ജോലി വാഗ്ദാനം ചെയ്ത് പീഡനം: പാലക്കാട് നഗരസഭയിലെ കോൺഗ്രസ് കൗൺസിലറെ പാർട്ടിയിൽനിന്ന് പുറത്താക്കി

പാലക്കാട്: ദളിത് യുവതി നൽകിയ പീഡനപരാതിയിൽ ആരോപണവിധേയനായ പാലക്കാട് നഗരസഭാ കൗൺസിലർ പ്രശോഭ് സി. വത്സലനെ കോൺഗ്രസിന്റെ പ്രാഥമിക അംഗത്വത്തിൽനിന്ന് പുറത്താക്കി. ഡിസിസി പ്രസിഡന്റ് എ. തങ്കപ്പനാണ് പുറത്താക്കൽ വിവരം അറിയിച്ചത്. പ്രശോഭിന് പാർട്ടിയിൽ നിലവിൽ മറ്റ് ഔദ്യോഗിക സ്ഥാനങ്ങളില്ലെന്നും അതുകൊണ്ട് തന്നെ അംഗത്വത്തിൽനിന്ന് നീക്കുകയാണെന്നും അദ്ദേഹം വ്യക്തമാക്കി. ധാർമികതയുണ്ടെങ്കിൽ പ്രശോഭ് കൗൺസിലർ സ്ഥാനം രാജിവെക്കണമെന്നും ഡിസിസി പ്രസിഡന്റ് ആവശ്യപ്പെട്ടു.

ജോലി വാഗ്ദാനം ചെയ്ത് താമസസ്ഥലത്തെത്തിച്ച് പലതവണ ലൈംഗികമായി പീഡിപ്പിച്ചുവെന്നാണ് യുവതി മുഖ്യമന്ത്രിക്കയച്ച പരാതിയിൽ പറയുന്നത്. നഗരത്തിലെ ലോഡ്ജിലും ജില്ലാ ആശുപത്രി പരിസരത്ത് വെച്ച് കാറിലും പീഡനം നടന്നതായി പരാതിയിലുണ്ട്. ഗർഭിണിയാണെന്ന് അറിയിച്ചപ്പോൾ ഗർഭം അലസിപ്പിക്കാനുള്ള ഗുളിക നൽകാൻ ശ്രമിച്ചെന്നും തന്റെ ജീവന് ഭീഷണിയുണ്ടെന്നും യുവതി ആരോപിക്കുന്നു. നിലവിൽ കൗൺസിലറുടെ ഫോൺ സ്വിച്ച് ഓഫ് ചെയ്ത നിലയിലാണ്. സംഭവത്തിൽ യുവതിയുടെ മൊഴിയെടുത്ത ശേഷം തുടർനടപടികൾ സ്വീകരിക്കുമെന്ന് ജില്ലാ പോലീസ് മേധാവി അജിത് കുമാർ അറിയിച്ചു.

തിരഞ്ഞെടുപ്പ് ചൂടിലായിരിക്കുന്ന പാലക്കാട് മണ്ഡലത്തിൽ ഈ വിഷയം രാഷ്ട്രീയ വിവാദങ്ങൾക്കും തിരികൊളുത്തിയിട്ടുണ്ട്. പരാതിക്കാരിയായ പെൺകുട്ടിക്ക് നീതി ലഭിക്കണമെന്ന് യുഡിഎഫ് സ്ഥാനാർത്ഥി രമേശ് പിഷാരടി പ്രതികരിച്ചു. ആരോപണവിധേയനായ കൗൺസിലറെ പ്രചാരണങ്ങളിൽ കണ്ടിട്ടുണ്ടെങ്കിലും വ്യക്തിപരമായ പരിചയമില്ലെന്നും പാർട്ടി കൃത്യമായ നടപടി സ്വീകരിക്കുമെന്നും അദ്ദേഹം കൂട്ടിച്ചേർത്തു.

അതേസമയം, ജനപ്രതിനിധി ഉൾപ്പെട്ട ഇത്തരമൊരു സംഭവം ഗൗരവകരമാണെന്നും പോലീസ് ശക്തമായ നടപടി സ്വീകരിക്കണമെന്നും എൽഡിഎഫ് സ്ഥാനാർത്ഥി എൻ.എം.ആർ. റസാഖ് ആവശ്യപ്പെട്ടു. എന്നാൽ ഇതൊരു തിരഞ്ഞെടുപ്പ് ചർച്ചാവിഷയമല്ലെന്നാണ് അദ്ദേഹത്തിന്റെ നിലപാട്. ആരോപണവിധേയനായ കൗൺസിലറെ എത്രയും വേഗം അറസ്റ്റ് ചെയ്യണമെന്ന് എൻഡിഎ സ്ഥാനാർത്ഥി ശോഭാ സുരേന്ദ്രൻ ആവശ്യപ്പെട്ടു. കോൺഗ്രസിനുള്ളിലെ അപചയത്തിന്റെ തെളിവാണ് ഇത്തരം സംഭവങ്ങളെന്നും കൗൺസിലറെ സംരക്ഷിക്കാനാണ് നീക്കമെങ്കിൽ ശക്തമായ പ്രതിഷേധം സംഘടിപ്പിക്കുമെന്നും അവർ മുന്നറിയിപ്പ് നൽകി.

വിഷയത്തിൽ പ്രതിഷേധവുമായി ഡിവൈഎഫ്ഐ രംഗത്തെത്തി. നഗരത്തിൽ പ്രതിഷേധ മാർച്ച് സംഘടിപ്പിച്ച സംഘടന, കൗൺസിലർക്കെതിരെ കർശന നിയമനടപടി സ്വീകരിക്കണമെന്ന് ആവശ്യപ്പെട്ടു. എസ്.എഫ്.ഐ സംസ്ഥാന സെക്രട്ടേറിയറ്റ് അംഗം എസ്. വിപിൻ മാർച്ച് ഉദ്ഘാടനം ചെയ്തു. ബ്ലോക്ക് ഭാരവാഹികളായ വിനോദ് കുമാർ, മുഹമ്മദ് നാസിം തുടങ്ങിയവർ പ്രതിഷേധത്തിന് നേതൃത്വം നൽകി.