സോപാന സംഗീതജ്ഞൻ ഞരളത്ത് ഹരിഗോവിന്ദൻ മുസ്‌ലിം ലീഗിൽ ചേർന്നു; പാണക്കാട് സാദിഖലി തങ്ങളിൽനിന്ന് അംഗത്വം സ്വീകരിച്ചു

മലപ്പുറം: പ്രശസ്ത സോപാന സംഗീതജ്ഞൻ ഞരളത്ത് ഹരിഗോവിന്ദൻ മുസ്‌ലിം ലീഗിൽ ചേർന്നു. മലപ്പുറം പാണക്കാട് നടന്ന ചടങ്ങിൽ മുസ്ലിം ലീഗ് സംസ്ഥാന അധ്യക്ഷൻ പാണക്കാട് സാദിഖലി ശിഹാബ് തങ്ങളിൽനിന്നാണ് അദ്ദേഹം പാർട്ടി അംഗത്വം സ്വീകരിച്ചത്. ഏറെക്കാലമായി ഇടതുപക്ഷ സഹയാത്രികനായിരുന്ന ഹരിഗോവിന്ദന്റെ ഈ രാഷ്ട്രീയ മാറ്റം കേരളീയ പൊതുസമൂഹത്തിൽ വലിയ ചർച്ചകൾക്ക് വഴിതുറന്നിരിക്കുകയാണ്.

വാക്കിലും പ്രവൃത്തിയിലും മതേതരത്വവും മനുഷ്യത്വവും പുലർത്തുന്ന ഏക പ്രസ്ഥാനം ലീഗാണെന്ന് തിരിച്ചറിഞ്ഞതുകൊണ്ടാണ് ഈ തീരുമാനമെടുത്തതെന്ന് ഹരിഗോവിന്ദൻ മാധ്യമങ്ങളോട് പറഞ്ഞു. സാമുദായിക ധ്രുവീകരണത്തിനെതിരെ ശക്തമായ പ്രതിരോധം സൃഷ്ടിക്കുമെന്ന് കരുതിയ ഇടതുപക്ഷത്തിന്റെ സമീപകാല നിലപാടുകൾ നിരാശാജനകമാണെന്നും അദ്ദേഹം കൂട്ടിച്ചേർത്തു.

ഇടതുപക്ഷവും സംഘപരിവാറും ഒരേ തൂവൽ പക്ഷികളായി മാറിക്കൊണ്ടിരിക്കുകയാണെന്ന് അദ്ദേഹം രൂക്ഷമായി വിമർശിച്ചു. “നേരത്തെ ഇടതുപക്ഷവുമായി നിരവധി വേദികൾ പങ്കിട്ടിട്ടുണ്ട്. എന്നാൽ വെള്ളാപ്പള്ളി നടേശന്റേതടക്കമുള്ള പ്രസ്താവനകൾക്ക് ഇടതുപക്ഷം നൽകുന്ന പിന്തുണ ഒരു കലാകാരൻ എന്ന നിലയിൽ എന്നെ ഭയപ്പെടുത്തുന്നു. വാക്കും പ്രവൃത്തിയും ഒന്നാകേണ്ട കാലത്ത് ലീഗിന്റെ നിലപാടുകൾക്ക് വലിയ പ്രസക്തിയുണ്ട്. ഒരു രാഷ്ട്രീയ പാർട്ടിയിൽ ചേരുന്നുണ്ടെങ്കിൽ അത് മുസ്‌ലിം ലീഗിലായിരിക്കുമെന്ന് വർഷങ്ങൾക്ക് മുമ്പ് തന്നെ ഞാൻ തീരുമാനിച്ചതാണ്,” ഹരിഗോവിന്ദൻ വ്യക്തമാക്കി.

നിലപാടുകളിൽ വ്യക്തതയുള്ള മതേതര ജനാധിപത്യം ഉയർത്തിപ്പിടിക്കുന്നതിനാലാണ് ലീഗിനൊപ്പം സഞ്ചരിക്കാൻ തീരുമാനിച്ചതെന്നും അദ്ദേഹം പറഞ്ഞു. കേരളത്തിലെ സാംസ്‌കാരിക മണ്ഡലത്തിൽ സജീവമായ അദ്ദേഹം രാഷ്ട്രീയ പാർട്ടിയിൽ ചേർന്ന് പ്രവർത്തിക്കാൻ തീരുമാനിച്ചത് വരാനിരിക്കുന്ന രാഷ്ട്രീയ നീക്കങ്ങളിൽ ശ്രദ്ധേയമായ ഒന്നായി മാറും. ഇതിനുമുൻപും പല സാമൂഹിക വിഷയങ്ങളിലും തന്റേതായ നിലപാടുകൾ തുറന്നുപറഞ്ഞ വ്യക്തിത്വമാണ് ഞരളത്ത് ഹരിഗോവിന്ദൻ.