തിരുവനന്തപുരം: തിരുവനന്തപുരം സെന്ട്രല് മണ്ഡലത്തില് എല്ഡിഎഫ് സ്ഥാനാര്ത്ഥി കരമന സുധീറിനെതിരെ നിസ്സഹകരണം പ്രഖ്യാപിച്ച മുന് മന്ത്രി ആന്റണി രാജുവിനെതിരെ കര്ശന നിലപാടുമായി സിപിഎം. പ്രചാരണത്തില് ഉടന് സജീവമായില്ലെങ്കില് ഇടതുമുന്നണിയില് നിന്ന് പുറത്താക്കുമെന്ന കടുത്ത താക്കീതാണ് സിപിഎം നേതൃത്വം ആന്റണി രാജുവിനും ജനാധിപത്യ കേരള കോണ്ഗ്രസിനും നല്കിയിരിക്കുന്നത്. ഇതോടെ രാഷ്ട്രീയ സമ്മര്ദ്ദത്തിലായ ആന്റണി രാജു അയയുന്നതായാണ് സൂചനകള്.
തിരുവനന്തപുരം മണ്ഡലത്തില് ത്രികോണ മത്സരം മുറുകുമ്പോഴും സിറ്റിംഗ് എംഎല്എയായ ആന്റണി രാജു വിട്ടുനില്ക്കുന്നത് ഇടതുപക്ഷത്തിന് വലിയ തിരിച്ചടിയായിരുന്നു. സ്ഥാനാര്ത്ഥി നിര്ണ്ണയത്തിലെ അതൃപ്തി പരസ്യമാക്കി അദ്ദേഹം വിട്ടുനിന്നതോടെ സിപിഎം ജില്ലാ നേതൃത്വം വിഷയത്തില് നേരിട്ട് ഇടപെട്ടു. പ്രചാരണ രംഗത്ത് സജീവമാകണമെന്നും സ്ഥാനാര്ത്ഥി കരമന സുധീറിനെ നേരിട്ട് കണ്ട് പിന്തുണ അറിയിക്കണമെന്നും പാര്ട്ടി കര്ശനമായി നിര്ദ്ദേശിച്ചു. അല്ലാത്തപക്ഷം മുന്നണിയില് തുടരാന് അനുവദിക്കില്ലെന്ന അന്ത്യശാസനമാണ് അദ്ദേഹത്തിന് നല്കിയത്.
സിപിഎമ്മിന്റെ ഭാഗത്തുനിന്ന് ഇത്തരമൊരു കടുത്ത നീക്കം പ്രതീക്ഷിക്കാതിരുന്ന ആന്റണി രാജു, പുറത്താക്കല് നടപടി ഒഴിവാക്കാനാണ് പെട്ടെന്ന് വഴങ്ങിയത്. ഇതിന്റെ ഭാഗമായാണ് സിപിഎം തിരുവനന്തപുരം ജില്ലാ കമ്മിറ്റിയുടെ ഫേസ്ബുക്ക് പേജിലൂടെ കരമന സുധീറിന് വോട്ട് അഭ്യര്ത്ഥിച്ചുകൊണ്ടുള്ള വീഡിയോ അദ്ദേഹം പുറത്തുവിട്ടത്. മനസ്സില്ലാമനസ്സോടെയാണെങ്കിലും മുന്നണി നേതൃത്വത്തിന് മുന്നില് വഴങ്ങുകയല്ലാതെ മറ്റ് മാര്ഗ്ഗമില്ലെന്ന് അദ്ദേഹം തിരിച്ചറിഞ്ഞതായാണ് രാഷ്ട്രീയ നിരീക്ഷകര് വിലയിരുത്തുന്നത്.
താന് നിര്ദ്ദേശിച്ച ആളെ സ്ഥാനാര്ത്ഥിയാക്കാത്തതിലുള്ള പ്രതിഷേധമായിരുന്നു ആന്റണി രാജുവിനെ പ്രചാരണത്തില് നിന്ന് അകറ്റിയത്. എന്നാല് മണ്ഡലത്തിലെ വികസന പ്രവര്ത്തനങ്ങളും ലത്തീന് വോട്ടുകളും ഏകോപിപ്പിക്കാന് അദ്ദേഹത്തിന്റെ സാന്നിധ്യം അനിവാര്യമാണെന്ന് സിപിഎം കരുതുന്നു. വരും ദിവസങ്ങളില് കരമന സുധീറുമായി അദ്ദേഹം കൂടിക്കാഴ്ച നടത്തുമെന്നും പ്രചാരണ യോഗങ്ങളില് പങ്കെടുക്കുമെന്നും വിവരമുണ്ട്. എങ്കിലും, നിര്ബന്ധത്തിന് വഴങ്ങി എത്തുന്ന ആന്റണി രാജുവിനെ പ്രവര്ത്തകര് എത്രത്തോളം സ്വീകരിക്കുമെന്നത് കണ്ടറിയണം.
മുന്നണിയിലെ ഈ ആഭ്യന്തര കലഹം യുഡിഎഫ് സ്ഥാനാര്ത്ഥി സി.പി. ജോണും ബിജെപിയും ഇതിനകം ആയുധമാക്കിയിട്ടുണ്ട്. ‘ധാര്മ്മികമായ കാരണങ്ങളാല്’ വിട്ടുനില്ക്കുന്നു എന്ന് ആന്റണി രാജു നേരത്തെ പറഞ്ഞത് എല്ഡിഎഫ് സ്ഥാനാര്ത്ഥിയുടെ വിശ്വാസ്യതയെ ബാധിച്ചിരുന്നു. ഈ കേടുപാടുകള് തീര്ക്കാനാണ് സിപിഎം നടത്തുന്ന നിര്ണ്ണായക നീക്കങ്ങള് നടത്തുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
വിജയക്കൊടി പാറിച്ച് ഒരു സാധാരണക്കാരി; മാതൃകയാവുന്ന നിശ്ചയദാര്ഢ്യം; പരിമിതികളെ തോല്പ്പിച്ച പെണ്കരുത്ത്; വിജയനഗറിന് അഭിമാനമായി നുസ്ഹത് ഫാത്തിമ
