കണ്ണൂര്: സിപിഎം തരംതാഴ്ത്തിയ കണ്ണൂര് ജില്ലാ പഞ്ചായത്ത് മുന് പ്രസിഡന്റ് പി.പി. ദിവ്യയുടെ രാഷ്ട്രീയ ഭാവി തുലാസിലാവുന്നു. പാര്ട്ടിക്കുള്ളിലെ കടുത്ത നടപടികളില് അതൃപ്തയായ ദിവ്യ ബിജെപി ഉള്പ്പെടെയുള്ള മുന്നണികളുമായി ആശയവിനിമയം നടത്തിയെന്ന് റിപ്പോര്ട്ടുകളുണ്ടെങ്കിലും പ്രവേശനം അസാധ്യമാണെന്ന സൂചനകളാണ് പുറത്തുവരുന്നത്. ക്രിമിനല് കേസില് പ്രതിയായ ഒരാളെ പാര്ട്ടിയിലെടുക്കുന്നത് ഗുണത്തേക്കാളേറെ ദോഷം ചെയ്യുമെന്ന വിലയിരുത്തലിലാണ് ബിജെപി സംസ്ഥാന നേതൃത്വം.
ചില ബിജെപി നേതാക്കള് ദിവ്യയുമായി പ്രാഥമിക ചര്ച്ചകള് നടത്തിയതായാണ് വിവരം. എന്നാല്, എഡിഎം നവീന് ബാബുവിന്റെ മരണവുമായി ബന്ധപ്പെട്ട വൈകാരികമായ കേസില് പ്രതിയായ ഒരാളെ സ്വീകരിക്കുന്നത് പാര്ട്ടിയുടെ പ്രതിച്ഛായയ്ക്ക് മങ്ങലേല്പ്പിക്കുമെന്ന് കേന്ദ്ര നേതൃത്വവും മുന്നറിയിപ്പ് നല്കി. കോണ്ഗ്രസ് നേരത്തെ തന്നെ നവീന് ബാബുവിന്റെ കുടുംബത്തിനൊപ്പം നിലയുറപ്പിച്ചതിനാല് ആ വഴിയും പൂര്ണ്ണമായും അടഞ്ഞു. വരാനിരിക്കുന്ന നിയമസഭാ തിരഞ്ഞെടുപ്പുകളില് മത്സരിക്കാനുള്ള യോഗ്യത ദിവ്യയ്ക്ക് നഷ്ടമായ സാഹചര്യത്തില്, രാഷ്ട്രീയ അതിജീവനത്തിനായി അവര് സകല സാധ്യതകളും തേടുന്നുണ്ട്.
അതേസമയം, സിപിഎമ്മിനുള്ളിലെ ഇരട്ടത്താപ്പാണ് ഇപ്പോള് അണികള്ക്കിടയിലെ പ്രധാന ചര്ച്ചാവിഷയം. ശബരിമലയിലെ സ്വര്ണ്ണക്കൊള്ളക്കേസില് പ്രതിയായി ജയിലില് കഴിയുന്ന തിരുവിതാംകൂര് ദേവസ്വം ബോര്ഡ് മുന് പ്രസിഡന്റ് എ. പത്മകുമാറിനെതിരെ ഇതുവരെ ഒരു അച്ചടക്ക നടപടിയും പാര്ട്ടി എടുത്തിട്ടില്ല. സ്വര്ണ്ണക്കൊള്ള ക്രിമിനല് കുറ്റമല്ലേ എന്ന ചോദ്യമാണ് ദിവ്യയെ പിന്തുണയ്ക്കുന്നവര് ഉയര്ത്തുന്നത്. ജയിലില് കിടക്കുന്ന പത്മകുമാര് ഇപ്പോഴും പാര്ട്ടി അംഗമായി തുടരുമ്പോള്, ജാമ്യം കിട്ടിയ ദിവ്യയെ ബ്രാഞ്ച് കമ്മിറ്റിയിലേക്ക് നാടുകടത്തുകയും മഹിളാ അസോസിയേഷനില് നിന്ന് പുറത്താക്കുകയും ചെയ്തത് ഇരട്ടനീതിയാണെന്നാണ് വിമര്ശനം.
മഹിളാ അസോസിയേഷന് യോഗത്തില് എം.വി. ഗോവിന്ദന് നേരിട്ടെത്തിയാണ് ദിവ്യയെ വെട്ടിയത്. ക്രിമിനല് കേസില് പെട്ടവര് വേണ്ടെന്ന കര്ശന നിര്ദ്ദേശം നല്കിയ അദ്ദേഹം, ഇക്കാര്യത്തില് ചര്ച്ചകള് പോലും അനുവദിച്ചില്ല. ആന്തൂര് കേസില് പി.കെ. ശ്യാമളയെ സംരക്ഷിച്ച പാര്ട്ടി, ദിവ്യയെ മാത്രം ബലികൊടുക്കുന്നത് സ്വര്ണ്ണക്കൊള്ളക്കേസിലെ ഉന്നതരെ സംരക്ഷിക്കാനുള്ള നീക്കമാണോ എന്നും സംശയമുയരുന്നുണ്ട്. പത്മകുമാറിനെതിരെ നടപടിയെടുത്താല് പത്തനംതിട്ടയിലെ പല പ്രമുഖരുടെയും പേരുകള് പുറത്തുവരുമെന്ന പേടിയാണ് പാര്ട്ടിക്കെന്ന ആക്ഷേപം ശക്തമാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
‘കമ്മ്യൂണിസ്റ്റ് പാര്ട്ടി എന്നത് ഇപ്പോള് പേരില് മാത്രമായി ഒതുങ്ങി’; വി.എസ്സിന്റെ മനസാക്ഷി സൂക്ഷിപ്പുകാരന് ഇനി മലമ്പുഴയില് ‘കൈപ്പത്തി’യേന്തും; കോണ്ഗ്രസ് പ്രവേശനം സ്ഥിരീകരിച്ച് എ. സുരേഷ്; സി.പി.എമ്മിനെതിരെ കടുത്ത വിമര്ശനം
