ധർമ്മടത്ത് പത്രിക സമർപ്പിച്ച് പിണറായി വിജയൻ; മണ്ഡലത്തിൽ വീടുകൾ കയറിയുള്ള പ്രചാരണത്തിന് തുടക്കം

കണ്ണൂർ: നിയമസഭാ തിരഞ്ഞെടുപ്പിൽ ജനവിധി തേടി മുഖ്യമന്ത്രി പിണറായി വിജയൻ ധർമ്മടം മണ്ഡലത്തിൽ നാമനിർദ്ദേശ പത്രിക സമർപ്പിച്ചു. മുതിർന്ന സി‌പി‌എം നേതാക്കൾക്കൊപ്പമെത്തിയാണ് അദ്ദേഹം പത്രിക കൈമാറിയത്. മണ്ഡലത്തിൽ എൽഡിഎഫിന്റെ വിജയമുറപ്പിക്കാൻ വിപുലമായ പ്രചാരണ പരിപാടികളാണ് പാർട്ടി ആസൂത്രണം ചെയ്തിരിക്കുന്നത്.

പത്രികാ സമർപ്പണത്തിന് പിന്നാലെ ധർമ്മടം മണ്ഡലത്തിലെ വീടുകൾ നേരിട്ട് സന്ദർശിച്ച് വോട്ട് അഭ്യർത്ഥിക്കുന്ന പ്രചാരണ പരിപാടികളിൽ മുഖ്യമന്ത്രി പങ്കെടുക്കും.മുഖ്യമന്ത്രിയുടെ സാന്നിധ്യത്തിൽ കണ്ണൂർ ജില്ലയിലുടനീളം സി‌പി‌എമ്മിന്റെ വൻ പ്രചാരണ പരിപാടികളാണ് സംഘടിപ്പിച്ചിട്ടുള്ളത്. കഴിഞ്ഞ അഞ്ച് വർഷക്കാലം മണ്ഡലത്തിൽ നടപ്പിലാക്കിയ വികസന പ്രവർത്തനങ്ങൾ മുൻനിർത്തിയാണ് എൽഡിഎഫ് വോട്ട് തേടുന്നത്.

മുഖ്യമന്ത്രിയുടെ പത്രികാ സമർപ്പണത്തോടെ ധർമ്മടത്ത് തിരഞ്ഞെടുപ്പ് പോരാട്ടം ചൂടുപിടിച്ചിരിക്കുകയാണ്. ബിജെപി പട്ടികയിൽ കെ. രഞ്ജിത്താണ് പിണറായി വിജയന്റെ മുഖ്യ എതിരാളി. കോൺഗ്രസ് സ്ഥാനാർത്ഥി പ്രഖ്യാപനത്തിൽ അനിശ്ചിതത്വം തുടരുന്ന കണ്ണൂർ ജില്ലയിൽ, മുഖ്യമന്ത്രിയുടെ നേരിട്ടുള്ള പ്രചാരണം ഇടത് മുന്നണിക്ക് വലിയ ആത്മവിശ്വാസമാണ് നൽകുന്നത്.മുഖ്യമന്ത്രിയുടെ മൂന്നാം ഊഴം എന്ന ലക്ഷ്യത്തോടെയാണ് സി‌പി‌എം ഈ തിരഞ്ഞെടുപ്പിനെ നേരിടുന്നത്.