ചേച്ചിയെ ചേർത്തുപിടിച്ച് എം.ജി; അകൽച്ചയുടെ പ്രചരണങ്ങൾക്ക് വിരാമം, മേടയിൽ വീട്ടിൽ വീണ്ടും സംഗീത താളലയം

തിരുവനന്തപുരം: സംഗീത പ്രേമികൾക്കും ആരാധകർക്കും ഒരുപോലെ സന്തോഷം നൽകുന്ന ഹൃദ്യമായ ഒരു ചിത്രം പങ്കുവെച്ചിരിക്കുകയാണ് മലയാളത്തിന്റെ പ്രിയ ഗായകൻ എം.ജി. ശ്രീകുമാർ. ദീർഘകാലമായി നിലനിന്നിരുന്ന കുടുംബപരമായ അകൽച്ചയെക്കുറിച്ചുള്ള വാർത്തകൾക്ക് വിരാമമിട്ടുകൊണ്ട്, തന്റെ ജ്യേഷ്ഠസഹോദരിയും പ്രശസ്ത സംഗീതജ്ഞയുമായ കെ. ഓമനക്കുട്ടിക്കൊപ്പമുള്ള ചിത്രമാണ് അദ്ദേഹം സോഷ്യൽ മീഡിയയിൽ പോസ്റ്റ് ചെയ്തത്. “എന്തൊരു ചേലാണ്, നെഞ്ചില് നേരാണ്, എന്റെ കിനാവാണ് എന്തിനും നീയാണ്… ഞാനും എന്റെ ചേച്ചിയും, ലക്ഷ്മിയും, ലേഖയും” എന്ന മനോഹരമായ വരികളോടെയാണ് എം.ജി ചിത്രം പങ്കുവെച്ചത്.

മലയാള സംഗീത ലോകത്തെ പ്രശസ്തമായ ‘മേടയിൽ’ കുടുംബത്തിൽ എം.ജി. ശ്രീകുമാറും സഹോദരി ഓമനക്കുട്ടിയും തമ്മിൽ വർഷങ്ങളായി പിണക്കത്തിലാണെന്ന തരത്തിൽ വലിയ തോതിലുള്ള പ്രചരണങ്ങൾ ഉണ്ടായിരുന്നു. ജ്യേഷ്ഠനും സംഗീത സംവിധായകനുമായ എം.ജി. രാധാകൃഷ്ണന്റെ മരണസമയത്ത് പോലും എം.ജി. ശ്രീകുമാർ കുടുംബവീട്ടിൽ എത്തിയില്ല എന്നത് ഈ അഭ്യൂഹങ്ങൾക്ക് ആക്കം കൂട്ടി. അന്ന് അമേരിക്കയിലെ ഒരു പരിപാടിയിലായിരുന്നതിനാലാണ് എത്താൻ കഴിയാതിരുന്നതെന്ന് അദ്ദേഹം പിന്നീട് വ്യക്തമാക്കിയെങ്കിലും സോഷ്യൽ മീഡിയയിലും മറ്റും വിവാദങ്ങൾ കെട്ടടങ്ങിയിരുന്നില്ല.

എന്നാൽ, ആ വാർത്തകളെല്ലാം വെറും കെട്ടുകഥകളാണെന്ന് തെളിയിക്കുന്നതാണ് പുതിയ ചിത്രം. കെ. ഓമനക്കുട്ടിയുടെ മകളും യുവ ഗായകൻ കെ.എസ്. ഹരിശങ്കറിന്റെ അമ്മയുമായ ലേഖയും ചിത്രത്തിലുണ്ട്. എം.ജി. ശ്രീകുമാറിന്റെ ഭാര്യ ലേഖ ശ്രീകുമാറും കുടുംബാംഗങ്ങളും ഒത്തുകൂടിയ ഈ നിമിഷം ആരാധകർ ഇരുകൈയ്യും നീട്ടിയാണ് സ്വീകരിച്ചിരിക്കുന്നത്. “പുഴ എങ്ങിനെ ഒഴുകിയാലും കടലില്ലാതെ എവിടെയെത്താനാണ്” എന്ന ആരാധകന്റെ കമന്റ് ഈ ഒത്തുചേരലിന്റെ ആഴം വ്യക്തമാക്കുന്നു.

സംഗീത കുടുംബത്തിലെ ഈ കൂടിച്ചേരൽ വലിയൊരു മാറ്റത്തിന് വഴിയൊരുക്കുമെന്ന പ്രതീക്ഷയിലാണ് സംഗീത ലോകം. മലയാളത്തിലെ ഇന്നത്തെ തിരക്കുള്ള ഗായകരിലൊരാളായ ഹരിശങ്കറും എം.ജി. ശ്രീകുമാറും ഉടൻ തന്നെ ഒരു ഗാനത്തിനായി ഒന്നിച്ചേക്കാം എന്ന സൂചനകളും ഉയരുന്നുണ്ട്. കുടുംബാംഗങ്ങൾക്കിടയിലുണ്ടായ മഞ്ഞുരുകൽ മേടയിൽ വീട്ടിൽ വീണ്ടും പഴയ കാലത്തെ താളലയങ്ങൾ തിരികെ കൊണ്ടുവരികയാണ്.

“രണ്ടുപേരുടെയും സംഗീതവിരുന്ന് കൂടി കണ്ടാല്‍ മനസ്സ് നിറയും” എന്നാണ് പലരും ചിത്രത്തിന് താഴെ കുറിക്കുന്നത്. തെന്നിന്ത്യൻ സംഗീതത്തിലെ അതികായരായ ഈ സഹോദരങ്ങൾ ഒരേ ഫ്രെയിമിൽ എത്തിയതോടെ സൈബർ ഇടങ്ങളിൽ ഈ ചിത്രം തരംഗമായിക്കഴിഞ്ഞു. കൺകുളിർക്കുന്ന ഈ കാഴ്ച മലയാള സംഗീതത്തിലെ തന്നെ ഏറ്റവും വലിയ സന്തോഷവാർത്തകളിൽ ഒന്നായി മാറുകയാണ്.