കൊച്ചി/കോഴിക്കോട്: പണം വാങ്ങി സിനിമാ റിവ്യൂ ചെയ്യുന്നുവെന്ന ബോളിവുഡ്/മലയാള നടന് സുരേഷ് ഗോപിയുടെ മകന് മാധവ് സുരേഷിന്റെയും ‘അങ്കം അട്ടഹാസം’ സിനിമാ സംഘത്തിന്റെയും ആരോപണങ്ങള്ക്ക് നേരെ തനത് ശൈലിയില് കടുത്ത തെറിവിളികളോടെ പ്രതികരിച്ച് സോഷ്യല് മീഡിയ ഇന്ഫ്ലുവന്സര് അശ്വന്ത് കോക്ക്. ചിത്രത്തിന് അനുകൂലമായ നിലപാടുകള് സ്വീകരിക്കാന് റിവ്യൂവര് ഒരു ലക്ഷം രൂപ കൈക്കൂലി ആവശ്യപ്പെട്ടെന്ന നിര്മ്മാതാക്കളുടെ വാര്ത്താസമ്മേളനത്തിലെ വാദമാണ് കോക്കിനെ പ്രകോപിപ്പിച്ചത്. താന് പണം വാങ്ങിയാണ് പടങ്ങളെ വിലയിരുത്തുന്നതെന്ന് ഒരൊറ്റ തെളിവ് സമര്പ്പിച്ചാല് ഈ പണി നിര്ത്തി നാടുവിടാന് താന് തയ്യാറാണെന്ന് വ്യക്തമാക്കിയ താരം, തന്റെ യൂട്യൂബ് വരുമാനം എത്രയെന്ന് അറിയാത്ത ദാരിദ്ര്യവാസികളാണ് ഇത്തരമൊരു തുകയുടെ പേരില് കഥകള് മെനയുന്നതെന്നും പരിഹസിച്ചു.
സ്വന്തം മൊബൈല് ക്യാമറയില് പകര്ത്തിയ വീഡിയോയിലൂടെയാണ് കൊച്ചിയിലെ സിനിമാക്കാരുടെ പ്രസ് മീറ്റിന് കോക്ക് ചുട്ട മറുപടി നല്കിയത്. ഡിജിറ്റല് യുഗത്തില് ബാങ്ക് വഴി പണം വന്നിട്ടുണ്ടെങ്കില് എന്തുകൊണ്ട് അതിന്റെ രേഖകള് കാണിക്കുന്നില്ലെന്ന് കോക്ക് ചോദിക്കുന്നു. പേരാമ്പ്രയിലെ എസ്ബിഐ ശാഖയില് തനിക്ക് ഒരൊറ്റ അക്കൗണ്ട് മാത്രമാണുള്ളതെന്നും അതിന്റെ സ്റ്റേറ്റ്മെന്റ് പരിശോധിക്കാന് ആരെയും വെല്ലുവിളിക്കുന്നുവെന്നും അദ്ദേഹം പറഞ്ഞു. തനിക്ക് വേണ്ടി സംസാരിക്കാന് പിആര് ഏജന്സികളോ ഇടനിലക്കാരോ ഇല്ലെന്നും താന് സിംഗിളായാണ് എല്ലാ കാര്യങ്ങളും നോക്കുന്നതെന്നും കോക്ക് വ്യക്തമാക്കി.
സുരേഷ് ഗോപിയുടെ മകന് മാധവ് സുരേഷ് മാധ്യമങ്ങള്ക്ക് മുന്നിലിരുന്ന് തനിക്കെതിരെ വ്യാജ പ്രചരണം നടത്തുമ്പോള് മിനിമം മര്യാദ കാണിക്കണമായിരുന്നു എന്ന് അശ്വന്ത് കോക്ക് ഓര്മ്മിപ്പിച്ചു. ഒരുകാലത്ത് സുരേഷ് ഗോപിയുടെ വലിയ ആരാധകനായിരുന്ന താന് ‘ബഡാ ദോസ്ത്’, ‘ടൈഗര്’ തുടങ്ങിയ മാസ്സ് പടങ്ങള് റിലീസ് ദിവസം തന്നെ ആദ്യ ഷോ കണ്ട് കൈയടിച്ചവനാണെന്ന് അദ്ദേഹം വെളിപ്പെടുത്തി. ഗോകുല് സുരേഷിന്റെ സിനിമകള്ക്ക് മുന്പ് താന് നല്ല റിവ്യൂ കൊടുത്തിട്ടുള്ള കാര്യവും അദ്ദേഹം എടുത്തുപറഞ്ഞു. മറ്റുള്ളവരില് നിന്ന് ചായ പോലും വാങ്ങി കുടിക്കാത്ത തന്റെ റേഞ്ച് ഒരു ലക്ഷമല്ലെന്നും ആരോപണം ഉന്നയിക്കുന്നവര്ക്ക് വേണമെങ്കില് ഒരു 15 ലക്ഷത്തിന്റെ കഥയെങ്കിലും പറയാമായിരുന്നു എന്നും കോക്ക് കൂട്ടിച്ചേര്ത്തു.
സിനിമയുടെ ദയനീയ പരാജയത്തെ റിവ്യൂവേഴ്സിന്റെ തലയില് കെട്ടിവെക്കാനാണ് അണിയറപ്രവര്ത്തകര് ശ്രമിക്കുന്നത്. ആളുകള്ക്ക് ഒരു ലക്ഷം രൂപ വീതം വെറുതെ കൊടുത്താല് പോലും തിയേറ്ററില് ഇരുന്ന് കണ്ടുതീര്ക്കാന് പറ്റാത്ത അത്രയും ടോര്ച്ചറിങ് സിനിമയാണ് ഇവര് നിര്മ്മിച്ചു വെച്ചിരിക്കുന്നത്. യൂട്യൂബില് നിന്നും ഗൂഗിളില് നിന്നും തനിക്ക് ലഭിക്കുന്ന ഡോളറുകളുടെ മൂല്യം അറിയാവുന്നവര്ക്ക് തന്റെ സാമ്പത്തിക ശേഷി മനസ്സിലാകും. തനിക്കെതിരെ ഉയരുന്ന വ്യാജ ആരോപണങ്ങള്ക്കെതിരെ ഹൈക്കോടതി അഭിഭാഷകന് വഴി ശക്തമായ മാനനഷ്ടക്കേസ് ഫയല് ചെയ്യുമെന്നും കോക്ക് ഉറപ്പിച്ചു പറഞ്ഞു.
മാതാപിതാക്കളുടെ തണലില് ജിടി ബൈക്കും വാങ്ങി ഇഎംഐ അടച്ചു നടക്കുന്ന മാധവ് സുരേഷ് സിനിമാ രംഗത്ത് കണ്ടുപഠിക്കേണ്ടത് നടന് ധ്യാന് ശ്രീനിവാസനെയാണെന്ന് കോക്ക് ഉപദേശിച്ചു. താന് ഒട്ടനവധി സിനിമകളുടെ പേരില് ധ്യാനിനെ കഠിനമായി വിമര്ശിച്ചിട്ടുണ്ടെങ്കിലും ഇന്നുവരെ ആ മനുഷ്യന് തനിക്കെതിരെ ഒരു വാക്ക് പോലും മോശമായി പറഞ്ഞിട്ടില്ലെന്ന് മാത്രമല്ല, ഇപ്പോഴും താനുമായി നല്ല സൗഹൃദം പുലര്ത്തുന്നുണ്ടെന്നും കോക്ക് വ്യക്തമാക്കി. ധ്യാനിനെപ്പോലെയാകാന് മാധവ് നൂറു ജന്മം ജനിച്ചാലും സാധിക്കില്ല, കാരണം ധ്യാന് മഹാനായ ശ്രീനിവാസന്റെ മകനാണെന്ന വ്യത്യാസമുണ്ടെന്നും അശ്വന്ത് കോക്ക് കുറ്റപ്പെടുത്തി.
മുന്പ് കൊച്ചിയില് റിവ്യൂ ബോംബിങ് കേസില് പോലീസ് തന്നെ മണിക്കൂറുകളോളം ചോദ്യം ചെയ്തതാണെന്നും താന് അഴിമതിക്കാരനാണെങ്കില് സൈബര് സെല്ലും കേരള പോലീസും അത് പണ്ടേ പൊക്കുമായിരുന്നു എന്നും കോക്ക് ചൂണ്ടിക്കാട്ടി. കേരളത്തില് എഫ്എഫ്സി (FFC) എന്ന ഓണ്ലൈന് ഗ്രൂപ്പിന് തുടക്കമിട്ടത് താനാണ്. തന്നെ കായികമായി നേരിടുമെന്ന് ഭീഷണിപ്പെടുത്തുന്നവര്ക്ക് മുന്നില് ഒളിച്ചോടാന് താനില്ലെന്നും കോഴിക്കോട്ട് തന്നെ ഉണ്ടാകുമെന്നും അദ്ദേഹം വെല്ലുവിളിച്ചു. സിനിമയ്ക്ക് നിലവാരമില്ലെങ്കില് അതിന് സോഷ്യല് മീഡിയയെ കുറ്റം പറയുന്നതില് അര്ത്ഥമില്ലെന്നും അശ്വന്ത് കോക്ക് പറഞ്ഞു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘എനിക്കെന്തെങ്കിലും സംഭവിച്ചാല് ഉത്തരവാദി ആ യൂട്യൂബര്മാര്; ‘ മുഖ്യമന്ത്രിയോട് സഹായമഭ്യര്ത്ഥിച്ച് പൊട്ടിക്കരഞ്ഞ് രേഖാ രതീഷ്; സൈബര് ആക്രമണത്തില് നീറി നടി; അടിയന്തര നടപടികളെടുക്കാന് സര്ക്കാര്
