തിരുവനന്തപുരം: കേരള രാഷ്ട്രീയത്തില് നിര്ണ്ണായക വേരുറപ്പിക്കാന് ‘മുസ്ലിം ലീഗ് വിരുദ്ധ’ വികാരം ആയുധമാക്കി ബിജെപി. യുഡിഎഫില് ലീഗ് നേടുന്ന മേധാവിത്വവും വരാനിരിക്കുന്ന ‘ആറാം മന്ത്രിപദ’ സാധ്യതയും ചര്ച്ചയാക്കി നിയമസഭയില് ഒന്നിലേറെ സീറ്റുകള് പിടിച്ചെടുക്കാനാണ് എന്ഡിഎ ലക്ഷ്യമിടുന്നത്. കോണ്ഗ്രസിനെ റിമോട്ട് കണ്ട്രോള് വഴി നിയന്ത്രിക്കുന്നത് ലീഗാണെന്ന ആക്ഷേപം ശക്തമാക്കി വോട്ടര്മാരെ സ്വാധീനിക്കാനാണ് പാര്ട്ടിയുടെ നീക്കം.
തിരുവനന്തപുരത്ത് ഉള്പ്പെടെ ബിജെപിക്ക് വിജയസാധ്യതയുള്ള മണ്ഡലങ്ങളില് ലീഗ് വിരുദ്ധ വികാരം വോട്ടായി മാറുമെന്നാണ് ബിജെപി നേതൃത്വത്തിന്റെ കണക്കുകൂട്ടല്. ക്രിസ്ത്യന് വിഭാഗങ്ങള്ക്കിടയിലുള്ള ചില ആശങ്കകളെ ഈ ആറാം മന്ത്രിപദ ചര്ച്ചയുമായി ബന്ധിപ്പിക്കാനും പാര്ട്ടിക്ക് പദ്ധതിയുണ്ട്. നിയമസഭയില് കേവലം ഒരു സീറ്റിലൊതുങ്ങാതെ പ്രാതിനിധ്യം വര്ദ്ധിപ്പിക്കുക എന്ന ലക്ഷ്യത്തോടെയാണ് ബിജെപി ഈ നീക്കം നടത്തുന്നത്. എന്ഡിഎ ഘടകകക്ഷികളെ കൂടി സജീവമാക്കി വോട്ട് വിഹിതം വലിയ തോതില് വര്ദ്ധിപ്പിക്കാനാണ് കേന്ദ്ര നേതൃത്വത്തിന്റെ നിര്ദ്ദേശം.
യുഡിഎഫ് അധികാരത്തില് വന്നാല് ഉപമുഖ്യമന്ത്രി പദവും ആറ് മന്ത്രിസ്ഥാനവും ലീഗിന് നല്കാന് രഹസ്യ ധാരണയുണ്ടോ എന്ന് ബിജെപി സംസ്ഥാന അധ്യക്ഷന് രാജീവ് ചന്ദ്രശേഖര് ചോദിച്ചു. ലീഗ് ഒരു വര്ഗ്ഗീയ പാര്ട്ടിയാണെന്നും അവര്ക്ക് ആറാം മന്ത്രിയെ നല്കാന് കോണ്ഗ്രസ് തയ്യാറെടുക്കുകയാണെന്നും അദ്ദേഹം ആരോപിച്ചു. ഈ ‘ഡീല്’ സംബന്ധിച്ച് കോണ്ഗ്രസും ലീഗും വ്യക്തത വരുത്തണമെന്നാണ് ബിജെപിയുടെ ആവശ്യം.
കേരളത്തില് മുന്പ് അഞ്ചാം മന്ത്രിപദം വലിയ രാഷ്ട്രീയ വിവാദങ്ങള്ക്ക് വഴിവെച്ചിരുന്നു. അന്ന് ഉണ്ടായ സമുദായ ധ്രുവീകരണമാണ് ബിജെപിക്ക് കേരളത്തില് വളരാന് വളമായതെന്നാണ് രാഷ്ട്രീയ നിരീക്ഷകരുടെ വിലയിരുത്തല്. സമാനമായ രീതിയില് ‘ആറാം മന്ത്രിപദം’ എന്ന കാര്ഡ് ഇറക്കി വോട്ടുബാങ്ക് ഏകീകരിക്കാനാണ് ബിജെപി ഇപ്പോള് ശ്രമിക്കുന്നത്.
കോണ്ഗ്രസ് വെറും നുണ പറയുന്ന പാര്ട്ടിയായി മാറിയെന്ന് രാജീവ് ചന്ദ്രശേഖര് പരിഹസിച്ചു. സര്ദാര് പട്ടേലും ശാസ്ത്രിയും കരുണാകരനും ഉമ്മന്ചാണ്ടിയും നയിച്ചിരുന്ന പ്രതാപകാലം കോണ്ഗ്രസിന് നഷ്ടമായി. രാഹുല് ഗാന്ധിയുടെ വരവോടെ പാര്ട്ടി ഒന്നിനും കൊള്ളാത്ത അവസ്ഥയിലായെന്നും അദ്ദേഹം കൂട്ടിച്ചേര്ത്തു.
ഇന്ദിരാഗാന്ധിയെ പുകഴ്ത്തിക്കൊണ്ട് രാഹുല് ഗാന്ധിയെ ഒറ്റപ്പെടുത്തുന്ന തന്ത്രവും ബിജെപി പയറ്റുന്നുണ്ട്. ഇന്ദിര നല്ല നേതാവായിരുന്നുവെന്നും എന്നാല് അവരുടെ പേര് ഇപ്പോള് വ്യാജ ഗ്യാരന്റികള് നല്കാനാണ് കോണ്ഗ്രസ് ഉപയോഗിക്കുന്നതെന്നും അധ്യക്ഷന് കുറ്റപ്പെടുത്തി. ഈ തിരഞ്ഞെടുപ്പില് സി.പി.എമ്മിനും വലിയ തിരിച്ചടി നേരിടുമെന്ന് അദ്ദേഹം പ്രവചിച്ചു.
അതേസമയം, ബിജെപിയുടെ ഈ ആരോപണങ്ങള്ക്കെതിരെ കടുത്ത ഭാഷയിലാണ് പ്രതിപക്ഷ നേതാവ് വി.ഡി. സതീശന് പ്രതികരിച്ചത്. രാജീവ് ചന്ദ്രശേഖര് സ്വന്തം പാര്ട്ടിയുടെ കാര്യം നോക്കിയാല് മതിയെന്നും കോണ്ഗ്രസിനെ രാഷ്ട്രീയം പഠിപ്പിക്കാന് വരേണ്ടെന്നും അദ്ദേഹം തിരിച്ചടിച്ചു. ഘടകകക്ഷികളുമായുള്ള ബന്ധം കൈകാര്യം ചെയ്യാന് കോണ്ഗ്രസിന് നന്നായറിയാം.
നൂലില് കെട്ടിയിറക്കിയ നേതാവാണ് രാജീവ് ചന്ദ്രശേഖറെന്നും അദ്ദേഹത്തിന്റെ രാഷ്ട്രീയ പാരമ്പര്യം എന്താണെന്നും സതീശന് ചോദിച്ചു. കേരളത്തിലെ മതേതര സ്വഭാവം തകര്ക്കാന് ബിജെപി നടത്തുന്ന ഇത്തരം വര്ഗ്ഗീയ പ്രചാരണങ്ങള് ജനങ്ങള് തള്ളിക്കളയുമെന്നും അദ്ദേഹം വ്യക്തമാക്കി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ശശി തരൂരിനെ ഇടതുമുന്നണിയിലേക്ക് ക്ഷണിച്ച് സിപിഎം; പുതിയ പാര്ട്ടി രൂപീകരിക്കാന് നിര്ദ്ദേശം, വാഗ്ദാനം 15 സീറ്റുകള്
