തിരുവനന്തപുരം: ആഗോള ബോക്സോഫീസില് പുതിയൊരു ചരിത്രവിസ്മയത്തിന് തിരിതെളിച്ചുകൊണ്ട് മോഹന്ലാല്-ജീത്തു ജോസഫ് കൂട്ടുകെട്ടിന്റെ ‘ദൃശ്യം 3’ പ്രയാണം തുടരുകയാണ്. റിലീസ് ചെയ്ത് വെറും ഏഴു ദിവസങ്ങള് പിന്നിടുമ്പോള് ചിത്രം ആഗോളതലത്തില് 200 കോടി രൂപയുടെ ഗ്രോസ് കളക്ഷന് സ്വന്തമാക്കി കഴിഞ്ഞു. ഒരു മലയാള ചിത്രം അതിന്റെ റിലീസ് വാരത്തില് തന്നെ ഈ നേട്ടം കൈവരിക്കുന്നത് ഇതാദ്യമായാണ്. നിലവിലെ ഈ അശ്വമേധം തുടര്ന്നാല് മലയാള സിനിമാ ചരിത്രത്തിലെ സകല റെക്കോര്ഡുകളും തകര്ത്ത് ചിത്രം റെക്കോര്ഡ് വേഗത്തില് ‘300 കോടി ക്ലബ്ബില്’ മുത്തമിടുമെന്നാണ് സിനിമാ വ്യവസായ രംഗത്തെ വിദഗ്ദ്ധര് വിലയിരുത്തുന്നത്.
ലൂസിഫറിന്റെ രണ്ടാം ഭാഗമായ ‘എമ്പുരാന്’, തൊട്ടുപിന്നാലെയെത്തിയ ‘തുടരും’ എന്നീ ചിത്രങ്ങള്ക്ക് ശേഷം 200 കോടി ക്ലബ്ബില് ഇടം നേടുന്ന മൂന്നാമത്തെ മോഹന്ലാല് ചിത്രമായി ദൃശ്യം 3 മാറിയിരിക്കുകയാണ്. ബോക്സോഫീസില് മോഹന്ലാല് എന്ന ബ്രാന്ഡിന്റെ അപ്രമാദിത്വം അടിവരയിടുന്നതാണ് ഈ നേട്ടം. കേവലം ഒരു തരംഗത്തിനപ്പുറം, ദൃശ്യം 3-നെ 300 കോടി എന്ന മാന്ത്രിക സംഖ്യയിലേക്ക് നയിക്കുന്ന കൃത്യമായ ചില ഘടകങ്ങളുണ്ട്. റിലീസ് ചെയ്ത എല്ലാ കേന്ദ്രങ്ങളിലും ആദ്യ ദിനം മുതല്ക്കേ അസാധാരണമായ തിരക്കാണ് അനുഭവപ്പെടുന്നത്. വെറും ഒരാഴ്ച കൊണ്ട് 200 കോടി കടന്ന സ്ഥിതിക്ക്, വരും ദിവസങ്ങളിലെ വാരാന്ത്യ കളക്ഷന് കൂടി ചേരുമ്പോള് 300 കോടിയിലേക്കുള്ള ദൂരം വളരെ എളുപ്പത്തില് മറികടക്കാനാകും എന്നാണ് ട്രേഡ് അനലിസ്റ്റുകള് സൂചിപ്പിക്കുന്നത്.
അഭൂതപൂര്വ്വമായ തിയേറ്റര് കൗണ്ടാണ് ചിത്രത്തിന്റെ മറ്റൊരു പ്രധാന കരുത്ത്. കേരളത്തില് മാത്രം 465 സ്ക്രീനുകളിലും, ആഗോളതലത്തില് 3000-ല് പരം സ്ക്രീനുകളിലുമാണ് ചിത്രം നിലവില് പ്രദര്ശിപ്പിക്കുന്നത്. ജി.സി.സി, നോര്ത്ത് അമേരിക്ക, യൂറോപ്പ് മാര്ക്കറ്റുകളില് റീ-റണ്ണുകളും എക്സ്ട്രാ ഷോകളും ചാര്ട്ട് ചെയ്യപ്പെടുന്നത് വരും ദിവസങ്ങളില് കളക്ഷന് കുത്തനെ ഉയര്ത്താന് സഹായിക്കും. ഇതിനെല്ലാമുപരി ‘ദൃശ്യം’ എന്ന ഫ്രാഞ്ചൈസിയുടെ ഏറ്റവും വലിയ കരുത്ത് കുടുംബപ്രേക്ഷകരാണ്. മോഹന്ലാലിന്റെ വിസ്മയിപ്പിക്കുന്ന പ്രകടനവും ജീത്തു ജോസഫിന്റെ ഇമോഷനല്-ത്രില്ലര് മേക്കിംഗും ഒരുപോലെ ഒത്തിണങ്ങിയതോടെ തിയേറ്ററുകളിലേക്ക് കുടുംബങ്ങള് കൂട്ടത്തോടെ ഒഴുകിയെത്തുകയാണ്. തിയേറ്ററുകളില് നിന്ന് മികച്ച പ്രതികരണം ലഭിച്ചതും, ‘റിപ്പീറ്റ് വാല്യൂ’ (സിനിമ വീണ്ടും കാണാനുള്ള പ്രേരണ) ഉള്ളതും ചിത്രത്തിന് വരും വാരങ്ങളിലും വലിയ തോതില് അനുകൂലമാകും.
ചിത്രം 200 കോടി ക്ലബ്ബില് കയറിയതിന്റെ ഔദ്യോഗിക പോസ്റ്റര് പങ്കുവെച്ചുകൊണ്ട് നായകന് മോഹന്ലാല് സോഷ്യല് മീഡിയയില് കുറിച്ച വാക്കുകള് ആരാധകര് ഹൃദയത്തോടാണ് ചേര്ത്തത്. ‘മൂന്ന് സിനിമകള്. മൂന്ന് അധ്യായങ്ങള്. അഭേദ്യമായ ഒരു ബന്ധം. ജോര്ജ്ജ്കുട്ടിക്കും കുടുംബത്തിനും ഒപ്പമുണ്ടായിരുന്നതിന് നന്ദി,’ എന്നാണ് താരം കുറിച്ചത്. മേയ് മാസത്തില് മോഹന്ലാലിന്റെ പിറന്നാള് സമ്മാനമായാണ് ‘ദൃശ്യം 3’ തിയേറ്ററുകളിലെത്തിയത്. ആരാധകരുടെ പ്രതീക്ഷകള്ക്ക് ഒട്ടും മങ്ങലേല്പ്പിക്കാത്ത തരത്തില്, ജോര്ജുകുട്ടിയുടെയും കുടുംബത്തിന്റെയും കഥ പൂര്ണ്ണതയിലെത്തിക്കാന് ജീത്തു ജോസഫിന് സാധിച്ചുവെന്നാണ് തിയേറ്ററുകളില് നിന്നുള്ള പ്രതികരണങ്ങള് വ്യക്തമാക്കുന്നത്.
മലയാള സിനിമാ ചരിത്രത്തെ ‘ദൃശ്യത്തിന് മുന്പും പിന്പും’ എന്ന് വിശേഷിപ്പിക്കാവുന്ന തരത്തിലാണ് ഈ ഫ്രാഞ്ചൈസിയുടെ വളര്ച്ച. 2013-ല് പുറത്തിറങ്ങിയ ദൃശ്യം ഒന്നാം ഭാഗം മലയാള സിനിമയില് ആദ്യമായി 50 കോടി ക്ലബ്ബ് തുറന്ന ചിത്രമായിരുന്നു. ജോര്ജുകുട്ടിയും കുടുംബവും പ്രേക്ഷകരുടെ മനസ്സില് ആഴത്തില് ഇടംപിടിച്ചത് അവിടെയാണ്. തുടര്ന്ന് എട്ട് വര്ഷങ്ങള്ക്ക് ശേഷം, കോവിഡിന്റെ മൂര്ദ്ധന്യാവസ്ഥയില് 2021-ലാണ് ‘ദൃശ്യം 2’ പ്രേക്ഷകര്ക്ക് മുന്നിലെത്തുന്നത്. തിയേറ്ററുകള് അടഞ്ഞുകിടന്ന ആ സാഹചര്യത്തില് ഒടിടി (ഛഠഠ) പ്ലാറ്റ്ഫോമില് നേരിട്ട് റിലീസ് ചെയ്യേണ്ടി വന്നിട്ടും ആഗോളതലത്തില് ഈ ചിത്രം സൃഷ്ടിച്ച ചലനങ്ങളും ചര്ച്ചകളും ചെറുതല്ലായിരുന്നു.
എന്നാല് 2026-ല് മൂന്നാം ഭാഗം തിയേറ്ററുകളിലേക്ക് നേരിട്ടെത്തിയപ്പോള് അത് വലിയൊരു ഉത്സവമായി മാറുകയായിരുന്നു. മുന്പ് ഒടിടിയിലൂടെ ദൃശ്യം 2 കണ്ട ജനലക്ഷങ്ങളെക്കൂടി തിയേറ്ററുകളിലേക്ക് ആകര്ഷിച്ചുകൊണ്ട് മലയാള സിനിമയിലെ ഏറ്റവും വലിയ ബോക്സോഫീസ് വേട്ടയ്ക്കാണ് ദൃശ്യം 3 വഴിതുറന്നിരിക്കുന്നത്. മോഹന്ലാലിനൊപ്പം മീന, എസ്തര് അനില്, അന്സിബ, സിദ്ദിഖ്, ആശാ ശരത്, മുരളി ഗോപി എന്നിവര് വീണ്ടും ഒന്നിച്ച ഈ ചിത്രം, വരും ദിവസങ്ങളില് തന്നെ 300 കോടി ക്ലബ്ബില് ഇടംപിടിച്ച് മലയാള സിനിമയുടെ ആഗോള വിപണി സാധ്യതകളെ പുതിയ ഉയരങ്ങളിലേക്ക് നയിക്കുമെന്ന് ഉറപ്പാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
കാറപകടത്തിൽ നടി ഹർഷിൽ കാലിയ അന്തരിച്ചു: നിയന്ത്രണം വിട്ട കാർ ഡിവൈഡറിലിടിച്ചു മറിഞ്ഞു
