തിരുവനന്തപുരം: നിയമസഭാ തിരഞ്ഞെടുപ്പിലെ അപ്രതീക്ഷിത പരാജയത്തിന് പിന്നാലെ മുന് ഗതാഗതമന്ത്രി കെ.ബി. ഗണേഷ് കുമാറിനെ കാത്തിരിക്കുന്നത് വന് നിയമക്കുരുക്കുകള്. മന്ത്രിയായിരിക്കെ ഗതാഗത വകുപ്പില് കൊണ്ടുവന്ന പരിഷ്കാരങ്ങള് ചര്ച്ചയാകുമ്പോള്, സ്വന്തം ഡ്രൈവിംഗ് ലൈസന്സിലെ ക്രമക്കേടുകളാണ് ഇപ്പോള് അദ്ദേഹത്തിന് തിരിച്ചടിയാകുന്നത്. 18 വയസ്സ് തികയുന്നതിന് മുന്പേ ഗണേഷ് കുമാര് ലൈസന്സ് സ്വന്തമാക്കിയെന്ന കണ്ടെത്തല് മോട്ടോര് വാഹന വകുപ്പിനെ ഞെട്ടിച്ചിരിക്കുകയാണ്.
തിരിച്ചറിയല് രേഖകളില് ഉള്ളതുപോലെ മാത്രമേ ഡ്രൈവിംഗ് ലൈസന്സിലും പേര് ചേര്ക്കാന് പാടുള്ളൂ എന്ന നിയമം നിലനില്ക്കെ, ഗണേഷ് കുമാറിന്റെ ലൈസന്സില് പേരിനൊപ്പം ‘എം.എല്.എ’ എന്ന് കൂട്ടിച്ചേര്ത്തത് ചട്ടലംഘനമാണെന്ന് മോട്ടോര് വാഹന വകുപ്പ് കണ്ടെത്തി. 2028 ജൂലൈ വരെ ലൈസന്സിന് കാലാവധിയുണ്ടെങ്കിലും, എം.എല്.എ സ്ഥാനത്തിന് കാലാവധി കഴിഞ്ഞിരിക്കുകയാണ്. നിശ്ചിത കാലയളവിലേക്കുള്ള പദവികള് ഔദ്യോഗിക രേഖകളില് ചേര്ക്കാന് പാടില്ലെന്നിരിക്കെ, ഇത് നീക്കം ചെയ്യാനുള്ള നടപടികള് വകുപ്പ് ആരംഭിച്ചു കഴിഞ്ഞു.
ഏറ്റവും ഗുരുതരമായ കണ്ടെത്തല് ഗണേഷ് കുമാറിന്റെ പ്രായവുമായി ബന്ധപ്പെട്ടതാണ്. നിയമപ്രകാരം ഡ്രൈവിംഗ് ലൈസന്സ് ലഭിക്കാന് 18 വയസ്സ് പൂര്ത്തിയാകണമെന്നിരിക്കെ, അതിനുമുമ്പേ അദ്ദേഹം ലൈസന്സ് നേടിയതായാണ് മോട്ടോര് വാഹന വകുപ്പിന്റെ പ്രാഥമിക പരിശോധനയില് വ്യക്തമായത്. ‘സാരഥി’ സോഫ്റ്റ്വെയര് വരുന്നതിന് മുന്പ് നടന്ന ഈ ഇടപാടില് വലിയ ക്രമക്കേട് നടന്നതായാണ് സൂചന. പ്രായപൂര്ത്തിയാകുന്നതിന് മുന്പ് ലൈസന്സ് നേടിയത് തെളിയിക്കപ്പെട്ടാല് ലൈസന്സ് റദ്ദാക്കുന്നതടക്കമുള്ള കടുത്ത നടപടികളിലേക്ക് വകുപ്പ് നീങ്ങും.
കാര് പ്രേമം തലയ്ക്ക് പിടിച്ച ഗണേഷ് കുമാറിന് സ്വന്തം വകുപ്പില് നിന്ന് തന്നെ ഇത്തരം ഒരു ‘ഇരുട്ടടി’ ലഭിക്കുമെന്ന് ആരും പ്രതീക്ഷിച്ചിരുന്നില്ല. ഭരണമാറ്റത്തിന് പിന്നാലെ വകുപ്പില് നടന്ന ആഭ്യന്തര പരിശോധനയിലാണ് ഈ വിവരങ്ങള് പുറത്തുവന്നത്. വിഷയത്തില് കൂടുതല് വ്യക്തത വരുത്താന് ഗണേഷ് കുമാറില് നിന്ന് വിശദീകരണം തേടാനാണ് മോട്ടോര് വാഹന വകുപ്പിന്റെ തീരുമാനം. ക്രമക്കേട് സ്ഥിരീകരിച്ചാല് ലൈസന്സ് റദ്ദാക്കുന്ന കാര്യത്തില് വകുപ്പ് നിയമോപദേശം തേടിയിട്ടുണ്ട്.
തിരഞ്ഞെടുപ്പ് തോല്വിക്ക് പിന്നാലെ വ്യക്തിപരമായ തിരിച്ചടികള് കൂടി എത്തുന്നതോടെ രാഷ്ട്രീയ വനവാസത്തിന് സമാനമായ സാഹചര്യത്തിലാണ് മുന് മന്ത്രി. ഡ്രൈവിംഗ് ലൈസന്സിലെ ഈ ‘ഷോര്ട്ട് കട്ട്’ ഗണേഷിന്റെ രാഷ്ട്രീയ ഭാവിയില് പുതിയ നിയമയുദ്ധങ്ങള്ക്ക് വഴിമരുന്നിടുമെന്ന് ഉറപ്പായിക്കഴിഞ്ഞു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
അമ്പലപ്പുഴയില് ജി. സുധാകരന് കോണ്ഗ്രസിന്റെ നിരുപാധിക പിന്തുണ; കൈപ്പത്തി ചിഹ്നത്തില് സ്ഥാനാര്ത്ഥിയില്ല; പോരാട്ടം മുറുകുന്നു
