എഡിഎം നവീൻ ബാബുവിന്റെ മരണം: പി.പി. ദിവ്യയുടെ ഫോൺ വിവരങ്ങൾ ശേഖരിക്കണം; ഭാഗികമായി തുടരന്വേഷണത്തിന് ഉത്തരവിട്ട് കോടതി

കണ്ണൂർ: എഡിഎം നവീൻ ബാബുവിന്റെ മരണവുമായി ബന്ധപ്പെട്ട കേസിൽ പോലീസിന്റെ കുറ്റപത്രത്തിലെ പഴുതുകൾ ചൂണ്ടിക്കാട്ടി കുടുംബം സമർപ്പിച്ച ഹർജിയിൽ തലശ്ശേരി അഡീഷണൽ ജില്ലാ സെഷൻസ് കോടതിയുടെ നിർണ്ണായക ഉത്തരവ്. കേസിൽ ഭാഗികമായ തുടരന്വേഷണത്തിന് ഉത്തരവിട്ട കോടതി, മെയ് 30-നകം അന്തിമ റിപ്പോർട്ട് സമർപ്പിക്കാൻ അന്വേഷണസംഘത്തിന് നിർദ്ദേശം നൽകി.

ഫോൺ വിവരങ്ങൾ: കേസിലെ ഒന്നാം പ്രതിയായ പി.പി. ദിവ്യയുടെ ഔദ്യോഗിക ഫോണിന്റെ കോൾ ഡാറ്റാ റെക്കോർഡുകൾ ശേഖരിക്കാനും പരിശോധിക്കാനും കോടതി ഉത്തരവിട്ടു. നേരത്തെ പോലീസ് നൽകിയ റിപ്പോർട്ടിൽ ചുരുങ്ങിയ ദിവസത്തെ വിവരങ്ങൾ മാത്രമേ ഉണ്ടായിരുന്നുള്ളൂ എന്ന പരാതി പരിഗണിച്ചാണിത്.

 കുടുംബം ഉന്നയിച്ച 13 കാര്യങ്ങളിൽ നാല് പ്രധാന വിഷയങ്ങളിൽ തുടരന്വേഷണം വേണമെന്ന് കോടതി നിർദ്ദേശിച്ചു. ഇതിൽ പരാതിക്കാരനായ പ്രശാന്തനും നവീൻ ബാബുവും തമ്മിലുള്ള കൂടിക്കാഴ്ച, പണം നൽകാൻ പ്രശാന്തൻ സ്വർണ്ണപ്പണയം വെച്ചു എന്ന വാദം എന്നിവയിലെ സത്യാവസ്ഥ പരിശോധിക്കലും ഉൾപ്പെടുന്നു.മെയ് 30-നകം ഈ അന്വേഷണങ്ങൾ പൂർത്തിയാക്കി റിപ്പോർട്ട് സമർപ്പിക്കാനാണ് കോടതി നിർദ്ദേശം.

2024 ഒക്ടോബർ 15-നാണ് കണ്ണൂർ എഡിഎമ്മും പത്തനംതിട്ട സ്വദേശിയുമായ നവീൻ ബാബുവിനെ പള്ളിക്കുന്നിലെ ക്വാർട്ടേഴ്സിൽ തൂങ്ങിമരിച്ച നിലയിൽ കണ്ടെത്തിയത്. യാത്രയയപ്പ് യോഗത്തിൽ ജില്ലാ പഞ്ചായത്ത് പ്രസിഡന്റായിരുന്ന പി.പി. ദിവ്യ ക്ഷണിക്കപ്പെടാതെ വരികയും പെട്രോൾ പമ്പിന് അനുമതി നൽകുന്നതിൽ നവീൻ ബാബു അഴിമതി നടത്തിയെന്ന് പരസ്യമായി ആരോപിക്കുകയും ചെയ്തിരുന്നു. ഈ അപമാനത്തിൽ മനംനൊന്താണ് അദ്ദേഹം ആത്മഹത്യ ചെയ്തതെന്നാണ് കേസ്.

പോലീസിന്റെ ആദ്യ അന്വേഷണം അപൂർണ്ണമാണെന്നും ദിവ്യയെ സഹായിക്കാനാണ് പോലീസ് ശ്രമിക്കുന്നതെന്നും കാട്ടി നവീൻ ബാബുവിന്റെ ഭാര്യ മഞ്ജുഷയാണ് കോടതിയെ സമീപിച്ചത്. സിബിഐ അന്വേഷണം വേണമെന്ന ആവശ്യം മുൻപ് സുപ്രീം കോടതി തള്ളിയിരുന്നുവെങ്കിലും, ജില്ലാ കോടതിയുടെ പുതിയ ഉത്തരവ് നവീൻ ബാബുവിന്റെ കുടുംബത്തിന് വലിയ ആശ്വാസമാണ് നൽകുന്നത്.