ചങ്ങനാശ്ശേരി: കവിയും സംവിധായകനുമായ ശ്രീകുമാരന് തമ്പി പറവൂരിലെ സ്വീകരണ വേദിയില് നായര് സര്വീസ് സൊസൈറ്റിക്കും ജനറല് സെക്രട്ടറി ജി. സുകുമാരന് നായര്ക്കുമെതിരെ നടത്തിയ കടുത്ത പരാമര്ശങ്ങള്ക്ക് പിന്നില് മുഖ്യമന്ത്രി വി.ഡി. സതീശന്റെ ഗൂഢാലോചനയെന്ന് എന്.എസ്.എസ്. നേതൃത്വം സംശയിക്കുന്നു. മുഖ്യമന്ത്രിയുടെ സ്വന്തം തട്ടകമായ പറവൂരില് വെച്ച്, അദ്ദേഹത്തെ വേദിയിലിരുത്തി എന്.എസ്.എസ്. ജനറല് സെക്രട്ടറിയെ ‘രാജാവായി പെരുമാറുന്നവന്’ എന്ന് ആക്ഷേപിച്ചതിന് പിന്നില് കൃത്യമായ രാഷ്ട്രീയ തിരക്കഥയുണ്ടെന്നാണ് പെരുന്നയുടെ വിലയിരുത്തല്. ഈ സാഹചര്യത്തില് മുഖ്യമന്ത്രി വി.ഡി. സതീശനുമായും അദ്ദേഹത്തിന്റെ സര്ക്കാരുമായും ഇനി യാതൊരുവിധ സഹകരണവുമില്ലെന്ന കടുത്ത നിലപാടിലേക്ക് എന്.എസ്.എസ്. നീങ്ങുകയാണ്.
സംഭവിച്ച കാര്യങ്ങളിലെ അതൃപ്തിയും വി.ഡി. സതീശന്റെ നിലപാടുകളോടുള്ള വിയോജിപ്പും കോണ്ഗ്രസ് ഹൈക്കമാന്ഡിനെ പരോക്ഷമായി അറിയിക്കാനും എന്.എസ്.എസ്. നേതൃത്വം കരുക്കള് നീക്കുന്നുണ്ട്. യു.ഡി.എഫ്. സര്ക്കാരുമായി പൂര്ണ്ണമായ അകലം പാലിക്കാനാണ് സമുദായ സംഘടനയുടെ തീരുമാനം. മുന്നണിയെ അധികാരത്തിലേറ്റാന് സമുദായം നല്കിയ പിന്തുണയെ തള്ളിപ്പറയുന്ന തരത്തിലാണ് മുഖ്യമന്ത്രിയുടെ സാന്നിധ്യത്തില് ഇത്തരം വിമര്ശനങ്ങള് ഉയര്ന്നതെന്നാണ് എന്.എസ്.എസിന്റെ ആക്ഷേപം.
ഈ പെട്ടെന്നുള്ള പ്രകോപനത്തിന് പിന്നില് കൃത്യമായ മുന്കാല രാഷ്ട്രീയ കാരണങ്ങളുണ്ടെന്നാണ് എന്.എസ്.എസ്. കേന്ദ്രങ്ങള് വിശ്വസിക്കുന്നത്. ഉമ്മന് ചാണ്ടിയുടെ വിയോഗത്തിന് ശേഷം കേരളത്തില് യു.ഡി.എഫ്. അധികാരത്തില് വന്നാല് രമേശ് ചെന്നിത്തലയാണ് മുഖ്യമന്ത്രിയാകാന് ഏറ്റവും കൂടുതല് യോഗ്യന് എന്ന നിലപാടിലായിരുന്നു ജി. സുകുമാരന് നായര്. ഇക്കാര്യം അദ്ദേഹം മുന്പ് പരസ്യമായി പ്രകടിപ്പിക്കുകയും ചെയ്തിരുന്നു. ചെന്നിത്തലയോട് എന്.എസ്.എസ്. കാണിച്ച ഈ പരസ്യമായ കൂറാണ് വി.ഡി. സതീശനെ പ്രകോപിപ്പിച്ചതെന്നും, അതിന്റെ പ്രതിഫലനമാണ് ഇപ്പോള് ശ്രീകുമാരന് തമ്പിയെപ്പോലൊരു മുതിര്ന്ന വ്യക്തിത്വത്തിലൂടെ പുറത്തുവന്നതെന്നുമാണ് സംഘടന വിലയിരുത്തുന്നത്.
പറവൂരിലെ വേദിയില് വെച്ച് മന്നത്ത് പത്മനാഭന്റെ ആശയങ്ങളെ ഓര്മ്മിപ്പിച്ചായിരുന്നു ശ്രീകുമാരന് തമ്പിയുടെ വിമര്ശനം. ‘നായര് ഭൃത്യ ജന സംഘം’ എന്ന പേരില് സമുദായത്തെ സേവിക്കാന് തുടങ്ങിയ സംഘടനയുടെ കസേരയിലിരിക്കുന്ന ഉന്നതന് ഇപ്പോള് സമുദായ ഭൃത്യനായല്ല, മറിച്ച് രാജാവിനെപ്പോലെയാണ് പെരുമാറുന്നതെന്ന് തമ്പി കുറ്റപ്പെടുത്തിയിരുന്നു. ഈ കടുത്ത പരാമര്ശങ്ങള് മുഖ്യമന്ത്രിയെ പ്രീതിപ്പെടുത്താന് വേണ്ടി ബോധപൂര്വ്വം തയ്യാറാക്കിയതാണെന്നാണ് പെരുന്നയുടെ ആരോപണം.
നേതാക്കന്മാരല്ല ജനങ്ങളാണ് മുന്നില് നില്ക്കേണ്ടതെന്ന് ഓര്മ്മിപ്പിച്ച ശ്രീകുമാരന് തമ്പി, വി.ഡി. സതീശന് ഈ സത്യം കൃത്യമായി മനസ്സിലാക്കുന്ന വ്യക്തിയാണെന്ന് പ്രശംസിക്കുകയും ചെയ്തിരുന്നു. പുതിയ മുഖ്യമന്ത്രിയായ വി.ഡി. സതീശനെക്കുറിച്ച് തനിക്ക് ഒട്ടേറെ പ്രതീക്ഷകളുണ്ടെന്നും അദ്ദേഹം വിജയശ്രീലാളിതനാകട്ടെയെന്നും തമ്പി ആശംസിച്ചപ്പോള് മുഖ്യമന്ത്രി അത് തടയാന് ശ്രമിച്ചില്ലെന്നത് എന്.എസ്.എസിനെ കൂടുതല് ചൊടിപ്പിച്ചു.
തങ്ങളെ പരസ്യമായി അപമാനിക്കാന് മുഖ്യമന്ത്രിയുടെ ആസ്ഥാനത്ത് തന്നെ വേദിയൊരുങ്ങിയത് എന്.എസ്.എസ്. നേതൃത്വത്തിന് വന് തിരിച്ചടിയായിട്ടുണ്ട്. സമുദായ നേതാവിനെ വ്യക്തിപരമായി അധിക്ഷേപിക്കുന്ന പ്രസംഗം നടന്നിട്ടും മുഖ്യമന്ത്രി വി.ഡി. സതീശന് അതിനെ തിരുത്താനോ തള്ളിപ്പറയാനോ തയ്യാറാകാത്തത് ഗൂഢാലോചനയുടെ ആഴം കൂട്ടുന്നുവെന്നാണ് എന്.എസ്.എസ്. കരുതുന്നത്.
കോണ്ഗ്രസിനുള്ളിലെ ഗ്രൂപ്പ് സമവാക്യങ്ങളില് വി.ഡി. സതീശന് വിരുദ്ധ ചേരിക്ക് കരുത്തുപകരുന്ന നിലപാടായിരുന്നു എന്.എസ്.എസ്. എക്കാലത്തും സ്വീകരിച്ചിരുന്നത്. ചെന്നിത്തലയെ ഒതുക്കി സതീശന് മുഖ്യമന്ത്രി കസേരയിലെത്തിയതു മുതല് പെരുന്നയുമായി അത്ര നല്ല ബന്ധത്തിലല്ലായിരുന്ന സര്ക്കാര്, ഈ സംഭവത്തോടെ പൂര്ണ്ണമായും എന്.എസ്.എസുമായി യുദ്ധപ്രഖ്യാപനം നടത്തിയിരിക്കുകയാണ്.
എന്.എസ്.എസ്. വര്ഗ്ഗീയതയുടെ ചിഹ്നമല്ലെന്ന് തമ്പി പറയുമ്പോഴും, സംഘടനയെ തകര്ക്കാന് ശ്രമിക്കുന്ന രാഷ്ട്രീയ ശക്തികള്ക്ക് കൂട്ടുനില്ക്കുന്ന നിലപാടാണ് ഒരു വിഭാഗം സാംസ്കാരിക നായകര് സ്വീകരിക്കുന്നതെന്നാണ് സമുദായ അനുഭാവികളുടെ വാദം. സര്ക്കാരിന്റെ തണലില് എന്.എസ്.എസിനെ ഒതുക്കാമെന്ന് ആരും കരുതേണ്ടതില്ലെന്ന ശക്തമായ മുന്നറിയിപ്പാണ് വരും ദിവസങ്ങളില് പെരുന്നയില് നിന്നും ഉണ്ടാകുക.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
Also Read
കേരള പിഎസ്സി ആസ്ഥാനത്ത് കോടികളുടെ നിർമ്മാണ പ്രവർത്തനങ്ങൾ; കണക്കുകൾ കണ്ട് അന്തംവിട്ട് ഉദ്യോഗസ്ഥർ
കേരള പിഎസ്സി ആസ്ഥാനത്ത് കോടികളുടെ നിർമ്മാണ പ്രവർത്തനങ്ങൾ; കണക്കുകൾ കണ്ട് അന്തംവിട്ട് ഉദ്യോഗസ്ഥർ
