മലപ്പുറം: സമകാലിക രാഷ്ട്രീയ രംഗത്ത് സ്വാര്ത്ഥതയും അവസരവാദവും മാത്രം മുഖമുദ്രയാക്കിയ നേതാക്കള്ക്കിടയില്, അപൂര്വ്വങ്ങളില് അപൂര്വ്വമായ രാഷ്ട്രീയ ധാര്മ്മികതയുടെയും നെറിവിന്റെയും പ്രതീകമായി മാറിയിരിക്കുകയാണ് ഡോ. കെ.ടി. ജലീല്. ലോക്സഭാ തെരഞ്ഞെടുപ്പിലെ കനത്ത പരാജയത്തിന് പിന്നാലെ സി.പി.ഐ.എം ചരിത്രത്തിലെ ഏറ്റവും വലിയ രാഷ്ട്രീയ പ്രതിസന്ധിയിലൂടെ കടന്നുപോകുന്ന ഈ ഘട്ടത്തില്, പാര്ട്ടിയെ തള്ളിപ്പറയാന് ഒട്ടും മടിക്കാത്ത വലതുപക്ഷ ചേരിയിലേക്ക് വേണമെങ്കില് ജലീലിന് സുഖമായി ചേക്കേറാമായിരുന്നു. മുസ്ലീം ലീഗില് നിന്ന് പുറത്താക്കപ്പെട്ട് രാഷ്ട്രീയമായി ഒറ്റപ്പെട്ട നാളുകളില് തന്നെ കൈപിടിച്ചുയര്ത്തി എം.എല്.എയും മന്ത്രിയുമാക്കിയ സി.പി.ഐ.എമ്മിനെ, അവര് തളരുമ്പോള് ഒറ്റുകൊടുക്കാന് തന്റെ രാഷ്ട്രീയ മാന്യത അനുവദിക്കില്ലെന്ന് പ്രഖ്യാപിച്ചുകൊണ്ട് ജലീല് ഇപ്പോള് ഔദ്യോഗികമായി കമ്മ്യൂണിസ്റ്റ് പാര്ട്ടിയില് അംഗത്വമെടുത്ത് ‘സഖാവായി’ മാറിയിരിക്കുന്നു.
തവനൂര് മുന് എം.എല്.എയും മുന് മന്ത്രിയുമായ കെ.ടി. ജലീല് ഫേസ്ബുക്കിലൂടെയാണ് താന് ഇനി കേവലമൊരു സഹയാത്രികനല്ല, പാര്ട്ടിയുടെ ഔദ്യോഗിക ഭാഗമാണെന്ന കാര്യം ജനങ്ങളെ അറിയിച്ചത്. അധികാരത്തിന്റെ ശീതളിമയില് മാത്രം പാര്ട്ടിയോട് ഒട്ടിനില്ക്കുകയും പ്രതിസന്ധി ഘട്ടങ്ങളില് കാലുമാറുകയും ചെയ്യുന്ന ഇന്നത്തെ രാഷ്ട്രീയ സാഹചര്യത്തില്, ജലീലിന്റെ ഈ തീരുമാനം ആധുനിക കേരള രാഷ്ട്രീയം കണ്ട ഏറ്റവും വലിയ മൂല്യബോധത്തിന്റെ തെളിവാണ്. 2006-ല് ആരംഭിച്ച സി.പി.ഐ.എം ബന്ധം കഴിഞ്ഞ രണ്ട് പതിറ്റാണ്ടിനിടയില് ഒരു ഘട്ടത്തിലും ദുര്ബലമായിട്ടില്ലെന്ന് അദ്ദേഹം അടിവരയിടുന്നു.
മുസ്ലീം ലീഗില് നിന്ന് പുറത്തായ ജലീലിന് മലപ്പുറം ജില്ലയില് തുടര്ച്ചയായി നാല് തവണ എം.എല്.എയാകാനും അഞ്ച് വര്ഷം മന്ത്രിയാകാനും അവസരം നല്കിയത് സി.പി.ഐ.എം എന്ന പ്രസ്ഥാനമാണ്. ഇടതുപക്ഷത്തിന് ഭരണം നഷ്ടപ്പെടുകയും പാര്ട്ടി നാനാഭാഗത്തുനിന്നും അക്രമിക്കപ്പെടുകയും ചെയ്യുന്ന ഈ വേളയില്, നന്ദികേട് കാണിച്ച് യു.ഡി.എഫ് പാളയത്തിലേക്ക് തിരിച്ചുപോയി അധികാരം കൊതിക്കാന് ജലീല് തയ്യാറായില്ല. പകരം, തന്നെ വളര്ത്തിയ പ്രസ്ഥാനം മുങ്ങിത്താഴുമ്പോള് അവരെ തിരിച്ചു പിടിച്ചുയര്ത്തുക എന്ന അത്യപൂര്വ്വ മാന്യതയാണ് അദ്ദേഹം ഉയര്ത്തിപ്പിടിക്കുന്നത്.
‘പ്രസ്ഥാനത്തിന്റെ സമൃദ്ധ കാലത്ത് ഏതു പാര്ട്ടിയില് ചേരാനും ഒരുപാടുപേര് കാണും. എന്നാല് പാര്ട്ടി വലിയ പ്രതിസന്ധികളെ അഭിമുഖീകരിക്കുമ്പോള് പാര്ട്ടിയുടെ കൂടെ നില്ക്കുന്ന നിസ്വാര്ത്ഥരായ ലക്ഷക്കണക്കിന് സഖാക്കള്ക്കൊപ്പം അവരില് ഒരാളായി നില്ക്കാതെ മാറി നിന്നാല് സമൂഹത്തോട് ചെയ്യുന്ന കൊടിയ അപരാധമാകും അത്,’ എന്ന ജലീലിന്റെ വാക്കുകള് അദ്ദേഹത്തിന്റെ രാഷ്ട്രീയ ധാര്മ്മികതയുടെ ആഴം വ്യക്തമാക്കുന്നതാണ്. വലതുപക്ഷ പിന്തിരിപ്പന്മാരാലും വര്ഗ്ഗീയ ശക്തികളാലും കമ്മ്യൂണിസ്റ്റ് പാര്ട്ടി നഖശിഖാന്തം എതിര്ക്കപ്പെടുന്ന ഈ ഘട്ടത്തില് പാര്ട്ടിക്കൊപ്പം പാറപോലെ ഉറച്ചുനില്ക്കുകയാണ് താനെന്ന് അദ്ദേഹം തെളിയിച്ചിരിക്കുന്നു.
ഇന്ത്യയില് വര്ഗ്ഗീയ ഫാഷിസ്റ്റുകള് ഫണം വിടര്ത്തിയാടുമ്പോള് അതിനെതിരെ നെഞ്ചുറപ്പോടെ പൊരുതുന്നത് കമ്മ്യൂണിസ്റ്റ് പാര്ട്ടികള് മാത്രമാണെന്ന് ജലീല് വ്യക്തമാക്കുന്നു. ഇടതുപക്ഷ ചേരി ദുര്ബലമായാല് അതിന്റെ ആത്യന്തികമായ നഷ്ടം അനുഭവിക്കേണ്ടി വരിക ദുര്ബല ജനവിഭാഗങ്ങളും മതന്യൂനപക്ഷങ്ങളുമാണ്. പശ്ചിമബംഗാളില് കമ്മ്യൂണിസ്റ്റ് പാര്ട്ടി ദുര്ബലമായപ്പോള് ഉണ്ടായ തൃണമൂല് കോണ്ഗ്രസിന്റെ ആയുസ്സ് വെറും 15 വര്ഷമായിരുന്നുവെന്നും ഇപ്പോള് അവിടെ ഭരിക്കുന്നത് ബി.ജെ.പി ആണെന്നുമുള്ള ചരിത്ര യാഥാര്ത്ഥ്യം ജലീല് ഓര്മ്മിപ്പിക്കുന്നു. കേരളത്തില് അത്തരമൊരു സാഹചര്യം ഉണ്ടാകാതിരിക്കാന് കമ്മ്യൂണിസ്റ്റ് പാര്ട്ടി ഊര്ജസ്വലതയോടെ നിലനില്ക്കേണ്ടതുണ്ടെന്ന തിരിച്ചറിവാണ് അദ്ദേഹത്തെ ഈ തീരുമാനത്തിലേക്ക് നയിച്ചത്.
കാപട്യക്കാരും അഭിനയക്കാരും കളം നിറഞ്ഞാടുന്ന സമകാലിക രാഷ്ട്രീയത്തില്, നാട്ടുകാരെ പറ്റിക്കാതെയും ധാര്മ്മിക ബോധം സ്വജീവിതത്തില് പ്രയോഗവല്ക്കരിച്ചും പൊതുരംഗത്ത് പ്രവര്ത്തിക്കുന്നവരാണ് മഹാഭൂരിഭാഗം കമ്മ്യൂണിസ്റ്റ് നേതാക്കളുമെന്ന് ജലീല് സാക്ഷ്യപ്പെടുത്തുന്നു. കറകളഞ്ഞ മതേതരവാദികളായ കമ്മ്യൂണിസ്റ്റുകാര്ക്കൊപ്പം നില്ക്കുക എന്നത് തന്റെ ബോധ്യമാണെന്ന് അദ്ദേഹം പറയുമ്പോള്, അത് സി.പി.ഐ.എമ്മിന് ഈ പ്രതിസന്ധി ഘട്ടത്തില് ലഭിക്കുന്ന ഏറ്റവും വലിയ സര്ട്ടിഫിക്കറ്റായി മാറുകയാണ്.
ഒരു വിശ്വാസിക്ക് സി.പി.ഐ.എമ്മില് മെമ്പര്ഷിപ്പെടുക്കാന് കഴിയില്ലെന്ന വര്ഗ്ഗീയവാദികളുടെ കുപ്രചരണങ്ങള്ക്കുള്ള ശക്തമായ മറുപടി കൂടിയാണ് ജലീലിന്റെയും അദ്ദേഹത്തിന്റെ സഹധര്മ്മിണിയുടെയും പാര്ട്ടി പ്രവേശം. ഒരാള്ക്ക് നല്ല വിശ്വാസിയും അതേസമയം തന്നെ നല്ല കമ്മ്യൂണിസ്റ്റുകാരനുമാകാന് കഴിയുമെന്ന് സ്വജീവിതം കൊണ്ട് തെളിയിച്ച ഒരുപാട് പേര് നമുക്ക് മുന്നിലുണ്ട്. ലോക ഫാസിസത്തിനെതിരായി കമ്മ്യൂണിസ്റ്റുകാരും വിശ്വാസികളും ഒരുമിച്ച് പടുത്തുയര്ത്തിയിരിക്കുന്ന ഐക്യനിര എല്ലാ മുന്ധാരണകളെയും കീഴ്മേല് മറിക്കുകയാണെന്നും ഇന്ത്യയിലും അത്തരം വേദികള് ഉയര്ന്നു വരേണ്ടത് അനിവാര്യമാണെന്നും അദ്ദേഹം ചൂണ്ടിക്കാണിക്കുന്നു.
മതങ്ങളുടെയും മതചിഹ്നങ്ങളുടെയും പവിത്രത ജീവിതത്തില് പകര്ത്താതെ അവയെ ചൂഷണോപാധിയാക്കി സാധാരണ ജനങ്ങളെ പറ്റിച്ച് ധനസമ്പാദനം നടത്തുകയും അധികാരം കയ്യാളുകയും ആഢംഭരത്തില് ആറാടുകയും ചെയ്യുന്ന വിദ്വേഷ പ്രചാരകരോടുള്ള കടുത്ത വിയോജിപ്പാണ് തന്റെ പാര്ട്ടി പ്രവേശനമെന്ന് ജലീല് തുറന്നടിക്കുന്നു. കര്ഷകരും തൊഴിലാളികളും അധസ്ഥിതരും സ്ത്രീകളും ന്യൂനപക്ഷങ്ങളും അടങ്ങുന്ന ഈ വലിയ മനുഷ്യസ്നേഹികളുടെ കൂട്ടായ്മയില് അണിചേരുക എന്നത് ഒരു ചരിത്രപരമായ ദൗത്യമാണ്.
അധികാര മോഹികള് കളം മാറിച്ചവിട്ടുന്ന ഇന്നത്തെ കാലഘട്ടത്തില്, പാര്ട്ടി പ്രതിസന്ധിയിലായപ്പോള് അംഗത്വമെടുത്ത് സഖാവായി മാറിയ കെ.ടി. ജലീലിന്റെ ഈ നീക്കം രാഷ്ട്രീയ കേരളത്തിന് വലിയൊരു പാഠമാണ്. അധികാരമുള്ളപ്പോള് കൂടെ നില്ക്കുകയും ഇല്ലാത്തപ്പോള് തള്ളിപ്പറയുകയും ചെയ്യുന്ന രാഷ്ട്രീയ ജീര്ണ്ണതയ്ക്കെതിരെ ജലീല് ഉയര്ത്തിപ്പിടിച്ച ഈ ധാര്മ്മികതയ്ക്ക് കൈയടിക്കാതിരിക്കാന് കഴിയില്ല. വെല്ഡണ് ജലീല്, വെല്ഡണ്!
ഫേസ്ബുക്ക് പോസ്റ്റിന്റെ പൂര്ണരൂപം:
“ഇനി സഹയാത്രികനല്ല
പാര്ട്ടിയുടെ ഭാഗം
എന്റെ പൊതുജീവിതത്തില് വലിയ താങ്ങും തണലും നല്കിയ പാര്ട്ടിയാണ് സി.പി.ഐ(എം). 2006-ല് തുടങ്ങിയ ആത്മബന്ധം രണ്ടു പതിറ്റാണ്ടിനിടയില് ഒരു ഘട്ടത്തിലും ദുര്ബലമായിട്ടില്ല. സഹയാത്രികനായിരിക്കെ പാര്ട്ടി സെക്രട്ടറിയായ സ: പിണറായി വിജയന് നയിച്ച 2 സംസ്ഥാന ജാഥയിലും, ഗോവിന്ദന് മാസ്റ്റര് നയിച്ച ഒരു ജാഥയിലും ഈയുള്ളവനെ അംഗമാക്കിയ സി.പി.ഐ(എം) എന്നിലര്പ്പിച്ച വിശ്വാസം വളരെ വലുതാണ്. ഒരാളുടെയും പിന്നാലെ നടക്കാതെയും ഒരാളെക്കൊണ്ടും ശുപാര്ശ ചെയ്യിക്കാതെയും മലപ്പുറം ജില്ലയില് നിന്ന് തുടര്ച്ചയായി 4 പ്രാവശ്യം എം.എല്.എയും അഞ്ചുവര്ഷം മന്ത്രിയുമാക്കിയ പാര്ട്ടിയോട് എക്കാലവും ഞാന് കടപ്പെട്ടിരിക്കും.
കഴിഞ്ഞ തെരഞ്ഞെടുപ്പില് നേരിട്ട പരാജയത്തെ തുടര്ന്ന് വിമര്ശന ശരങ്ങള് ഒരുപാട് ഏറ്റുവാങ്ങേണ്ടി വന്ന സി.പി.ഐ(എം), വലതുപക്ഷ പിന്തിരിപ്പന്മാരാലും വര്ഗ്ഗീയ ശക്തികളാലും നഖശിഖാന്തം എതിര്ക്കപ്പെടുന്ന സാഹചര്യമാണ് നിലവിലുള്ളത്. വര്ഗ്ഗീയ ഫാഷിസ്റ്റുകള് ഫണം വിടര്ത്തി ആടുന്ന വര്ത്തമാന ഇന്ത്യന് സാഹചര്യത്തില് മുഴുവന് ജനങ്ങളുടെയും ഒരു പൊതു പ്ലാറ്റ്ഫോമൊരുക്കി ആശയ രംഗത്തും കര്മ്മ മേഖലയിലും അക്ഷരാര്ത്ഥത്തില് പൊരുതിനില്ക്കുന്നത് കമ്മ്യൂണിസ്റ്റ് പാര്ട്ടികളാണ്. ഇടതുപക്ഷ ചേരി ദുര്ബലമായാല് ആത്യന്തികമായി നഷ്ടം സംഭവിക്കുക ദുര്ബല ജനവിഭാഗങ്ങള്ക്കും മതന്യൂനപക്ഷങ്ങള്ക്കുമാണെന്ന സത്യം പകല്വെളിച്ചം പോലെ വ്യക്തമാണ്. പശ്ചിമബംഗാളില് കമ്മ്യൂണിസ്റ്റ് പാര്ട്ടി ദുര്ബലമായപ്പോള് ഉണ്ടായ ടി.എം.സിയുടെ ആയുസ്സ് വെറും 15 വര്ഷമാണ്. ഇപ്പോള് അവിടം ഭരിക്കുന്നത് ബി.ജെ.പിയാണ്. സമാന സാഹചര്യം കേരളത്തില് ഉണ്ടാകാതിരിക്കാന് കമ്മ്യൂണിസ്റ്റ് പാര്ട്ടി ഊര്ജസ്വലതയോടെ നിലനില്ക്കണം.
കാപട്യക്കാരും അഭിനേതാക്കളും കളം നിറഞ്ഞാടുന്ന സമകാലിക രാഷ്ട്രീയത്തില് ജീവിത സാഹചര്യങ്ങള് രൂപപ്പെടുത്തിയ ശൈലി പിന്തുടരുന്നത് കൊണ്ടു മാത്രം വിമര്ശിക്കപ്പെടുന്നവരാണ് കമ്മ്യൂണിസ്റ്റ് പാര്ട്ടി നേതാക്കള്. ഇതര രാഷ്ട്രീയ പാര്ട്ടി നേതാക്കളുമായും പ്രവര്ത്തകരുമായും തുലനം ചെയ്യുമ്പോള് നാട്ടുകാരെ പറ്റിക്കാതെയും ധാര്മ്മിക ബോധം സ്വജീവിതത്തില് പ്രയോഗവല്ക്കരിച്ചും പൊതുരംഗത്ത് പ്രവര്ത്തിക്കുന്നവരാണ് മഹാഭൂരിഭാഗം കമ്മ്യൂണിസ്റ്റ് നേതാക്കളും പ്രവര്ത്തകരും. അപവാദമുണ്ടാകാം. ഞാന് നിഷേധിക്കുന്നില്ല. അത്തരക്കാര് പക്ഷെ ന്യൂനാല് ന്യൂനപക്ഷമാണ്. അതു തെളിഞ്ഞാല് അവരെ മാറ്റി നിര്ത്താന് മടി കാണിക്കാത്തവരാണ് ഇടതുപക്ഷ കക്ഷികള്. മറ്റു രാഷ്ട്രീയ പാര്ട്ടികളെ അപേക്ഷിച്ച് തരികിടക്കാരും തട്ടിപ്പന്മാരും ഏറ്റവും കുറഞ്ഞ പാര്ട്ടിയാണ് കമ്മ്യൂണിസ്റ്റു പാര്ട്ടി എന്നര്ത്ഥം. വ്യക്തി വിശുദ്ധിയുടെ കാര്യത്തിലും സ്ഥിതി ഭിന്നമല്ല. കറകളഞ്ഞ മതേതരവാദികളുമാണ് അവര്. ഇതെല്ലാം എനിക്കു ബോദ്ധ്യമായ കാര്യങ്ങളാണ്. ആരും പറഞ്ഞു തന്നതല്ല.
മതാചാരങ്ങള് പിന്തുടരുന്ന ഒരു വിശ്വാസിക്ക് സി.പി.ഐ(എം)മ്മില് മെമ്പര്ഷിപ്പെടുക്കാന് കഴിയില്ലെന്നും അത്തരക്കാര് മതത്തില് നിന്ന് പുറത്താണെന്നുമുള്ള വാദമുയര്ത്തി കമ്മ്യൂണിസ്റ്റ് പാര്ട്ടിയില് അംഗത്വമെടുക്കുന്നതില് നിന്ന് ഹൈന്ദവ-മുസ്ലിം-ക്രൈസ്തവ വിശ്വാസികളെ പിന്തിരിപ്പിക്കാനുള്ള നീക്കങ്ങള് അതതു വിഭാഗങ്ങളിലെ വര്ഗ്ഗീയ വിഷം ചീറ്റുന്നവര് നാട്ടില് പ്രചരിപ്പിക്കുന്ന അത്യന്തം അപകടകരമായ അവസ്ഥ കാണാതിരുന്നു കൂട. ലോകത്തുള്ള എല്ലാ വര്ഗ്ഗീയ-ജാതീയ- സങ്കുചിത ശക്തികളും ഒരുമിക്കുന്ന ഏക ബിന്ദു, കമ്മ്യൂണിസ്റ്റ് പാര്ട്ടികളെ ക്ഷയിപ്പിക്കുക എന്നിടത്താണ്. അതിനെതിരായ ശക്തമായ പ്രതിരോധവും കൂടിയാണ് സി.പി.ഐ(എം)മ്മില് അംഗത്വമെടുക്കാനുള്ള ഞങ്ങളുടെ തീരുമാനം.
ഒരാള്ക്ക് നല്ല വിശ്വാസിയും നല്ല കമ്മ്യൂണിസ്റ്റുകാരനുമാകാന് കഴിയുമെന്ന് സ്വജീവിതം കൊണ്ട് തെളിയിച്ച പലരുമുണ്ട്. ലോക മുതലാളിത്വത്തിനെതിരെ ഇറാനും ചൈനയും റഷ്യയും ഉത്തര കൊറിയയും ഒരുമിച്ചു നില്ക്കുന്ന കാഴ്ച ആരെയാണ് ആവേശം കൊള്ളിക്കാത്തത്? ലോക ഫാസിസത്തിനെതിരായി കമ്മ്യൂണിസ്റ്റുകാരും വിശ്വാസികളും ഒരുമിച്ച് പടുത്തുയര്ത്തിയിരിക്കുന്ന ഐക്യനിര എല്ലാ ‘മുന്ധാരണ’കളെയും കീഴ്മേല് മറിച്ചിരിക്കയാണ്. ഇന്ത്യയിലും സമാന വേദികള് ഉയര്ന്നു വരേണ്ടത് അനിവാര്യമാണ്. മതങ്ങളുടെയും മതചിഹ്നങ്ങളുടെയും പവിത്രത ജീവിതത്തില് പകര്ത്താതെ അവയെ ചൂഷണോപാധിയാക്കി സാധാരണ ജനങ്ങളെ പറ്റിച്ച് ധനസമ്പാദനം നടത്തുകയും അധികാരം കയ്യാളുകയും ആഢംഭരത്തില് ആറാടുകയും ചെയ്യുന്ന വിദ്വേഷ പ്രചാരകരോടുള്ള വിയോജിപ്പു കൂടിയാണ് എന്റെയും സഹധര്മ്മിണിയുടെയും പാര്ട്ടി പ്രവേശം.
പ്രസ്ഥാനത്തിന്റെ സമൃദ്ധ കാലത്ത് ഏതു പാര്ട്ടിയില് ചേരാനും ഒരുപാടുപേര് കാണും. എന്നാല് പാര്ട്ടി വലിയ പ്രതിസന്ധികളെ അഭിമുഖീകരിക്കുമ്പോള് പാര്ട്ടിയുടെ കൂടെ നില്ക്കുന്ന നിസ്വാര്ത്ഥരായ ലക്ഷക്കണക്കിന് സഖാക്കള്ക്കൊപ്പം അവരില് ഒരാളായി നില്ക്കാതെ മാറി നിന്നാല് സമൂഹത്തോട് ചെയ്യുന്ന കൊടിയ അപരാധമാകും അത്. കര്ഷകരും തൊഴിലാളികളും അധസ്ഥിതരും സ്ത്രീകളും പിന്നോക്കക്കാരും ന്യൂനപക്ഷങ്ങളും സാധാരണക്കാരും സര്ക്കാര് ജീവനക്കാരും ചെറുകിട കച്ചവടക്കാരും വ്യാപാരികളും അദ്ധ്യാപകരും വ്യവസായികളും പ്രൊഫഷണലുകളും വിദ്യാസമ്പന്നരും ബുദ്ധിജീവികളും വിദ്യാര്ത്ഥികളും യുവാക്കളും പ്രവാസികളും കുട്ടികളും മദ്ധ്യവയസ്കരും വയോജനങ്ങളും എല്ലാ ജാതിമതസ്ഥരും അടങ്ങുന്ന കൂട്ടായ്മയില് അണിചേരുക എന്നത് ഓരോ മനുഷ്യ സ്നേഹിയുടെയും ജീവിത ധര്മ്മമാണെന്നാണ് ഞങ്ങളുടെ ഉറച്ച വിശ്വാസം. ആ മഹത്തായ ദൗത്യമാണ് പാര്ട്ടി അംഗങ്ങളാകുന്നതിലൂടെ സഫലമാകുന്നത്.”
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കള്ളപ്രചാരണം നടത്തുന്നവരെ അയ്യപ്പനും ഭദ്രകാളിയും ശിക്ഷിക്കും; ആനയറ ക്ഷേത്ര വിവാദത്തിൽ വൈകാരിക പ്രതികരണവുമായി കടകംപള്ളി സുരേന്ദ്രൻ
