സമയം 3 മണി 25 മിനിറ്റ് 15 സെക്കന്‍ഡ്. ആ ചുവരിലെ സൂചികള്‍ മരവിച്ചുനില്‍ക്കുന്നത് ആ കറുത്ത ചൊവ്വാഴ്ചയുടെ നടുക്കുന്ന സ്മാരകമായി; നിലച്ച സൂചികള്‍, നിലവിളിച്ച മണ്ണ്: മുണ്ടത്തിക്കോടിന്റെ നെഞ്ചകം തകര്‍ന്നത് മൂന്നേ ഇരുപത്തിയഞ്ചിന്

മുണ്ടത്തിക്കോട്: ആകാശപ്പൂരത്തിന് വര്‍ണ്ണച്ചായം ചാലിക്കേണ്ടവരുടെ സ്വപ്നങ്ങള്‍ കരിമരുന്നിന്റെ കനലില്‍ എരിഞ്ഞടങ്ങിയത് എന്ന്? ആ ചോദ്യത്തിന് ഇനി ഉത്തരമന്വേഷിച്ച് അധികം അലയേണ്ടതില്ല. മുണ്ടത്തിക്കോട് കുട്ടംകുളം പാടത്തെ വെടിക്കെട്ടുപുരയില്‍ കാലം തറഞ്ഞുനിന്നതിന്റെ കൃത്യമായ തെളിവ് ദുരന്തഭൂമിയില്‍ ബാക്കിയുണ്ട്. സ്‌ഫോടനത്തിന്റെ ആഘാതത്തില്‍ ഹൃദയമിടിപ്പ് നിലച്ചുപോയ ഒരു ഘടികാരം!

ദുരന്തത്തിന്റെ തീവ്രതയില്‍ ചുവരുകള്‍ ഇളകിയാടിയപ്പോള്‍, തൊഴിലാളികള്‍ വസ്ത്രം മാറുന്ന കൊച്ചുഷെഡിന് പുറത്തെ ആ ചുവര്‍ഘടികാരം നിശ്ചലമായി. സമയം കൃത്യം 3 മണി 25 മിനിറ്റ് 15 സെക്കന്‍ഡ്. മുണ്ടത്തിക്കോടിന്റെ ആകാശം കറുത്ത പുകയാല്‍ മൂടിയതും, ഒരുകൂട്ടം മനുഷ്യരുടെ നിലവിളികള്‍ ആ പാടശേഖരത്ത് അവസാനിച്ചതും ആ സെക്കന്‍ഡിലായിരുന്നുവെന്ന് ആ ചുവരിലെ മരവിച്ച സൂചികള്‍ ലോകത്തോട് വിളിച്ചുപറയുന്നു.

കത്തിയതോ കത്തിയമര്‍ന്നതോ എന്ന തര്‍ക്കങ്ങള്‍ക്കിടയിലും രക്ഷപ്പെട്ട തൊഴിലാളികള്‍ക്ക് ഒരുകാര്യം ഉറപ്പിച്ചു പറയാനുണ്ട്. അപകടത്തിന്റെ തുടക്കം കരിമരുന്നുപുരയില്‍ നിന്നുതന്നെയായിരുന്നു. ഒരു കമ്പിത്തിരി കത്തുന്നതുപോലെയുള്ള ശബ്ദമാണ് ആദ്യം കേട്ടത്. പണിയായുധങ്ങള്‍ താഴെവെച്ച് ഒന്ന് തിരിഞ്ഞുനോക്കുമ്പോഴേക്കും അഗ്‌നിനാളങ്ങള്‍ കരിമരുന്നിന്റെ ശേഖരത്തെ വിഴുങ്ങിക്കഴിഞ്ഞിരുന്നു.

ഓലപ്പടക്കമുണ്ടാക്കുന്നവരും തിരി ഉണക്കാന്‍ വെച്ചിരുന്നവരും ഭാഗ്യം കൊണ്ടാണ് രക്ഷപ്പെട്ടത്. സ്‌ഫോടനത്തിന്റെ ശബ്ദം കേട്ട് ചിന്തിക്കാന്‍ നില്‍ക്കാതെ അവര്‍ പാടത്തേക്ക് ഓടിയിറങ്ങുകയായിരുന്നു. സെക്കന്‍ഡുകളുടെ വ്യത്യാസത്തിലാണ് ഇവര്‍ മരണത്തില്‍ നിന്ന് തലനാരിഴയ്ക്ക് രക്ഷപ്പെട്ടത്. എങ്കിലും ആ കണ്മുന്നില്‍ കണ്ട കാഴ്ചകള്‍ പലരുടെയും കാഴ്ചയെയും കേള്‍വിയെയും ഇന്നും തളര്‍ത്തുന്നുണ്ട്.

വെടിക്കെട്ട് വിദഗ്ധന്‍ വിജേഷിന്റെ സഹായത്തോടെ പോലീസ് സംഘം ഓരോ വെടിക്കോപ്പും പരിശോധിച്ചു. പൊട്ടാത്ത അമിട്ടുകളും ഗുണ്ടുകളും അസംസ്‌കൃത വസ്തുക്കളും വടക്കാഞ്ചേരിയിലെ സുരക്ഷിത കേന്ദ്രത്തിലേക്ക് മാറ്റിയിട്ടുണ്ട്. ഇവ കോടതിയുടെ അനുമതിയോടെ നിര്‍വീര്യമാക്കുന്നതോടെ മാത്രമേ പ്രദേശത്തെ ഭീതി പൂര്‍ണ്ണമായും ഒഴിയുകയുള്ളൂ.

കരിമരുന്നിന്റെ ഗന്ധം തങ്ങിനില്‍ക്കുന്ന മുണ്ടത്തിക്കോട്ടെ ആ പാടത്ത് ഇന്ന് നിശബ്ദത മാത്രം. തൊഴിലാളികള്‍ തങ്ങളുടെ വസ്ത്രങ്ങളും ഉച്ചഭക്ഷണപ്പൊതികളും വെച്ചിരുന്ന ആ മുറിക്ക് പുറത്ത് ഇപ്പോഴും ആ ക്ലോക്കുണ്ട്. 3:25:15-ല്‍ നിലച്ചുപോയ ആ സൂചികള്‍ ഒരു ചരിത്രരേഖയായി അവിടെ അവശേഷിക്കുന്നു. അത് കേവലം ഒരു സമയമല്ല, മറിച്ച് മുണ്ടത്തിക്കോടിന്റെ സ്വപ്നങ്ങള്‍ എരിഞ്ഞടങ്ങിയ നിമിഷമാണ്.

അപകടം നടന്ന സമയം തെളിഞ്ഞെങ്കിലും, അത് എങ്ങനെയുണ്ടായി എന്ന ചോദ്യത്തിന് അന്വേഷണസംഘം ഇനിയും ഉത്തരം കണ്ടെത്തേണ്ടതുണ്ട്. ലൈസന്‍സ് നിബന്ധനകളുടെ ലംഘനം നടന്നോ എന്നും അമിതമായ തോതില്‍ മരുന്ന് സംഭരിച്ചോ എന്നും പോലീസ് പരിശോധിക്കുന്നുണ്ട്.