തിരുവനന്തപുരം: ശബരിമലയിലെ പവിത്രമായ ശ്രീകോവില് വാതിലില് നിന്ന് സ്വര്ണ്ണം മോഷ്ടിച്ച കേസില് വമ്പന് സ്രാവുകളുടെ പങ്ക് വെളിവാകുന്നു. മുന് ദേവസ്വം ബോര്ഡ് പ്രസിഡന്റ് എ. പത്മകുമാര്, മുന് കമ്മീഷണര് എന്. വാസു, തിരുവാഭരണം കമ്മീഷണര് കെ.എസ്. ബൈജു എന്നിവരടക്കം എട്ടുപേര് കൃത്യമായ ആസൂത്രണത്തിലൂടെയാണ് തട്ടിപ്പ് നടത്തിയതെന്ന് ക്രൈംബ്രാഞ്ചിന്റെ പ്രത്യേക അന്വേഷണ സംഘം കണ്ടെത്തി. ക്ഷേത്ര സ്വത്തുക്കള് സംരക്ഷിക്കാന് നിയുക്തരായ ഉന്നത ഉദ്യോഗസ്ഥര് തന്നെ പ്രതികളുമായി കൈകോര്ത്ത് നിയമവിരുദ്ധമായി പണം സമ്പാദിക്കാന് ശ്രമിച്ചുവെന്നാണ് കോടതിയില് സമര്പ്പിച്ച റിപ്പോര്ട്ട് വ്യക്തമാക്കുന്നത്.
വന്ദേ ഭാരതിനേക്കാൾ വേഗത; മണിക്കൂറിൽ 220 കി.മീ വേഗതയുള്ള പുതിയ ട്രെയിനുകൾ വരുന്നു
കേസിലെ മുഖ്യപ്രതികളായ ഉണ്ണികൃഷ്ണന് പോറ്റി, പങ്കജ് ഭണ്ഡാരി, ഗോവര്ദ്ധന് റോദ്ദം എന്നിവരെ കസ്റ്റഡിയില് വാങ്ങി മുഖാമുഖം ഇരുത്തി ചോദ്യം ചെയ്യാനാണ് അന്വേഷണ ഉദ്യോഗസ്ഥരുടെ നീക്കം. വാതില് പാളികളില് നിന്ന് വേര്തിരിച്ചെടുത്ത സ്വര്ണ്ണം രാസപ്രക്രിയയിലൂടെ കട്ടകളാക്കി മാറ്റിയതായി പരിശോധനയില് തെളിഞ്ഞു. പങ്കജ് ഭണ്ഡാരിയില് നിന്ന് 109 ഗ്രാമും ഗോവര്ദ്ധന് റോദ്ദത്തില് നിന്ന് 474 ഗ്രാമിലധികം സ്വര്ണ്ണവും ഇതിനോടകം കണ്ടുകെട്ടിയിട്ടുണ്ട്. എന്നാല് കവര്ച്ച ചെയ്യപ്പെട്ട സ്വര്ണ്ണത്തിന്റെ യഥാര്ത്ഥ അളവ് ഇതിലും എത്രയോ മടങ്ങാണെന്നും, കൃത്യമായ വിവരങ്ങള് ലഭ്യമാക്കാന് വി.എസ്.എസ്.സിയിലെ ശാസ്ത്രീയ പരിശോധനാ ഫലം കാത്തിരിക്കുകയാണെന്നും പോലീസ് കോടതിയെ അറിയിച്ചു.
രേഖകളില് നടത്തിയ കൃത്രിമത്വമാണ് തട്ടിപ്പിന്റെ ആധാരമെന്ന് റിപ്പോര്ട്ട് ചൂണ്ടിക്കാട്ടുന്നു. ശ്രീകോവില് കട്ടിളയിലെ ‘സ്വര്ണ്ണം പൂശിയ ചെമ്പ് പാളികള്’ എന്ന ഔദ്യോഗിക വിവരത്തില് നിന്ന് ‘സ്വര്ണ്ണം പൂശിയ’ എന്ന വാക്ക് ബോധപൂര്വ്വം നീക്കം ചെയ്യുകയും വെറും ‘ചെമ്പ് പാളികള്’ എന്ന് തിരുത്തുകയും ചെയ്തു. 2019-ല് ദേവസ്വം കമ്മീഷണറുടെ ശുപാര്ശ പ്രകാരം ഈ പാളികള് ചെന്നൈയിലേക്ക് കടത്തിയത് ബോര്ഡ് അംഗങ്ങളുടെ പൂര്ണ്ണ അറിവോടെയാണെന്നും അന്വേഷണസംഘം പറയുന്നു.
പഴയ പാളികള് മുക്കി; ‘അച്ചുണ്ടാക്കി’ പുതിയത് വെച്ചു; ശബരിമലയില് നടന്നത് ഞെട്ടിക്കുന്ന സ്വര്ണ്ണക്കൊള്ള! എല്ലാ ശ്രദ്ധയും ഹൈക്കോടതിയിലേക്ക്; പുറത്തുള്ള കടത്തുകാര് നെട്ടോട്ടത്തില്
വാതിലിലെ ദ്വാരപാലക ശില്പങ്ങള് മാത്രമല്ല, അയ്യപ്പവിഗ്രഹത്തിന് ചുറ്റുമുള്ള പ്രഭാമണ്ഡലത്തിലെ സ്വര്ണ്ണവും പ്രതികള് അപഹരിച്ചിട്ടുണ്ട്. ശിവരൂപങ്ങളും വ്യാളികളും കൊത്തിവെച്ച പ്രഭാമണ്ഡലത്തില് നിന്നും ദശാവതാര രൂപങ്ങള് പതിച്ച പാളികളില് നിന്നും സ്വര്ണ്ണം ഇളക്കിമാറ്റി. ഏകദേശം 989 ഗ്രാം സ്വര്ണ്ണം ഇത്തരത്തില് നഷ്ടപ്പെട്ടതായാണ് പ്രാഥമിക വിലയിരുത്തല്. ശാസ്ത്രീയ പരിശോധന പൂര്ത്തിയാകുന്നതോടെ നഷ്ടത്തിന്റെ വ്യാപ്തി ഇനിയും വര്ദ്ധിച്ചേക്കും.
ചെന്നൈയിലെ ‘സ്മാര്ട്ട് ക്രിയേഷന്സ്’, ബല്ലാരിയിലെ ‘റോദ്ദം ജ്വല്ലേഴ്സ്’ എന്നീ സ്ഥാപന ഉടമകളാണ് ഈ അന്തര്സംസ്ഥാന തട്ടിപ്പിലെ പ്രധാന കണ്ണിളെന്ന് പോലീസ് കണ്ടെത്തി. 2019-ല് സ്വര്ണ്ണം പൂശാനെന്ന വ്യാജേനയാണ് പാളികള് ചെന്നൈയിലെത്തിച്ചത്. ഇതിന് കൂലിയായി പങ്കജ് ഭണ്ഡാരി ഒരു നിശ്ചിത അളവ് സ്വര്ണ്ണം കൈപ്പറ്റുകയും ബാക്കി കട്ടകളാക്കി ഗോവര്ദ്ധന് റോദ്ദത്തിന് നല്കുകയും ചെയ്തു. ഈ സ്വര്ണ്ണം പ്രതികള് പണമാക്കി മാറ്റിയതായും കണ്ടെത്തിയിട്ടുണ്ട്.
തട്ടിപ്പ് നടക്കുമ്പോള് ഒരു സ്വര്ണ്ണപ്പണിക്കാരന്റെ മേല്നോട്ടം വേണമെന്ന നിബന്ധന തിരുവാഭരണം കമ്മീഷണര് കെ.എസ്. ബൈജു മനഃപൂര്വ്വം ലംഘിച്ചു. പത്മകുമാറിന്റെയും എന്. വാസുവിന്റെയും ഒത്താശയോടെയാണ് രേഖകളില് തിരിമറി നടത്തിയതെന്ന് ക്രൈംബ്രാഞ്ച് റിപ്പോര്ട്ട് അടിവരയിടുന്നു. ഒന്നാം പ്രതി ഉണ്ണികൃഷ്ണന് പോറ്റിക്ക് ഉന്നത രാഷ്ട്രീയ ബന്ധങ്ങളുണ്ടെന്ന ആരോപണവും അന്വേഷണ പരിധിയിലുണ്ട്. ഇതിന്റെ ഭാഗമായി മുന് ദേവസ്വം മന്ത്രി കടകംപള്ളി സുരേന്ദ്രനെയും അന്വേഷണസംഘം ചോദ്യം ചെയ്തു. വിദേശയാത്രകളെക്കുറിച്ചും പ്രതികളുമായുള്ള കൂടിക്കാഴ്ചയെക്കുറിച്ചുമുള്ള ചോദ്യങ്ങള്ക്ക്, ബോര്ഡ് തീരുമാനങ്ങളില് സര്ക്കാരിന് പങ്കില്ലെന്ന മറുപടിയാണ് അദ്ദേഹം നല്കിയത്.
Disclaimer: The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
