കണ്ണൂര്: മുന് എ.ഡി.എം. നവീന് ബാബുവിന്റെ മരണവുമായി ബന്ധപ്പെട്ട കേസില് അന്വേഷണസംഘം സമര്പ്പിച്ച പുതിയ റിപ്പോര്ട്ടിലെ വിവരങ്ങള് പുറത്ത്. കണ്ണൂര് ജില്ലാ പഞ്ചായത്ത് പ്രസിഡന്റായിരുന്ന കാലയളവില് പി.പി. ദിവ്യ ഔദ്യോഗിക മൊബൈല് ഫോണ് ഒട്ടും ഉപയോഗിച്ചിട്ടില്ലെന്നാണ് പോലീസിന്റെ കണ്ടെത്തല്. ഈ വിവരമായിരിക്കും അന്വേഷണസംഘം തലശ്ശേരി അഡീഷണല് സെഷന്സ് കോടതിയെ ഔദ്യോഗികമായി അറിയിക്കുക.
ദിവ്യ ഔദ്യോഗിക ഫോണ് ഉപയോഗിക്കാതിരുന്നതിനാല്, അതിന്റെ കോള് വിവരങ്ങള് പരിശോധിച്ച സൈബര് ക്രൈം പോലീസിന് യാതൊരു വിവരവും കണ്ടെത്താന് കഴിഞ്ഞിട്ടില്ല. ഫോണും സിം കാര്ഡും പരസ്പരം വേര്പെടുത്തി ഓഫീസിലെ മേശവലിപ്പില് സൂക്ഷിച്ചിരിക്കുകയായിരുന്നു എന്നാണ് പോലീസ് വ്യക്തമാക്കുന്നത്. ജില്ലാ പഞ്ചായത്ത് പ്രസിഡന്റായി ചുമതലയേറ്റതുമുതല് രാജിവെക്കുന്നതുവരെ ഈ ഫോണ് ഒന്നു തുറക്കുക പോലും ചെയ്തിട്ടില്ലെന്നാണ് റിപ്പോര്ട്ടിലുള്ളത്.
കേസില് കൂടുതല് അന്വേഷണം ആവശ്യപ്പെട്ട് നവീന് ബാബുവിന്റെ ഭാര്യ മഞ്ജുഷ നല്കിയ ഹര്ജിയിലാണ് ദിവ്യയുടെ ഔദ്യോഗിക ഫോണ് വിവരങ്ങള് കൂടി ശേഖരിക്കാന് കോടതി നിര്ദ്ദേശിച്ചിരുന്നത്. അന്വേഷണസംഘം ദിവ്യയുടെ സ്വകാര്യ ഫോണ് മാത്രമാണ് പരിശോധിച്ചതെന്ന കുടുംബത്തിന്റെ ആക്ഷേപത്തെ തുടര്ന്നായിരുന്നു കോടതിയുടെ ഈ ഉത്തരവ്. എന്നാല് ഔദ്യോഗിക ഫോണ് പരിശോധിച്ച സൈബര് പോലീസിന് ‘നോ ഡേറ്റാ ഫൗണ്ട്’ എന്ന മറുപടിയാണ് ലഭിച്ചത്.
നിലവില് ദിവ്യയുടെ സ്വകാര്യ ഫോണ് വിവരങ്ങള് അടങ്ങുന്ന തുടരന്വേഷണ റിപ്പോര്ട്ട് പോലീസ് കോടതിയില് സമര്പ്പിച്ചിട്ടുണ്ട്. ഈ റിപ്പോര്ട്ട് പ്രകാരം, നവീന് ബാബുവിന്റെ യാത്രയയപ്പ് യോഗത്തിന് തൊട്ടുമുന്പ് ദിവ്യ അന്നത്തെ ജില്ലാ കളക്ടറെ സ്വകാര്യ ഫോണില് വിളിച്ചിരുന്നതായി വ്യക്തമായിട്ടുണ്ട്. യാത്രയയപ്പ് യോഗത്തിലേക്ക് എത്തുന്നതിന് തൊട്ടുമുന്പുള്ള ഈ ഫോണ്വിളി കേസില് ഏറെ നിര്ണ്ണായക തെളിവായി മാറിയിരിക്കുകയാണ്.
കൂടാതെ നവീന് ബാബു താമസിച്ചിരുന്ന പള്ളിക്കുന്നിലെ വാടക ക്വാര്ട്ടേഴ്സിന് സമീപത്തെ സി.സി.ടി.വി. ദൃശ്യങ്ങളുടെ പൂര്ണ്ണരൂപവും അന്വേഷണസംഘം കോടതിയില് ഹാജരാക്കിയിട്ടുണ്ട്. ദിവ്യയുടെ ഫോണ്വിളികളുടെ വിവരങ്ങള് പൂര്ണ്ണമായും ലഭ്യമാകില്ലെന്ന് പബ്ലിക് പ്രോസിക്യൂട്ടറും കോടതിയെ അറിയിച്ചിട്ടുണ്ട്. പ്രതിയുടെ ഫോണ് രേഖകള് പൂര്ണ്ണമായി ഹാജരാക്കാത്തതില് കുടുംബത്തിന് ഇപ്പോഴും കടുത്ത വിയോജിപ്പുണ്ട്.
മൊബൈല് ഫോണുകളിലെ കോള് ഡീറ്റെയില് റെക്കോര്ഡ് (സി.ഡി.ആര്.) വഴി സംഭാഷണങ്ങള് നേരിട്ട് കേള്ക്കാന് സാധിക്കില്ലെങ്കിലും ഫോണ് വിളിച്ച തീയതി, സമയം, സംസാരിച്ച ദൈര്ഘ്യം എന്നിവ കണ്ടെത്താം. അതോടൊപ്പം വിളിച്ചയാളുടെയും സ്വീകരിച്ചയാളുടെയും നമ്പറുകള്, അവര് ആ സമയത്ത് ഏത് ടവര് പരിധിയിലായിരുന്നു തുടങ്ങിയ വിവരങ്ങളും കൃത്യമായി മനസ്സിലാക്കാന് സാധിക്കും.
എന്നാല് ദിവ്യ ഉപയോഗിച്ചിരുന്ന ഔദ്യോഗിക ഫോണില് നിന്ന് ഇത്തരം വിവരങ്ങളൊന്നും ലഭ്യമാകില്ലെന്നാണ് പബ്ലിക് പ്രോസിക്യൂട്ടര് കോടതിയെ ബോധിപ്പിച്ചിട്ടുള്ളത്. സിം കാര്ഡ് മാറ്റി ഉപയോഗിച്ചിട്ടുണ്ടെങ്കില് പോലും കണ്ടെത്താന് കഴിയുന്ന സൈബര് പരിശോധനയിലാണ് ഔദ്യോഗിക ഫോണിന്റെ കാര്യത്തില് ഒരു വിവരവും ലഭ്യമല്ലെന്ന റിപ്പോര്ട്ട് വന്നിരിക്കുന്നത്.
പെട്രോള് പമ്പിന് അനുമതി നല്കാന് വൈകിയെന്ന് ആരോപിച്ച് യാത്രയയപ്പ് യോഗത്തില് വെച്ച് പി.പി. ദിവ്യ പരസ്യമായി അവഹേളിച്ചതില് മനംനൊന്താണ് എ.ഡി.എം. നവീന് ബാബു തൂങ്ങിമരിച്ചതെന്നാണ് കേസ്. പത്തനംതിട്ടയിലേക്ക് സ്ഥലംമാറ്റം ലഭിച്ച നവീന് ബാബുവിന് സഹപ്രവര്ത്തകര് കളക്ടറേറ്റില് നല്കിയ യാത്രയയപ്പ് യോഗത്തില് ക്ഷണിക്കപ്പെടാതെ എത്തിയാണ് ദിവ്യ ആക്ഷേപപ്രസംഗം നടത്തിയത്.
2024 ഒക്ടോബര് 15-ന് പുലര്ച്ചെയാണ് നവീന് ബാബുവിനെ കണ്ണൂര് പള്ളിക്കുന്നിലെ ക്വാര്ട്ടേഴ്സില് മരിച്ച നിലയില് കണ്ടെത്തിയത്. തുടര്ന്ന് വലിയ ജനകീയ പ്രതിഷേധം ഉയര്ന്നതോടെ ദിവ്യയ്ക്ക് ജില്ലാ പഞ്ചായത്ത് പ്രസിഡന്റ് സ്ഥാനം രാജിവെക്കേണ്ടി വരികയും പോലീസ് ഇവരെ അറസ്റ്റ് ചെയ്യുകയും ചെയ്തിരുന്നു. നിലവില് ജാമ്യത്തിലിറങ്ങിയ ദിവ്യയ്ക്കെതിരെ തുടരന്വേഷണം ശക്തമാക്കാനാണ് കുടുംബത്തിന്റെ തീരുമാനം.
ഈ സാഹചര്യത്തില് ഔദ്യോഗിക ഫോണ് ഉപയോഗിച്ചിട്ടില്ലെന്ന പുതിയ പോലീസ് റിപ്പോര്ട്ട് കോടതി എങ്ങനെ വിലയിരുത്തുമെന്നത് കേസില് ഏറെ നിര്ണ്ണായകമാകും. തുടരന്വേഷണ റിപ്പോര്ട്ടിന്മേല് നവീന് ബാബുവിന്റെ കുടുംബം കോടതിയില് എന്ത് നിലപാട് സ്വീകരിക്കുമെന്നതിനെ ആശ്രയിച്ചിരിക്കും കേസിലെ തുടര്ന്നുള്ള നിയമനടപടികള്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
പ്രധാനമന്ത്രിയുമായി കാന്തപുരം എ.പി. അബൂബക്കർ മുസ്ലിയാർ കൂടിക്കാഴ്ച നടത്തി; നിമിഷപ്രിയയുടെ മോചനത്തിന് കേന്ദ്രത്തിന്റെ ഇടപെടൽ തേടി
