കൽപ്പന്ത് കളിയുടെ ലോകമേളയ്ക്ക് പിന്നിൽ ദശകങ്ങളുടെ പോരാട്ടത്തിന്റെയും ദീർഘവീക്ഷണത്തിന്റെയും വലിയൊരു ചരിത്രമുണ്ട്. പത്തൊൻപതാം നൂറ്റാണ്ടിന്റെ അവസാനത്തോടെ തന്നെ ഫുട്ബോൾ ആഗോളതലത്തിൽ ജനപ്രീതി നേടിയിരുന്നു. ലോകകപ്പ് ആരംഭിക്കുന്നതിന് മുൻപ് ഒളിമ്പിക്സ് വേദിയിലായിരുന്നു പ്രധാന അന്താരാഷ്ട്ര മത്സരങ്ങൾ നടന്നിരുന്നത്. എന്നാൽ ഒളിമ്പിക്സ് ‘അമച്വർ’ താരങ്ങൾക്ക് മാത്രമുള്ള വേദിയായതിനാൽ പ്രൊഫഷണൽ താരങ്ങൾക്കായി ഒരു സ്വതന്ത്ര ടൂർണമെന്റ് വേണമെന്ന ചിന്ത ശക്തമായി.
ഫുട്ബോളിനെ നിയന്ത്രിക്കാൻ 1904 മെയ് 21-ന് പാരീസിൽ വെച്ച് ‘ഫിഫ’ രൂപീകൃതമായി. ഫ്രാൻസ്, ബെൽജിയം, ഡെന്മാർക്ക്, നെതർലാൻഡ്സ്, സ്പെയിൻ, സ്വീഡൻ, സ്വിറ്റ്സർലൻഡ് എന്നീ ഏഴ് രാജ്യങ്ങളാണ് ഇതിന് മുൻകൈ എടുത്തത്. ഫിഫയുടെ മൂന്നാമത്തെ പ്രസിഡന്റായ യൂൾസ് റിമെയുടെ ദീർഘവീക്ഷണമാണ് സ്വന്തമായി ഒരു ലോകകപ്പ് എന്ന ആശയത്തെ യാഥാർത്ഥ്യമാക്കിയത്. ഒടുവിൽ തുടർച്ചയായി രണ്ട് ഒളിമ്പിക്സ് സ്വർണം നേടിയ കരുത്തുമായി ഉറുഗ്വേ ആദ്യ ലോകകപ്പിന് ആതിഥേയത്വം വഹിക്കാൻ തിരഞ്ഞെടുക്കപ്പെട്ടു.
അങ്ങനെ 1930-ൽ ഉറുഗ്വേയുടെ മണ്ണിൽ ആദ്യ ലോകകപ്പിന്റെ പന്തുരുണ്ടു. യാത്രച്ചെലവ് കൂടുതലായിരുന്നിട്ടും 4 യൂറോപ്യൻ ടീമുകൾ ഉൾപ്പെടെ ആകെ 13 രാജ്യങ്ങൾ ആദ്യ ടൂർണമെന്റിൽ മാറ്റുരച്ചു. ഫ്രാൻസിന്റെ ലൂസിയൻ ലോറന്റ് ലോകകപ്പ് ചരിത്രത്തിലെ ആദ്യ ഗോൾ നേടി. ആവേശകരമായ ഫൈനലിൽ അർജന്റീനയെ 4–2 ന് തോൽപ്പിച്ച് ആതിഥേയരായ ഉറുഗ്വേ കന്നി കിരീടം ചൂടി.
പിന്നീട് ലോകകപ്പ് അതിവേഗം വളർന്നു. 1934-ൽ ഇറ്റലിയിൽ നടന്ന രണ്ടാം ലോകകപ്പ് മുതൽ യോഗ്യതാ മത്സരങ്ങൾ ആരംഭിച്ചു. എന്നാൽ രണ്ടാം ലോകമഹായുദ്ധം കാരണം 1942, 1946 വർഷങ്ങളിൽ ലോകകപ്പ് നടന്നില്ല. 12 വർഷത്തെ ഇടവേളയ്ക്ക് ശേഷം 1950-ൽ ബ്രസീലിലാണ് പിന്നീട് കളി പുനരാരംഭിച്ചത്. ഫുട്ബോളിന്റെ ജനപ്രീതി വർദ്ധിച്ചതോടെ ഫൈനൽ റൗണ്ടിലെ ടീമുകളുടെ എണ്ണവും ഫിഫ ഉയർത്തി.
ലോകകപ്പിൽ പങ്കെടുത്ത ടീമുകളുടെ വളർച്ച ഇങ്ങനെയാണ്:
1934 മുതൽ 1978 വരെ: 16 ടീമുകൾ
1982 മുതൽ: 24 ടീമുകൾ
1998 മുതൽ: 32 ടീമുകൾ
2026 ൽ : 48 ടീമുകൾ
ആദ്യകാലങ്ങളിൽ വിജയികൾക്ക് നൽകിയിരുന്ന ട്രോഫി യൂൾസ് റിമെയോടുള്ള ബഹുമാനാർത്ഥം ‘യൂൾസ് റിമെ കപ്പ്’ എന്നാണ് അറിയപ്പെട്ടിരുന്നത്. 1970-ൽ മൂന്നാം തവണയും കപ്പടിച്ച ബ്രസീലിന് ഈ ട്രോഫി സ്ഥിരമായി നൽകുകയും, 1974 മുതൽ പുതിയ ഫിഫ ലോകകപ്പ് ട്രോഫി നിലവിൽ വരികയും ചെയ്തു.
യൂറോപ്പിലും തെക്കേ അമേരിക്കയിലുമായി ഒതുങ്ങിനിന്നിരുന്ന ലോകകപ്പ് ഇന്ന് എല്ലാ ഭൂഖണ്ഡങ്ങളും കീഴടക്കി യഥാർത്ഥ ആഗോള മേളയായി മാറിയിരിക്കുന്നു. റീചാർജ് ചെയ്യാവുന്ന സ്മാർട്ട് പന്തുകളും വാർ (VAR) സിസ്റ്റവുമെല്ലാം ഇന്ന് കളിയുടെ ഭാഗമാണ്. യു.എസ്.എ, കാനഡ, മെക്സിക്കോ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്ന ഇത്തവണത്തെ ലോകകപ്പിൽ ചരിത്രത്തിലാദ്യമായി 48 ടീമുകളാണ് മാറ്റുരയ്ക്കുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
രൺവീർ സിംഗിന്റെ സ്പൈ ത്രില്ലർ ‘ധുരന്ധർ 2’ ട്രെയ്ലർ പുറത്ത്; അഡ്വാൻസ് ബുക്കിംഗ് ആരംഭിച്ചു ; ബോക്സ് ഓഫീസ് റെക്കോർഡുകൾ തകരുമോ?
