കൊച്ചി: സംസ്ഥാനം കടുത്ത സാമ്പത്തിക പ്രതിസന്ധിയിലൂടെയും കടക്കെണിയിലൂടെയും കടന്നുപോകുമ്പോഴും പരസ്യങ്ങള്ക്കായി പിണറായി സര്ക്കാര് ചിലവഴിച്ചത് കോടികള്. കഴിഞ്ഞ അഞ്ചുവര്ഷത്തെ ഭരണകാലയളവില് പരസ്യങ്ങള്ക്കായി മാത്രം 203.23 കോടി രൂപയാണ് സര്ക്കാര് പൊടിച്ചത്. രണ്ടാം പിണറായി സര്ക്കാരിന്റെ നേട്ടങ്ങള് ആഘോഷിക്കാനായി ദൃശ്യ, ശ്രാവ്യ മാധ്യമങ്ങളെ കൂട്ടുപിടിച്ച് നടത്തിയ ഈ പിആര് മാമാങ്കത്തിന്റെ ഞെട്ടിക്കുന്ന കണക്കുകളാണ് ഇപ്പോള് വിവരാവകാശ രേഖകളിലൂടെ പുറത്തുവന്നിരിക്കുന്നത്.
തിരഞ്ഞെടുപ്പ് വര്ഷം റെക്കോര്ഡ് ചിലവ്
നിയമസഭാ തിരഞ്ഞെടുപ്പ് നടന്ന 2025-2026 സാമ്പത്തിക വര്ഷത്തിലാണ് ഖജനാവില് നിന്ന് ഏറ്റവും കൂടുതല് തുക പരസ്യത്തിനായി ഒഴുക്കിയത്. വിവര പൊതുജന സമ്പര്ക്ക വകുപ്പ് പുറത്തുവിട്ട കണക്കുകള് പ്രകാരം 87.07 കോടി രൂപയാണ് ഈ ഒറ്റ വര്ഷം മാത്രം ചിലവിട്ടത്. മുഖ്യമന്ത്രിയുടെയും മന്ത്രിമാരുടെയും വമ്പന് കട്ടൗട്ടുകള്ക്കും ‘പ്രോഗ്രസ് റിപ്പോര്ട്ട്’ പരസ്യങ്ങള്ക്കുമായി പണം വാരിയെറിഞ്ഞപ്പോള് സംസ്ഥാനത്തിന്റെ പൊതുകടം റെക്കോര്ഡ് ഉയരത്തിലാണെന്ന യാഥാര്ത്ഥ്യം സര്ക്കാര് വിസ്മരിച്ചു.
കണക്കുകള് ഇങ്ങനെ:-
- 2021-ല് അധികാരമേറ്റത് മുതല് 2026 മാര്ച്ച് 31 വരെയുള്ള കണക്കുകള് പരിശോധിച്ചാല് 203,23,49,976 രൂപയാണ് ആകെ ചിലവ്.
- ആദ്യ വര്ഷമായ 2021-22ല് 39.21 കോടി രൂപ ചിലവിട്ടു.
- 2022-23ല് 25.20 കോടി, 2023-24ല് 24.34 കോടി, 2024-25ല് 27.38 കോടി എന്നിങ്ങനെയായിരുന്നു ചിലവ്.
- ഇലക്ട്രോണിക് മാധ്യമങ്ങളിലെ തിളങ്ങുന്ന പരസ്യങ്ങള്ക്ക് മാത്രമായി 41.70 കോടി രൂപ മാറ്റിവെച്ചു.
- കൂടാതെ, അഞ്ചുവര്ഷത്തെ ടെന്ഡര് പരസ്യങ്ങള്ക്കായി മാത്രം 54 കോടിയിലധികം രൂപ വേറെയും ചിലവാക്കി. കാസര്ഗോഡ് സ്വദേശി എ.എ. മുഹമ്മദ് അഷ്റഫിന് ലഭിച്ച വിവരാവകാശ മറുപടിയിലാണ് ഈ വിവരങ്ങളുള്ളത്.
കേരളം എങ്ങനെ കടക്കാരനായി?
ക്ഷേമ പെന്ഷനുകള് മുടങ്ങുകയും വികസന പ്രവര്ത്തനങ്ങള് സാമ്പത്തിക പ്രതിസന്ധിയില് തട്ടി നില്ക്കുകയും ചെയ്യുമ്പോഴാണ് സര്ക്കാരിന്റെ ഈ ധൂര്ത്ത്. ശമ്പളവും പെന്ഷനും നല്കാന് പോലും കേന്ദ്രത്തിന്റെ കടമെടുപ്പ് പരിധിയിലേക്ക് ഉറ്റുനോക്കുന്ന കേരളം, കിട്ടുന്ന പണം ജനക്ഷേമത്തിന് ഉപയോഗിക്കുന്നതിന് പകരം ഇമേജ് ബില്ഡിംഗിനായി വിനിയോഗിക്കുന്നു എന്ന ആക്ഷേപം ഇതോടെ ശക്തമാവുകയാണ്. ഓരോ മലയാളിക്ക് മേലുമുള്ള കടബാധ്യത വര്ദ്ധിക്കുമ്പോഴും ഭരണനേട്ടങ്ങള് വര്ണ്ണപ്പകിട്ടോടെ അവതരിപ്പിക്കാന് കോടികള് ചിലവഴിക്കുന്നത് രാഷ്ട്രീയ ധാര്മ്മികതയ്ക്ക് നിരക്കാത്തതാണെന്ന് പ്രതിപക്ഷം ആരോപിക്കുന്നു.
തിരഞ്ഞെടുപ്പ് വിജയത്തിനായി സര്ക്കാര് ഖജനാവ് ദുരുപയോഗം ചെയ്തു എന്ന ഗൗരവകരമായ ആരോപണത്തിലേക്കാണ് ഈ കണക്കുകള് വിരല് ചൂണ്ടുന്നത്. വരും ദിവസങ്ങളില് നിയമസഭയ്ക്കകത്തും പുറത്തും സര്ക്കാരിനെ പ്രതിക്കൂട്ടിലാക്കാന് ഈ വിവരാവകാശ രേഖകള് പ്രതിപക്ഷത്തിന് ആയുധമാകും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഇറാന്റെ സമാധാന കരാർ പരിശോധിക്കുമെന്ന് ട്രംപ്; നിലപാട് വ്യക്തമാക്കി യുഎസ് പ്രസിഡന്റ്
