തിരുവനന്തപുരം: രാജ്യത്തെ തിരഞ്ഞെടുപ്പ് ഭൂപടം ഉടച്ചുവാര്ക്കാനുള്ള കേന്ദ്ര സര്ക്കാര് നീക്കം കേരള രാഷ്ട്രീയത്തില് പുതിയ ചര്ച്ചകള്ക്ക് വഴിതുറക്കുന്നു. വരാനിരിക്കുന്ന മണ്ഡല പുനര്നിര്ണ്ണയത്തിലൂടെ കേരളത്തില് സ്വാധീനം ഉറപ്പിക്കാന് ബിജെപി തന്ത്രപരമായ നീക്കങ്ങള് നടത്തുന്നു എന്ന ആശങ്കയിലാണ് സി.പി.എമ്മും കോണ്ഗ്രസും. പ്രത്യേകിച്ച് തലസ്ഥാന ജില്ലയായ തിരുവനന്തപുരത്തെ കേന്ദ്രീകരിച്ച് ബിജെപിക്ക് അനുകൂലമായ സാഹചര്യങ്ങള് സൃഷ്ടിക്കപ്പെടുമെന്നാണ് രാഷ്ട്രീയ നിരീക്ഷകര് വിലയിരുത്തുന്നത്.
പുനര്നിര്ണ്ണയം പൂര്ത്തിയാകുമ്പോള് തിരുവനന്തപുരം ജില്ലയില് മാത്രം മൂന്ന് ലോക്സഭാ മണ്ഡലങ്ങള് രൂപപ്പെടാന് സാധ്യതയുണ്ട്. നിലവില് തിരുവനന്തപുരം, ആറ്റിങ്ങല് മണ്ഡലങ്ങളാണ് ജില്ലയിലുള്ളത്. പുതിയ ക്രമീകരണത്തില് ഇതില് ഒരു മണ്ഡലം ബിജെപിക്ക് പൂര്ണ്ണമായും അനുകൂലമായ രീതിയില് വോട്ടര്മാരുടെ സാന്ദ്രത കണക്കിലെടുത്ത് രൂപപ്പെടുത്തിയേക്കാം. തീരദേശ മേഖലകളെ ഉള്പ്പെടുത്തി പ്രത്യേക നിയമസഭാ മണ്ഡലങ്ങള് വരുന്നത് ബിജെപിക്ക് ഗുണകരമാകുമെന്ന് പാര്ട്ടി കണക്കുകൂട്ടുന്നു.
നഗര കേന്ദ്രീകൃത മണ്ഡലങ്ങള്: നഗരസഭാ പരിധിയിലെ വോട്ടര്മാരെ കേന്ദ്രീകരിച്ച് ബിജെപിക്ക് ജയിക്കാന് സാധിക്കുന്ന ഒന്നിലധികം നിയമസഭാ മണ്ഡലങ്ങള് തലസ്ഥാനത്ത് രൂപപ്പെട്ടേക്കാം. കേരളത്തില് നിലവിലുള്ള 140 നിയമസഭാ മണ്ഡലങ്ങള് എന്നത് 2031-ഓടെ ചരിത്രമാകും. പുതിയ കണക്കുകള് പ്രകാരം:
ലോക്സഭാ സീറ്റുകള്: നിലവിലെ 20-ല് നിന്നും 30 വരെയായി ഉയര്ന്നേക്കാം.
നിയമസഭാ സീറ്റുകള്: 140-ല് നിന്ന് 210 വരെയാകാന് സാധ്യതയുണ്ട്.
1977 മുതല് മാറ്റമില്ലാതെ തുടരുന്ന 140 എന്ന മാന്ത്രിക സംഖ്യ മാറുന്നതോടെ, പുതിയ മണ്ഡലങ്ങളുടെ അതിര്ത്തി നിര്ണ്ണയത്തില് കേന്ദ്ര ഭരണകക്ഷിയായ ബിജെപിക്ക് നിര്ണ്ണായക സ്വാധീനം ചെലുത്താനാകുമെന്നതാണ് ഇടത്-വലത് മുന്നണികളെ ആശങ്കപ്പെടുത്തുന്നത്. ജനസംഖ്യാ വളര്ച്ചാ നിരക്ക് കുറഞ്ഞ കേരളം പോലുള്ള സംസ്ഥാനങ്ങള്ക്ക് ലോക്സഭാ സീറ്റുകള് കുറയുമെന്ന ആശങ്ക നേരത്തെ ഉണ്ടായിരുന്നു. എന്നാല് അത്തരം ഭീതി വേണ്ടെന്ന് പ്രധാനമന്ത്രി നരേന്ദ്ര മോദി തന്നെ വ്യക്തമാക്കിയതോടെ, സീറ്റുകള് വര്ദ്ധിക്കുമെന്നുറപ്പായി.
മണ്ഡലങ്ങള് വിഭജിക്കുമ്പോള് ബിജെപിക്ക് വോട്ട് ബാങ്കുള്ള പ്രദേശങ്ങളെ ഒന്നിപ്പിക്കുകയും എതിര്കക്ഷികളുടെ കോട്ടകള് വിഭജിക്കുകയും ചെയ്യുന്ന ‘ഗെറിമാന്ഡറിംഗ്’ തന്ത്രം പ്രയോഗിക്കപ്പെടുമോ എന്നാണ് സി.പി.എമ്മും കോണ്ഗ്രസും ഉറ്റുനോക്കുന്നത്. ‘കേരളത്തില് ചുവടുറപ്പിക്കാന് ബിജെപിക്ക് ലഭിക്കുന്ന സുവര്ണ്ണാവസരമായിരിക്കും വരാനിരിക്കുന്ന മണ്ഡല പുനര്നിര്ണ്ണയം. വോട്ടര്മാരുടെ ജാതി-മത സമവാക്യങ്ങള് മാറ്റിമറിച്ചുകൊണ്ട് ബിജെപിക്ക് അനുകൂലമായ പോക്കറ്റുകള് സൃഷ്ടിക്കപ്പെട്ടാല് അത് കേരള രാഷ്ട്രീയത്തിലെ തന്നെ വലിയൊരു അട്ടിമറിക്ക് കാരണമാകും.’
സ്ത്രീ സംവരണം കൂടി നടപ്പിലാക്കുന്നതോടെ മണ്ഡലങ്ങളുടെ ഘടനയില് വലിയ മാറ്റങ്ങള് പ്രതീക്ഷിക്കാം. 2031-ലെ തിരഞ്ഞെടുപ്പ് ലക്ഷ്യമിട്ട് ബിജെപി ഇപ്പോള് തന്നെ ഗ്രൗണ്ട് വര്ക്കുകള് ആരംഭിച്ചതായാണ് സൂചന.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
പോലീസ് ഓഫീസേഴ്സ് അസോസിയേഷൻ സംസ്ഥാന പ്രസിഡന്റ് ആർ. പ്രശാന്തിന് സ്ഥലംമാറ്റം; മ്യൂസിയം എസ്എച്ച്ഒ ആയി നിയമനം
