“നെഞ്ചത്ത് കൈവെച്ച് പറയാം, അതിനപ്പുറം മറ്റൊരു മോഹമില്ല!” ഗുരുവായൂർ ദേവസ്വം ബോർഡ് ചെയർമാൻ പദവിയാണ് ജീവിതത്തിലെ വലിയ ആഗ്രഹമെന്ന് കേന്ദ്രമന്ത്രി സുരേഷ് ഗോപി

കൊച്ചി: തന്റെ ജീവിതത്തിലെ ഏറ്റവും വലിയ ആഗ്രഹം ഗുരുവായൂർ ദേവസ്വം ബോർഡ് ചെയർമാൻ പദവിയാണെന്ന് തുറന്നുപറഞ്ഞ് കേന്ദ്രമന്ത്രി സുരേഷ് ഗോപി. മന്ത്രിസ്ഥാനത്തേക്കാൾ ഉപരിയായി 365 ദിവസവും ഗുരുവായൂരപ്പന്റെ സന്നിധിയിൽ ആധികാരികമായി പ്രവർത്തിക്കാൻ സാധിക്കുന്ന പദവിയാണ് താൻ മോഹിക്കുന്നതെന്ന് അദ്ദേഹം കൊച്ചിയിൽ പറഞ്ഞു. തന്റെ ഈ ആഗ്രഹത്തെ ആരും പുച്ഛത്തോടെ കാണരുതെന്നും മതപരമായ കാരണങ്ങൾ പറഞ്ഞ് തന്നെ വേട്ടയാടരുതെന്നും സുരേഷ് ഗോപി വ്യക്തമാക്കി. ഒരു ഹിന്ദുവായതിൽ അഭിമാനിക്കുന്ന തന്നെ എന്തിനാണ് ചിലർ ആക്രമിക്കുന്നതെന്ന് അദ്ദേഹം ചോദിച്ചു.

രാഷ്ട്രീയത്തിൽ ഇനിയും മുന്നേറാൻ തനിക്ക് ആഗ്രഹമുണ്ടെന്നും ഉന്നത പദവികൾ അലങ്കരിക്കാൻ ഇഷ്ടമാണെന്നും അദ്ദേഹം കൂട്ടിച്ചേർത്തു. നേരത്തെ, തനിക്ക് അടുത്ത ജന്മത്തിൽ ബ്രാഹ്മണനായി ജനിക്കണമെന്ന ആഗ്രഹമുണ്ടെന്ന് സുരേഷ് ഗോപി പറഞ്ഞത് വലിയ വിവാദങ്ങൾക്ക് വഴിവെച്ചിരുന്നു. ഇതേക്കുറിച്ചുള്ള ചോദ്യങ്ങൾക്കിടയിലാണ് തന്റെ ഭക്തിയും രാഷ്ട്രീയ ലക്ഷ്യങ്ങളും അദ്ദേഹം വ്യക്തമാക്കിയത്. ഭാരതത്തിന്റെ പുരോഗതിയിൽ സ്ത്രീകളുടെ പങ്കിനെക്കുറിച്ചും അദ്ദേഹം വാചാലനായി. സ്ത്രീകൾ ഇന്ന്  രാജ്യത്തിന്റെ വളർച്ചയുടെ പ്രധാന  ശില്പികളാണെന്നും അദ്ദേഹം പറഞ്ഞു.

കേന്ദ്രമന്ത്രിയായി തുടരുമ്പോഴും തന്റെ ആത്മീയമായ ആഗ്രഹങ്ങൾ പരസ്യമായി പ്രകടിപ്പിച്ച സുരേഷ് ഗോപിയുടെ വാക്കുകൾ സോഷ്യൽ മീഡിയയിൽ ഇതിനോടകം ചർച്ചയായിക്കഴിഞ്ഞു.