കൊച്ചി: നഗരത്തിലെ ആഡംബര ഹോട്ടലുകളും നിശാപാര്ട്ടികളും കേന്ദ്രീകരിച്ച് ലഹരിമരുന്ന് വിതരണം ചെയ്യുന്ന വമ്പന് സ്രാവ് തൃക്കാക്കര സ്വദേശി കെവിന് ബി. മാത്യു (42) പിടിയിലായതോടെ പുറത്തുവരുന്നത് കൊച്ചി ലഹരി മാഫിയയുടെ ഞെട്ടിക്കുന്ന അധോലോക വിവരങ്ങള്. സിനിമാ മോഹവുമായി നഗരത്തിലെത്തുന്ന പെണ്കുട്ടികളെ ചതിക്കുഴിയില് വീഴ്ത്തി ലഹരിക്കടത്തിന് ഉപയോഗിച്ചിരുന്ന ഇയാള്, അടുത്തിടെ പിടിയിലായ ഷാജി ഫെര്ണാണ്ടോയുടെ ഉള്പ്പെടെ ‘ഗുരു’വാണെന്ന് പോലീസ് അന്വേഷണത്തില് വ്യക്തമായി.
കൊച്ചിയിലെ ലഹരി വിതരണ ശൃംഖലയുടെ തലവനായി പ്രവര്ത്തിച്ചിരുന്ന കെവിന്, ആഡംബര ഹോട്ടലുകളിലെ ഡിജെ പാര്ട്ടികള്ക്ക് ലഹരി എത്തിച്ചിരുന്ന പ്രധാന ഉറവിടമായിരുന്നു. കഴിഞ്ഞ മാസം കൊച്ചിയിലെ പഞ്ചനക്ഷത്ര ഹോട്ടലില് വെച്ച് ദന്തഡോക്ടറും അഭിഭാഷകനും അടങ്ങുന്ന സംഘം പിടിയിലായ കേസില് നിര്ണ്ണായക തെളിവുകള് ലഭിച്ചതാണ് കെവിനിലേക്ക് പോലീസിനെ എത്തിച്ചത്. ഈ സംഘത്തിന് ലഹരി എത്തിച്ചുനല്കിയ തിരുവനന്തപുരം സ്വദേശി ഷാജി ഫെര്ണാണ്ടോ എന്ന ഷോണിന് ലഹരി കൈമാറിയിരുന്നത് കെവിനായിരുന്നു.
സിനിമകളില് അവസരം വാഗ്ദാനം ചെയ്തും മോഡലിംഗ് രംഗത്തെ പ്രശസ്തി വാഗ്ദാനം ചെയ്തുമാണ് കെവിന് പെണ്കുട്ടികളെ വലയിലാക്കിയിരുന്നത്. ആദ്യഘട്ടത്തില് ലഹരിക്ക് അടിമകളാക്കുന്ന ഇവരെ പിന്നീട് ഭീഷണിപ്പെടുത്തിയും പ്രലോഭിപ്പിച്ചും ലഹരിക്കടത്തിനായുള്ള കാരിയര്മാരായി മാറ്റുകയായിരുന്നു. ഇത്തരത്തില് ഒട്ടേറെ പെണ്കുട്ടികള് കെവിന്റെ ചതിക്കുഴിയില് പെട്ടതായി നാര്ക്കോട്ടിക് സെല് അസിസ്റ്റന്റ് കമ്മീഷണറുടെ നേതൃത്വത്തിലുള്ള അന്വേഷണ സംഘം കണ്ടെത്തിയിട്ടുണ്ട്.
തൃക്കാക്കര വാഴക്കാല ഭാഗത്ത് വെച്ച് സിറ്റി ഡാന്സാഫ് സംഘം കെവിനെ പിടികൂടുമ്പോള് ഇയാളുടെ കൈവശം വന്തോതില് മാരക ലഹരിമരുന്നുകള് ഉണ്ടായിരുന്നു. 183.55 ഗ്രാം എംഡിഎംഎ, 93.51 ഗ്രാം എക്സ്റ്റസി ഗുളികകള് എന്നിവയാണ് പിടിച്ചെടുത്തത്. ഇതിന് അന്താരാഷ്ട്ര വിപണിയില് ലക്ഷക്കണക്കിന് രൂപ വിലവരും. മയക്കുമരുന്ന് വില്പനയിലൂടെ സമാഹരിച്ച ഒരു ലക്ഷം രൂപയും ഇയാളില് നിന്ന് കണ്ടെടുത്തിട്ടുണ്ട്.
കഴിഞ്ഞ മൂന്ന് വര്ഷമായി ആഡംബര വാഹനങ്ങളുടെ മറവിലാണ് കെവിന് ലഹരിക്കടത്ത് നടത്തിയിരുന്നത്. കഴിഞ്ഞ വര്ഷം മാത്രം ഇയാളുടെ അക്കൗണ്ടിലൂടെ 25 ലക്ഷം രൂപയുടെ ലഹരി ഇടപാടുകള് നടന്നതായി കണ്ടെത്തി. തായ്ലന്ഡ് ഉള്പ്പെടെയുള്ള വിദേശ രാജ്യങ്ങളിലേക്ക് കെവിന് ഇടയ്ക്കിടെ യാത്ര നടത്തിയിരുന്നതായും ഇത് അന്താരാഷ്ട്ര ലഹരി മാഫിയയുമായുള്ള ബന്ധത്തിന്റെ ഭാഗമാണെന്നും പോലീസ് സംശയിക്കുന്നു. വിദേശത്ത് നിന്ന് കൊച്ചിയിലെത്തിക്കുന്ന ലഹരി ഏജന്റുകള് വഴി വിതരണം ചെയ്യുകയായിരുന്നു രീതി.
ലഹരി വിതരണത്തിനായി യുവതികളും പെണ്കുട്ടികളും അടങ്ങുന്ന പ്രത്യേക ‘ഏജന്റ്’ സംഘം തന്നെ കെവിനുണ്ടായിരുന്നു. ഒരു വര്ഷം മുന്പും സമാനമായ കേസില് ഇയാള് പിടിയിലായിരുന്നു. അന്ന് ഇയാളോടൊപ്പം മൂന്ന് യുവതികളുണ്ടായിരുന്നുവെന്നത് ഇയാള്ക്ക് പെണ്കുട്ടികളുമായുള്ള ലഹരി ബന്ധത്തിന് ആഴം കൂട്ടുന്നു. പിടിക്കപ്പെടുമ്പോഴെല്ലാം കാരിയര്മാരായ പെണ്കുട്ടികളെ മുന്നില് നിര്ത്തി രക്ഷപ്പെടുകയായിരുന്നു ഇയാളുടെ തന്ത്രം.
കൊച്ചിയിലെ നൈറ്റ് പാര്ട്ടികളിലെയും ആഫ്റ്റര് പാര്ട്ടികളിലെയും അനിഷേധ്യ ഘടകമായിരുന്നു കെവിന്. കടവന്ത്രയിലെ ആഡംബര ഹോട്ടലില് നടന്ന ലഹരി പാര്ട്ടിയില് പിടിയിലായ എട്ടുപേര്ക്കും ലഹരി എത്തിച്ചത് ഇയാളാണെന്ന് വ്യക്തമായതോടെ കൊച്ചിയിലെ ‘ഹൈ പ്രൊഫൈല്’ ലഹരി ഉപഭോക്താക്കളുടെ പട്ടികയും പോലീസിന്റെ പക്കലെത്തിയിട്ടുണ്ട്. ഡോക്ടര്മാരും എന്ജിനീയര്മാരും സിനിമാ പ്രവര്ത്തകരും ഇയാളുടെ സ്ഥിരം ആവശ്യക്കാരായിരുന്നു.
തൃക്കാക്കര ചെമ്പുമുക്ക് കെ.കെ റോഡിലെ റോസ്ലാന്ഡ് വീട്ടിലെ താമസക്കാരനായ കെവിന്, സമൂഹത്തില് മാന്യമായ മുഖം നിലനിര്ത്തിക്കൊണ്ടാണ് അധോലോക ഇടപാടുകള് നടത്തിയിരുന്നത്. സിറ്റി പോലീസ് കമ്മീഷണര് കാളിരാജ് മഹേഷ് കുമാറിന് ലഭിച്ച രഹസ്യ വിവരത്തിന്റെ അടിസ്ഥാനത്തില് നടത്തിയ മിന്നല് പരിശോധനയിലാണ് ഇയാള് കുടുങ്ങിയത്. ലഹരി വില്പനയിലൂടെ ഇയാള് സമ്പാദിച്ച സ്വത്തുക്കളെ കുറിച്ചും ഇഡി അന്വേഷണം ഉണ്ടായേക്കും.
പ്രതിയുടെ കൂട്ടാളികള്ക്കായി പോലീസ് അന്വേഷണം ഊര്ജ്ജിതമാക്കിയിട്ടുണ്ട്. കെവിനെ കസ്റ്റഡിയില് വാങ്ങി ചോദ്യം ചെയ്യുന്നതോടെ സിനിമ-മോഡലിംഗ് രംഗത്തെ കൂടുതല് പ്രമുഖരുടെ പങ്കാളിത്തം പുറത്തുവരുമെന്നാണ് സൂചന. ലഹരിക്കടത്തിന് ഉപയോഗിച്ച ആഡംബര വാഹനങ്ങളും പോലീസ് പിടിച്ചെടുത്തിട്ടുണ്ട്. കൊച്ചിയിലെ ലഹരി വിപണിയെ തകര്ക്കാന് കെവിന്റെ അറസ്റ്റ് വലിയ സഹായകമാകുമെന്ന് ഉദ്യോഗസ്ഥര് വിലയിരുത്തുന്നു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ക്രൂരത കാട്ടിയിട്ടും കുലുക്കമില്ല; ക്യാമറയ്ക്ക് മുന്നില് ചിരിച്ചുല്ലസിച്ച് സഫീന; ‘നല്ല ഫോട്ടോ എടുക്കണേ’ എന്ന് പോലീസിനോടും മാധ്യമങ്ങളോടും പരിഹാസം
