സ്വര്ണ്ണക്കൊള്ളയില് കള്ളപ്പണ വേട്ടയുമായി ഇഡി! പ്രതികളുടെ വീടുകളില് കണ്ടത് വരുമാനത്തിന്റെ അനേകം ഇരട്ടി സ്വത്ത്; കള്ളപ്പണത്തിന്റെ ഉറവിടം തേടി അന്വേഷണം; പോറ്റിയേയും കൂട്ടു പ്രതികളേയും ഇഡിയും അഴിക്കുള്ളിലാക്കും
തിരുവനന്തപുരം: ശബരിമല സ്വര്ണ്ണക്കൊള്ള കേസില് പ്രതികളുടെ കള്ളപ്പണ ഇടപാടുകള് കേന്ദ്രീകരിച്ച് എന്ഫോഴ്സ്മെന്റ് ഡയറക്ടറേറ്റ് പിടിമുറുക്കുന്നു. കേസിലെ മുഖ്യപ്രതികള്ക്കും അവരുടെ ബന്ധുക്കള്ക്കും ഔദ്യോഗിക വരുമാനത്തേക്കാള് അനേകം ഇരട്ടി സ്വത്തുണ്ടെന്നാണ് ഇഡിയുടെ പുതിയ കണ്ടെത്തല്. പ്രതികളുടെ വീടുകളിലും സ്ഥാപനങ്ങളിലും നടത്തിയ വിശദമായ പരിശോധനയിലാണ് അനധികൃത സ്വത്ത് സമ്പാദനത്തിന്റെ ഞെട്ടിക്കുന്ന വിവരങ്ങള് പുറത്തുവന്നത്.
ശബരിമലയിലെ സ്വര്ണ്ണപ്പാളികളും ദ്വാരപാലക ശില്പ്പവും കടത്തിയതുമായി ബന്ധപ്പെട്ട് നടന്ന സാമ്പത്തിക ഇടപാടുകളെക്കുറിച്ചാണ് ഇഡി പ്രധാനമായും അന്വേഷിക്കുന്നത്. പ്രതികളുടെയും അടുത്ത ബന്ധുക്കളുടെയും ബാങ്ക് അക്കൗണ്ടുകളും ആസ്തി വിവരങ്ങളും പരിശോധിച്ചപ്പോള് കോടിക്കണക്കിന് രൂപയുടെ പൊരുത്തക്കേടുകള് കണ്ടെത്തിയിട്ടുണ്ട്. ഈ പണം എവിടെ നിന്ന് വന്നു എന്നതിനെക്കുറിച്ച് നിലവില് അന്വേഷണം ഊര്ജ്ജിതമാക്കിയിരിക്കുകയാണ്. വരും ദിവസങ്ങളില് സ്വത്തുക്കള് കണ്ടുകെട്ടുന്നത് ഉള്പ്പെടെയുള്ള കടുപ്പമേറിയ നടപടികളിലേക്ക് ഇഡി കടക്കും.
അതിനിടെ, കട്ടിളപ്പാളി കേസില് റിമാന്ഡില് കഴിയുന്ന ഒന്നാം പ്രതി ഉണ്ണികൃഷ്ണന് പോറ്റി ജയില് മോചിതനാകാന് നീക്കം തുടങ്ങി. ഈ മാസം 31-ന് പോറ്റിയുടെ റിമാന്ഡ് കാലാവധി 90 ദിവസം പൂര്ത്തിയാകുകയാണ്. ദ്വാരപാലക ശില്പ്പ കേസില് നേരത്തെ ജാമ്യം ലഭിച്ചതിനാല്, കട്ടിളപ്പാളി കേസില് കൂടി സ്വാഭാവിക ജാമ്യം ലഭിച്ചാല് പോറ്റിക്ക് പുറത്തിറങ്ങാന് കഴിയും. 90 ദിവസത്തിനുള്ളില് കുറ്റപത്രം സമര്പ്പിക്കാന് സാധിച്ചില്ലെങ്കില് പ്രതിക്ക് സ്വാഭാവികമായും ജാമ്യത്തിന് അവകാശമുണ്ടാകും. ഇതിന് ശേഷം ഇഡി അറസ്റ്റു ചെയ്യാനും സാധ്യതയുണ്ട്.
പ്രത്യേക അന്വേഷണ സംഘം കുറ്റപത്രം സമര്പ്പിക്കാന് വൈകുന്നത് പ്രതികള്ക്ക് അനുഗ്രഹമാവുകയാണ്. മുന് എക്സിക്യൂട്ടീവ് ഓഫീസര് സുധീഷ് കുമാറും ജാമ്യത്തിനായി കോടതിയെ സമീപിക്കുന്നുണ്ട്. ഉന്നത സ്വാധീനമുള്ള പ്രതികള് ജാമ്യം നേടി പുറത്തിറങ്ങുന്നത് കേസ് അട്ടിമറിക്കാന് കാരണമാകുമോ എന്ന ആശങ്കയും ശക്തമാണ്. എന്നാല് ഇഡി അന്വേഷണം സജീവമായതോടെ സംസ്ഥാന ഏജന്സികള്ക്ക് പുറമെ കേന്ദ്ര ഏജന്സിയുടെ കുരുക്കും പ്രതികള്ക്ക് മേല് മുറുകുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
തൃശ്ശൂർ നഗരത്തെ വിറപ്പിച്ച് ആനയിടഞ്ഞു; ജനവാസമേഖലയിലൂടെ പാഞ്ഞത് രണ്ട് കിലോമീറ്റർ!
