ്റര് ചെയ്ത ഐടി ആക്ട് പ്രകാരമുള്ള കേസിലും അര്ജുനെ കസ്റ്റഡിയില് വാങ്ങി ചോദ്യം ചെയ്യാനാണ് പോലീസിന്റെ തീരുമാനം. കണ്ണൂര് കേന്ദ്രീകരിച്ചുള്ള സ്വര്ണ്ണക്കടത്ത് പൊട്ടിക്കല് സംഘത്തിലെ പ്രധാനിയായ അര്ജുന് ആയങ്കിക്കെതിരെ കാപ്പ ചുമത്തുന്ന കാര്യവും പോലീസ് പരിഗണിച്ചുവരികയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കുഞ്ഞുഞ്ഞിനെ ചതിച്ചു; ഗണേഷിന് കുരുക്ക് മുറുകുന്നു; പകയുടെ ‘ചരിത്ര പേജുകള്’ പുറത്ത്; പത്തനാപുരത്തെ ‘ഗജകേസരി’ വീഴുമോ?
