കണ്ണൂര്: വയനാട് പുനരധിവാസ ഗ്രാമ സന്ദര്ശനത്തിനിടെ സി.പി.എം ജില്ലാ സെക്രട്ടറിയോട് മാറിനില്ക്കാന് ആവശ്യപ്പെട്ട മെഗാസ്റ്റാര് മമ്മൂട്ടിക്കെതിരെ സൈബര് ആക്രമണം കടുക്കുന്നു. സ്വര്ണ്ണക്കടത്ത് കേസ് പ്രതിയും കുപ്രസിദ്ധ ക്രിമിനലുമായ അര്ജുന് ആയങ്കി കൂടി മമ്മൂട്ടിക്കെതിരെ രംഗത്തെത്തിയതോടെ വിവാദം പുതിയ തലത്തിലെത്തി. മമ്മൂട്ടിക്ക് പ്രായമായിട്ടും വിനയവും ബഹുമാനവും പഠിക്കാന് കഴിഞ്ഞിട്ടില്ലെന്നും അദ്ദേഹം വെറുമൊരു ‘അപ്ഡേറ്റഡ് സുരേഷ് ഗോപി’ മാത്രമാണെന്നുമാണ് ആയങ്കിയുടെ പരിഹാസം. പാര്ട്ടി പോലും തള്ളിപ്പറഞ്ഞ വ്യക്തികള് മെഗാസ്റ്റാറിനെതിരെ കുതിരകയറുന്നത് കടുത്ത അസഹിഷ്ണുതയാണെന്ന് സിനിമാ പ്രേമികള് ചൂണ്ടിക്കാട്ടുന്നു.
കൈരളിയുടെ അംബാസിഡറാണെങ്കിലും ആളുകളോട് പെരുമാറാന് മമ്മൂട്ടിക്ക് അറിയില്ലെന്നാണ് സൈബര് സഖാക്കളുടെ ആരോപണം. ജില്ലാ സെക്രട്ടറി കെ. റഫീഖിനോട് പരസ്യമായി മാറിനില്ക്കാന് പറഞ്ഞത് താരത്തിന്റെ അഹങ്കാരമാണെന്ന് ആയങ്കിയെപ്പോലുള്ളവര് വാദിക്കുന്നു. എന്നാല്, തന്റെ സന്ദര്ശനം രാഷ്ട്രീയ മുതലെടുപ്പിന് ഉപയോഗിക്കാതിരിക്കാന് മമ്മൂട്ടി കാണിച്ച മാന്യതയെയാണ് ഇവര് അധിക്ഷേപമായി ചിത്രീകരിക്കുന്നത്. സ്വര്ണ്ണക്കടത്ത് ക്വട്ടേഷന് കേസുകളില് പ്രതിയായ ഒരാള് മലയാളത്തിന്റെ അഭിമാന താരത്തെ വിനയം പഠിപ്പിക്കാന് വരുന്നത് പരിഹാസ്യമാണെന്ന് സോഷ്യല് മീഡിയയില് വിമര്ശനമുയരുന്നു.
അര്ജുന് ആയങ്കിയുടെ പോസ്റ്റ് ചുവടെ
കാര്യം കൈരളിയുടെ അംബാസിഡറും ഇടതുപക്ഷ അനുഭാവിയുമൊക്കെ തന്നെ എങ്കിലും ആള്ക്കാരോട് പെരുമാറുമ്പോള് ഒരു കലാകാരന് ഉണ്ടാവേണ്ടുന്ന വിനയവും ബഹുമാനവും ഒന്നും ഈ പ്രായത്തിലും സ്വായത്തമാക്കാന് കഴിയാത്ത ഒരു അഹങ്കാരിയാണ് മമ്മൂട്ടി, എവിടെ എന്ത് പറയണം, എങ്ങനെ പറയണം എന്ന ബോധമില്ലാത്ത ഒരു അപ്ഡേറ്റഡ് സുരേഷ്ഗോപി
ഒരു വിവാദത്തിലും പെടാതെ തൊഴിലുമായി മുന്നോട്ടുപോകുന്ന മമ്മൂട്ടിയെ ഇത്രത്തോളം ക്രൂരമായി വേട്ടയാടുന്നത് ഇതാദ്യമായാണ്. രാപ്പകല് ദുരന്തമുഖത്ത് പണിയെടുത്ത സഖാവിനെ അപമാനിച്ചു എന്ന നരേറ്റീവ് സൃഷ്ടിച്ചാണ് സൈബര് ആക്രമണം നടക്കുന്നത്. രമേശ് പിഷാരടിയെയും ആന്റോ ജോസഫിനെയും പോലുള്ള കോണ്ഗ്രസ് സുഹൃത്തുക്കളെ കൂടെക്കൂട്ടുന്ന മമ്മൂട്ടിക്ക് റഫീഖിനോട് അയിത്തമാണെന്ന സൈബര് സഖാക്കളുടെ പ്രചരണം രാഷ്ട്രീയ ലക്ഷ്യത്തോടെയുള്ളതാണെന്നും ആരോപണമുണ്ട്.
ഈ കടന്നാക്രമണങ്ങളില് മമ്മൂട്ടി കടുത്ത അതൃപ്തിയിലാണ്. സൈബര് പോരാളികളും ക്രിമിനലുകളും ചേര്ന്ന് താരത്തെ വളഞ്ഞിട്ട് ആക്രമിക്കുമ്പോഴും ഔദ്യോഗിക പ്രതികരണത്തിന് അദ്ദേഹം തയ്യാറായിട്ടില്ല. എന്നാല്, താരത്തിനെതിരെയുള്ള ഇത്തരം തരംതാണ അധിക്ഷേപങ്ങള്ക്കെതിരെ സിനിമാ മേഖലയില് നിന്നും സാംസ്കാരിക പ്രവര്ത്തകരില് നിന്നും പ്രതിഷേധം ഉയരുന്നുണ്ട്. വയനാട്ടിലെ ദുരിതബാധിതര്ക്ക് വേണ്ടി പ്രവര്ത്തിക്കുന്ന ഒരാളെ ഇത്തരത്തില് രാഷ്ട്രീയമായി വേട്ടയാടുന്നത് കേരളത്തിന് അപമാനമാണെന്ന് ഇവര് പറയുന്നു.
സോഷ്യല് മീഡിയയിലെ ആവേശം നിറഞ്ഞ ഇടത് പ്രൊഫൈലുകളില് നിന്ന് സ്വര്ണ്ണക്കടത്ത് ക്വട്ടേഷന് തലവനിലേക്കുള്ള അര്ജുന് ആയങ്കിയുടെ വളര്ച്ച കേരളം ഏറെ ചര്ച്ച ചെയ്ത ഒന്നാണ്. കണ്ണൂര് അഴീക്കോട് സ്വദേശിയായ ഇയാള്, ചെങ്കൊടിയെയും പാര്ട്ടിയെയും മറയാക്കി ക്രിമിനല് പ്രവര്ത്തനങ്ങള് നടത്തിയതിനെത്തുടര്ന്ന് സി.പി.എം പരസ്യമായി തള്ളിപ്പറഞ്ഞ വ്യക്തിയാണ്. അര്ജുന് ആയങ്കിയെക്കുറിച്ചുള്ള പ്രധാന വിവരങ്ങള് താഴെ നല്കുന്നു:
1. രാമനാട്ടുകര സ്വര്ണ്ണക്കടത്ത് കേസ്
2021-ല് കോഴിക്കോട് രാമനാട്ടുകരയില് ഉണ്ടായ വാഹനാപകടത്തെത്തുടര്ന്ന് പുറത്തുവന്ന വന് സ്വര്ണ്ണക്കടത്ത് ക്വട്ടേഷന് കേസിലെ പ്രധാന പ്രതിയാണ് അര്ജുന് ആയങ്കി. കരിപ്പൂര് വിമാനത്താവളം വഴി കടത്തിക്കൊണ്ടുവന്ന സ്വര്ണ്ണം തട്ടിയെടുക്കാന് (സ്വര്ണ്ണം പൊട്ടിക്കല്) എത്തിയ സംഘത്തിന് നേതൃത്വം നല്കിയത് ഇയാളാണെന്ന് കസ്റ്റംസ് കണ്ടെത്തിയിരുന്നു. ഈ കേസില് ഇയാള് മാസങ്ങളോളം ജയില്വാസം അനുഭവിച്ചിട്ടുണ്ട്.
2. സൈബര് സഖാവ് എന്ന ലേബല്
ആദ്യകാലത്ത് സോഷ്യല് മീഡിയയില് സി.പി.എം അനുകൂല പോസ്റ്റുകളിലൂടെയും നേതാക്കള്ക്കൊപ്പമുള്ള ചിത്രങ്ങളിലൂടെയും ഇയാള് ശ്രദ്ധിക്കപ്പെട്ടിരുന്നു. എന്നാല് ക്വട്ടേഷന് ബന്ധങ്ങള് പുറത്തുവന്നതോടെ ‘പാര്ട്ടിയുടെ പേരും ചെങ്കൊടിയും ക്രിമിനല് പ്രവര്ത്തനങ്ങള്ക്കായി ഇയാള് ദുരുപയോഗം ചെയ്യുകയാണെന്ന്’ സി.പി.എം വ്യക്തമാക്കി. പി. ജയരാജന് ഉള്പ്പെടെയുള്ള നേതാക്കള് ഇയാള്ക്കെതിരെ പരസ്യമായി രംഗത്തെത്തിയിരുന്നു.
3. ക്വട്ടേഷന് – ‘സ്വര്ണ്ണം പൊട്ടിക്കല്’ സംഘം
വിദേശത്തുനിന്ന് സ്വര്ണ്ണം കടത്തുന്ന കാരിയര്മാരെ ഭീഷണിപ്പെടുത്തിയും ആക്രമിച്ചും സ്വര്ണ്ണം തട്ടിയെടുക്കുന്ന സംഘത്തിലെ പ്രധാനിയാണ് ഇയാളെന്ന് പോലീസ് റിപ്പോര്ട്ടുകള് സൂചിപ്പിക്കുന്നു. കള്ളക്കടത്ത് സംഘങ്ങളുമായി അടുത്ത ബന്ധമുള്ള ഇയാള്, വിമാനത്താവളത്തിന് പുറത്തുവെച്ച് സ്വര്ണ്ണം തട്ടിയെടുക്കുന്ന രീതിയാണ് പിന്തുടരുന്നത്.
4. ആകാശ് തില്ലങ്കേരിയുമായുള്ള ബന്ധം
മറ്റൊരു കുപ്രസിദ്ധ ക്രിമിനല് കേസിലെ പ്രതിയായ ആകാശ് തില്ലങ്കേരിയുമായി അര്ജുന് ആയങ്കിക്ക് അടുത്ത ബന്ധമുണ്ടായിരുന്നു. ഇരുവരും ചേര്ന്നുള്ള ക്വട്ടേഷന് പ്രവര്ത്തനങ്ങളും സോഷ്യല് മീഡിയയിലെ വെല്ലുവിളികളും കേരളത്തില് വലിയ രാഷ്ട്രീയ വിവാദങ്ങള്ക്ക് കാരണമായിട്ടുണ്ട്. പാര്ട്ടിക്ക് അതീതമായി സ്വന്തമായി ക്രിമിനല് സാമ്രാജ്യം കെട്ടിപ്പടുക്കാന് ശ്രമിച്ചവരാണ് ഇവര് എന്ന് പോലീസ് വിലയിരുത്തുന്നു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
“ക്യാപ്റ്റൻ പിണറായി തന്നെ “; നിയമസഭാ തെരഞ്ഞെടുപ്പിൽ പാർട്ടിയെ താൻ നയിക്കുമെന്ന് പിണറായി വിജയൻ ; പത്തനംതിട്ട സിപിഎം സെക്രട്ടേറിയറ്റ് യോഗത്തിൽ മുഖ്യമന്ത്രി
