കിഫ്ബിയുടെ കടമെടുപ്പ് പൂട്ടുന്നു; ഇനി ലോണും കടപത്രവുമില്ല, എല്ലാം സര്ക്കാര് ചെയ്യും; നയം മാറ്റി സതീശന് സര്ക്കാര് നല്കുന്നത് കൊള്ള നടത്തില്ലെന്ന സന്ദേശം
തിരുവനന്തപുരം: കേരള ഇന്ഫ്രാസ്ട്രക്ചര് ഇന്വെസ്റ്റ്മെന്റ് ഫണ്ട് ബോര്ഡിന്റെ (കിഫ്ബി) സ്വതന്ത്ര കടമെടുപ്പ് ശൈലിക്ക് പൂര്ണ്ണമായി വിരാമമിടാന് സംസ്ഥാന സര്ക്കാര് ഒരുങ്ങുന്നു. ഇനി മുതല് കിഫ്ബിക്ക് സ്വന്തം നിലയില് വിദേശ ലോണുകള് എടുക്കാനോ കടപത്രങ്ങള് പുറപ്പെടുവിക്കാനോ അനുമതിയുണ്ടാകില്ല. പകരം വികസന പദ്ധതികള്ക്കുള്ള ധനസമാഹരണവും നിര്വ്വഹണവും പൂര്ണ്ണമായും സര്ക്കാരിന്റെ നേരിട്ടുള്ള നയപരമായ തീരുമാനങ്ങള്ക്ക് കീഴിലാക്കും. സ്ഥാപനത്തെ ഒരു ‘സ്വതന്ത്ര സാമ്രാജ്യം’ പോലെ കൊണ്ടുനടക്കാന് അനുവദിക്കില്ലെന്ന് മുഖ്യമന്ത്രി വി.ഡി. സതീശന് ഡയറക്ടര് ബോര്ഡ് യോഗത്തില് കടുത്ത ഭാഷയില് മുന്നറിയിപ്പ് നല്കിയിട്ടുണ്ട്.
കിഫ്ബിയുടെ പ്രവര്ത്തനങ്ങളില് വന് അഴിച്ചുപണിക്കാണ് പുതിയ യു.ഡി.എഫ്. സര്ക്കാര് ലക്ഷ്യമിടുന്നത്. ഇതിന്റെ ഭാഗമായി സ്ഥാപനത്തിന്റെ എല്ലാ പ്രവര്ത്തനങ്ങളും ഇനി മുതല് മുഖ്യമന്ത്രി വി.ഡി. സതീശന്റെ നേരിട്ടുള്ള നിയന്ത്രണത്തിലായിരിക്കും. സ്ഥാപനവുമായി ബന്ധപ്പെട്ട് കൈക്കൊള്ളുന്ന എല്ലാ തീരുമാനങ്ങളും ധനവകുപ്പ് നിര്ബന്ധമായും അറിഞ്ഞിരിക്കണമെന്ന കര്ശന നിര്ദ്ദേശവും നല്കിയിട്ടുണ്ട്. കഴിഞ്ഞ കാലങ്ങളിലെ പ്രവര്ത്തന രീതികളില്നിന്ന് വലിയ നയപരമായ മാറ്റങ്ങളാണ് ഇതിലൂടെ സര്ക്കാര് നടപ്പിലാക്കാന് പോകുന്നത്.
നയമാറ്റത്തിന്റെ ആദ്യഘട്ടമെന്ന നിലയില് കിഫ്ബിയുടെ ഇതുവരെയുള്ള മുഴുവന് സാമ്പത്തിക ഇടപാടുകളും കടുത്ത ഓഡിറ്റിങ്ങിന് വിധേയമാക്കാന് സര്ക്കാര് തീരുമാനിച്ചു. പ്രവര്ത്തനങ്ങളില് പൂര്ണ്ണമായ സുതാര്യത ഉറപ്പാക്കുന്നതിനായി പുറത്തുനിന്നുള്ള പ്രമുഖ ഏജന്സിയെയാണ് ഓഡിറ്റിങ് ചുമതല ഏല്പ്പിക്കുക. ഇതിന് പുറമേ, കിഫ്ബിയുടെ ഭാവി ഘടനയും തുടര്നടപടികളും നിശ്ചയിക്കുന്നതിനായി സ്ഥാപനത്തെക്കുറിച്ച് വിശദമായി പഠിക്കാന് ഒരു വിദഗ്ധ സമിതിയെ നിയോഗിക്കുമെന്നും മുഖ്യമന്ത്രി വ്യക്തമാക്കിയിട്ടുണ്ട്.
നിലവില് കിഫ്ബി ഏറ്റെടുത്ത് നടത്തിയതില് ഭൂരിഭാഗവും നേരിട്ട് വരുമാനം ലഭിക്കാത്ത പദ്ധതികളാണെന്നാണ് പുതിയ സര്ക്കാരിന്റെ കണ്ടെത്തല്. പൊതുമരാമത്ത് വകുപ്പ് (പി.ഡബ്ല്യു.ഡി.) സ്വന്തം നിലയില് ബജറ്റ് വിഹിതം ഉപയോഗിച്ച് നടപ്പാക്കേണ്ടിയിരുന്ന സാധാരണ പദ്ധതികളാണ് കഴിഞ്ഞ കാലങ്ങളില് കിഫ്ബിയുടെ വലിയ കടമെടുപ്പിലൂടെ നടപ്പാക്കിയിരുന്നത്. ഈ രീതി സംസ്ഥാനത്തെ കടുത്ത സാമ്പത്തിക ബാധ്യതയിലേക്ക് തള്ളിവിട്ടുവെന്നാണ് സര്ക്കാരിന്റെ വിലയിരുത്തല്.
നിര്മ്മാണത്തിന് ശേഷം കൃത്യമായ വരുമാനം തിരികെ ലഭിക്കാത്ത പദ്ധതികള് ഇനി കിഫ്ബി വഴി നടപ്പാക്കില്ലെന്നതാണ് സര്ക്കാരിന്റെ പുതിയ നയം. പൊതുമരാമത്ത് വകുപ്പിന്റെ പതിവ് ജോലികള് കിഫ്ബിയില്നിന്ന് പൂര്ണ്ണമായി ഒഴിവാക്കും. ഭാവിയില് കിഫ്ബിക്ക് കൂടുതല് സാമ്പത്തിക ബാധ്യതകള് ഉണ്ടാക്കാത്തതും, നിക്ഷേപിച്ച പണം കൃത്യമായി തിരിച്ചുപിടിക്കാന് സാധിക്കുന്നതുമായ വാണിജ്യ-വികസന പദ്ധതികളിലേക്ക് മാത്രമായി ബോര്ഡിന്റെ ശ്രദ്ധ പരിമിതപ്പെടുത്തും.
ഇതിനൊപ്പം തന്നെ കിഫ്ബിയിലെ ആഭ്യന്തര ചെലവുകള് കനത്ത തോതില് ചുരുക്കാനും സര്ക്കാര് ആലോചിക്കുന്നുണ്ട്. ഇതിന്റെ ഭാഗമായി കിഫ്ബിയിലെ ഉദ്യോഗസ്ഥരുടെയും ജീവനക്കാരുടെയും ഉയര്ന്ന അലവന്സുകള് വെട്ടിക്കുറയ്ക്കും. ഭരണമാറ്റത്തിന് തൊട്ടുപിന്നാലെ കിഫ്ബിയുടെ അമരക്കാരനായിരുന്ന സി.ഇ.ഓ. കെ.എം. ഏബ്രഹാം പദവി രാജിവെച്ചിരുന്നു. നിലവില് അഡീഷണല് ഡയറക്ടറായ മിനി ആന്റണിക്കാണ് സി.ഇ.ഓ.യുടെ താല്കാലിക ചുമതല നല്കിയിരിക്കുന്നത്.
2016-ല് ഒന്നാം പിണറായി സര്ക്കാരിന്റെ കാലത്താണ് അന്നത്തെ ധനമന്ത്രി തോമസ് ഐസക്കിന്റെ സവിശേഷ താല്പര്യപ്രകാരം കിഫ്ബി പുനരുജ്ജീവിപ്പിച്ചത്. ബജറ്റിന് പുറത്തുനിന്ന് വന്തോതില് പണം സമാഹരിച്ച് വലിയ അടിസ്ഥാനസൗകര്യ വികസന പദ്ധതികള് സംസ്ഥാനത്ത് നടപ്പിലാക്കുക എന്നതായിരുന്നു ലക്ഷ്യം. തുടക്കത്തില് വലിയ തോതില് ഫണ്ട് സമാഹരിക്കാന് കിഫ്ബിക്ക് സാധിച്ചിരുന്നു.
എന്നാല്, രണ്ടാം പിണറായി സര്ക്കാരിന്റെ അവസാന കാലഘട്ടമായപ്പോഴേക്കും കിഫ്ബിയുടെ ഓഫ്-ബജറ്റ് കടമെടുപ്പുകള് വലിയ നിയമക്കുരുക്കുകളിലേക്കും രാഷ്ട്രീയ വിവാദങ്ങളിലേക്കും വഴിമാറി. കിഫ്ബി നടത്തുന്ന കടമെടുപ്പുകള് സംസ്ഥാന സര്ക്കാരിന്റെ നേരിട്ടുള്ള കടമായി കേന്ദ്ര സര്ക്കാരും കണ്ട്രോളര് ആന്ഡ് ഓഡിറ്റര് ജനറലും (കാഗ്) കണക്കാക്കിയതോടെ സംസ്ഥാനത്തിന്റെ പൊതുവായ കടമെടുപ്പ് പരിധി വെട്ടിക്കുറയ്ക്കപ്പെടുന്ന സാഹചര്യമുണ്ടായി. കിഫ്ബിയുടെ ഭരണഘടനാപരമായ സാധുതയെപ്പോലും കാഗ് ഓഡിറ്റ് റിപ്പോര്ട്ടുകള് ചോദ്യം ചെയ്തിരുന്നു.
കിഫ്ബി വരുത്തിവെച്ച വലിയ സാമ്പത്തിക ബാധ്യതകളും കേന്ദ്രത്തിന്റെ കര്ശന നിയന്ത്രണങ്ങളും കാരണമാണ് ഇനി സ്വന്തം നിലയില് ലോണെടുക്കാന് ബോര്ഡിനെ അനുവദിക്കേണ്ടതില്ലെന്ന കടുത്ത തീരുമാനത്തിലേക്ക് വി.ഡി. സതീശന് സര്ക്കാര് എത്തിയത്. വികസന പദ്ധതികള്ക്ക് പണം കണ്ടെത്തേണ്ടി വന്നാല് അത് ഇനി സര്ക്കാര് നേരിട്ട് ബജറ്റ് വഴിയോ മറ്റ് ഔദ്യോഗിക ചാനലുകള് വഴിയോ ചെയ്യും.
കടപത്രങ്ങള് (ബോണ്ടുകള്) ഇറക്കി ഉയര്ന്ന പലിശയ്ക്ക് പണം സമാഹരിക്കുന്ന രീതി പൂര്ണ്ണമായും അവസാനിപ്പിക്കുന്നതോടെ കിഫ്ബിയുടെ ബാധ്യതകള് ഒരു പരിധി വരെ നിയന്ത്രിക്കാന് സാധിക്കുമെന്നാണ് ധനവകുപ്പിന്റെ കണക്കുകൂട്ടല്. മുന് സര്ക്കാരിന്റെ ഏറ്റവും വലിയ വികസന തുരുത്തായിരുന്ന കിഫ്ബിയെ പൂര്ണ്ണമായും സര്ക്കാരിന്റെ കണ്ട്രോളില് കൊണ്ടുവരുന്ന പുതിയ നയം വരും ദിവസങ്ങളില് വലിയ രാഷ്ട്രീയ ചര്ച്ചകള്ക്ക് വഴിതുറക്കുമെന്ന് ഉറപ്പാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
സ്പീക്കര് പദവി ഒഴിഞ്ഞു, ‘നീതി’യില് നിന്ന് പടിയിറക്കം; സി.പി.എമ്മില് ഇനി ഷംസീറിന്റെ റോളെന്ത്? കൊടിയേരിയുടെ പ്രിയശിഷ്യനെ കാത്തിരിക്കുന്നതെന്ത്?
