ഹോർമുസ് കടലിടുക്കിൽ സംഘർഷം; രണ്ട് കപ്പലുകൾ പിടിച്ചെടുത്ത് ഇറാൻ; സൈനികർ കപ്പലിൽ കയറുന്ന വീഡിയോ പുറത്ത്

ടെഹ്‌റാൻ: ഇറാൻ-ഇസ്രയേൽ-യുഎസ് സംഘർഷം മൂർച്ഛിക്കുന്നതിനിടെ, ഹോർമുസ് കടലിടുക്കിൽ രണ്ട് കണ്ടെയ്‌നർ കപ്പലുകൾ ഇറാൻ പിടിച്ചെടുത്തു. എംഎസ്‌സി-ഫ്രാൻസെസ്ക, എപമിനോഡെസ് എന്നീ കപ്പലുകളാണ് ഇറാൻ പിടിച്ചെടുത്തത്. ഈ വർഷം ഫെബ്രുവരിയിൽ സംഘർഷം ആരംഭിച്ചതിന് ശേഷം ഇറാൻ നടത്തുന്ന ആദ്യത്തെ പ്രധാന സൈനിക നടപടിയാണിത്.

ഇറാൻ റെവല്യൂഷണറി ഗാർഡ് കോർ പുറത്തുവിട്ട വീഡിയോയിൽ, മുഖംമൂടി ധരിച്ച സായുധ സംഘം വേഗതയേറിയ ബോട്ടുകളിൽ വന്ന് കപ്പലുകളിൽ കയറുന്ന ദൃശ്യങ്ങൾ വ്യക്തമാണ്. കപ്പലിന്റെ ഡെക്ക് നിയന്ത്രണത്തിലാക്കിയ സൈനികർ കപ്പലുകളെ ഇറാൻ തീരത്തേക്ക് തിരിച്ചുവിട്ടതായാണ് റിപ്പോർട്ടുകൾ.

 അന്താരാഷ്ട്ര അംഗീകാരമില്ലാതെയാണ് കപ്പലുകൾ കടലിടുക്കിലൂടെ സഞ്ചരിച്ചതെന്ന് ഐആർജിസി ആരോപിച്ചു.കപ്പലുകളുടെ നാവിഗേഷൻ സംവിധാനങ്ങളിൽ കൃത്രിമം കാണിച്ചതായും ഇറാൻ സൈന്യം ആരോപിക്കുന്നു.

കടലിടുക്കിലെ ക്രമസമാധാനത്തിന് ഭംഗം വരുത്തുന്ന ഏത് നീക്കവും ഇറാനെതിരായ ആക്രമണമായി കണക്കാക്കുമെന്നും റെവല്യൂഷണറി ഗാർഡ് കോർ കർശന മുന്നറിയിപ്പ് നൽകി. ഗ്രീക്ക് നിയന്ത്രണത്തിലുള്ള ഈ കപ്പലിനുനേരെ വെടിവെപ്പും റോക്കറ്റ് പ്രൊപ്പൽഡ് ഗ്രനേഡ് ആക്രമണവും ഉണ്ടായതായി സ്ഥിരീകരിച്ചിട്ടുണ്ട്. കപ്പലിന് കാര്യമായ കേടുപാടുകൾ സംഭവിച്ചു. പനാമ പതാകയുള്ള കപ്പലിന് നേരെയും ആക്രമണം ഉണ്ടായെങ്കിലും സാരമായ കേടുപാടുകൾ ഇല്ല. ജീവനക്കാർ സുരക്ഷിതരാണ്. ലൈബീരിയൻ പതാകയുള്ള മറ്റൊരു കപ്പലായ യൂഫോറിയയ്ക്ക് നേരെയും ആക്രമണം ഉണ്ടായെങ്കിലും, അത് കേടുപാടുകൾ കൂടാതെ യുഎഇയിലെ ഫുജൈറയിലേക്ക് രക്ഷപ്പെട്ടു.

ലോകത്തെ അസംസ്കൃത എണ്ണയുടെയും ദ്രവീകൃത പ്രകൃതി വാതകത്തിന്റെയും 20 ശതമാനവും വ്യാപാരം നടക്കുന്നത് ഹോർമുസ് കടലിടുക്ക് വഴിയാണ്. അതിനാൽ, മേഖലയിലെ ഈ സൈനിക നീക്കം ആഗോള ഇന്ധന വിപണിയെയും സുരക്ഷയെയും സാരമായി ബാധിക്കുമെന്ന ആശങ്ക ശക്തമാണ്.

അതേസമയം, ഉപരോധം ലംഘിക്കാൻ ശ്രമിച്ചെന്ന് ആരോപിച്ച് ഇറാനിയൻ പതാക വഹിച്ച ‘സെവിൻ’, ‘ഡോറെന’ എന്നീ സൂപ്പർടാങ്കറുകളെ യുഎസ് നാവികസേന തടഞ്ഞു. ഡോറെന എന്ന ടാങ്കറിന് യുഎസ് ഡിസ്ട്രോയർ അകമ്പടി സേവിച്ചതായും റിപ്പോർട്ടുകളുണ്ട്. ഫെബ്രുവരി 28-ലെ യുഎസ്-ഇസ്രയേലി വ്യോമാക്രമണങ്ങൾക്ക് ശേഷം ഇരുവിഭാഗവും തമ്മിൽ നാവിക ഉപരോധങ്ങൾ തുടരുന്നത് മേഖലയിൽ യുദ്ധസാഹചര്യം സൃഷ്ടിച്ചിരിക്കുകയാണ്.