വിഷം വാങ്ങിയത് ഓണ്‍ലൈനിലൂടെ; വടുതലയിലെ അഞ്ചംഗ കുടുംബത്തിന്റെ മരണം കൂട്ടആത്മഹത്യയെന്ന് പോലീസ്; ഓണ്‍ലൈന്‍ ഇടപാടുകള്‍ കേന്ദ്രീകരിച്ച് അന്വേഷണം; തകര്‍ന്ന കുടുംബം, വിടാത്ത ദുരന്തങ്ങള്‍

കൊച്ചി: വടുതല കര്‍ഷക റോഡിലെ വാടകവീട്ടില്‍ അഞ്ചംഗ കുടുംബത്തെ മരിച്ച നിലയില്‍ കണ്ടെത്തിയ സംഭവം കൂട്ടആത്മഹത്യയാണെന്ന നിഗമനത്തില്‍ പോലീസ്. മക്കള്‍ക്ക് വിഷം നല്‍കിയ ശേഷം ശ്രീകുമാരിയും അശ്വതിയും തൂങ്ങിമരിക്കുകയായിരുന്നുവെന്നാണ് പ്രാഥമിക നിഗമനം. കുട്ടികള്‍ക്ക് നല്‍കാനായി ഓണ്‍ലൈന്‍ വഴിയാണ് ഇവര്‍ വിഷാംശം വരുത്തിയതെന്നാണ് പോലീസ് സംശയിക്കുന്നത്. സംഭവസ്ഥലത്തുനിന്ന് രണ്ട് ഒഴിഞ്ഞ വിഷക്കുപ്പികളും തുറക്കാത്ത ഒരു കുപ്പിയും പോലീസ് കണ്ടെടുത്തിട്ടുണ്ട്. ഇവരുടെ മൊബൈല്‍ ഫോണുകള്‍ ശാസ്ത്രീയ പരിശോധനയ്ക്കായി കസ്റ്റഡിയിലെടുത്തു.

മരിച്ച അഞ്ചുപേരുടെയും സംസ്‌കാരം ഞായറാഴ്ച വൈകീട്ടോടെ പച്ചാളം വൈദ്യുത ശ്മശാനത്തില്‍ നടന്നു. തിരുവനന്തപുരം വിളപ്പില്‍ശാല കാരോട് കനകവിഹാറില്‍ സുരേന്ദ്രന്‍ നായരുടെ ഭാര്യ ശ്രീകുമാരി (59), മകള്‍ അശ്വതി എസ്. നായര്‍ (36), മക്കളായ കാര്‍ണിവന്‍ (14), കീര്‍ത്തിവന്‍ (അഞ്ച്), അക്ഷിത (രണ്ട്) എന്നിവരുടെ മൃതദേഹങ്ങളാണ് ഒന്നിച്ച് സംസ്‌കരിച്ചത്. മൃതദേഹങ്ങള്‍ തിരുവനന്തപുരത്തേക്ക് കൊണ്ടുപോകുന്നതിലെ പ്രായോഗിക ബുദ്ധിമുട്ടും സാമ്പത്തിക പ്രതിസന്ധിയും ബന്ധുക്കള്‍ അറിയിച്ചതിനെത്തുടര്‍ന്ന് നഗരസഭയുടെ നേതൃത്വത്തിലാണ് സംസ്‌കാരച്ചടങ്ങുകള്‍ ഒരുക്കിയത്.

വടുതലയില്‍ താമസം ആരംഭിച്ചത് മുതല്‍ കുടുംബം ഭക്ഷണവും മറ്റ് അവശ്യവസ്തുക്കളും ഓണ്‍ലൈനിലൂടെയാണ് വാങ്ങിയിരുന്നത്. പുറംലോകവുമായി കാര്യമായ ബന്ധം പുലര്‍ത്താതിരുന്ന ഇവര്‍ വിഷപദാര്‍ത്ഥവും ഇത്തരത്തില്‍ വാങ്ങിയതാകാമെന്നാണ് നോര്‍ത്ത് പോലീസ് കരുതുന്നത്. ആന്തരിക അവയവങ്ങളുടെ രാസപരിശോധനാ റിപ്പോര്‍ട്ട് ലഭിച്ചാലേ മരണകാരണത്തില്‍ പൂര്‍ണ്ണമായ വ്യക്തത വരൂ. വീടിനുള്ളില്‍നിന്ന് മൂന്ന് ഒഴിഞ്ഞ ജ്യൂസ് ബോട്ടിലുകളും കണ്ടെത്തിയിട്ടുണ്ട്.

ഏഴുമാസം മുന്‍പ് അശ്വതിയുടെ ഭര്‍ത്താവ് അക്ഷത് സാമ്പത്തിക-കുടുംബ പ്രശ്‌നങ്ങളെത്തുടര്‍ന്ന് ആത്മഹത്യ ചെയ്തിരുന്നു. ഈ ആഘാതത്തിന് പിന്നാലെ കുടുംബത്തില്‍ തര്‍ക്കങ്ങള്‍ രൂക്ഷമായിരുന്നു. ഭര്‍ത്താവിന്റെ വീട്ടുകാരുമായി പിണങ്ങി കുട്ടികളുമായി വീടുവിട്ടിറങ്ങിയ അശ്വതി, അമ്മ ശ്രീകുമാരിക്കൊപ്പമാണ് കൊച്ചിയിലെത്തിയത്. ഭിന്നശേഷിക്കാരനായ മൂത്തമകന്‍ കാര്‍ണിവന്റെ ചികിത്സയ്ക്കായി എന്നുപറഞ്ഞാണ് രണ്ടുമാസം മുന്‍പ് വടുതലയില്‍ വീട് വാടകയ്‌ക്കെടുത്തത്.

പോലീസിന് ലഭിച്ച ആത്മഹത്യാക്കുറിപ്പില്‍ കടുത്ത കുടുംബപ്രശ്‌നങ്ങളെക്കുറിച്ച് സൂചനകളുണ്ട്. അക്ഷതിന്റെ മരണശേഷം അശ്വതിയെയും മക്കളെയും കാണാനില്ലെന്ന് കാട്ടി ബന്ധുക്കള്‍ നേരത്തെ പോലീസില്‍ പരാതി നല്‍കിയിരുന്നു. ഇതിനിടെയാണ് നാടിനെ നടുക്കിയ കൂട്ടമരണത്തിന്റെ വാര്‍ത്ത പുറത്തുവരുന്നത്. നോര്‍ത്ത് എസ്.എച്ച്.ഒ. എ. അനൂപിന്റെ നേതൃത്വത്തില്‍ വിശദമായ അന്വേഷണം പുരോഗമിക്കുകയാണ്.