തിരുവനന്തപുരം: കവടിയാര് കൊട്ടാരത്തിലെ കോടികള് വിലമതിക്കുന്ന ആഭരണങ്ങള് കവര്ന്ന കേസില് അന്വേഷണം രണ്ട് സുപ്രധാന ജീവനക്കാരിലേക്ക് നീളുന്നു. കൊട്ടാരത്തിലെ പ്രമുഖ വ്യക്തിയുടെ അതീവ വിശ്വസ്തരായ ഇവരെ കേന്ദ്രീകരിച്ചാണ് പോലീസ് ഇപ്പോള് പരിശോധനകള് നടത്തുന്നത്. 150-ഓളം മുറികളുള്ള കൊട്ടാരത്തില് അശ്വതി തിരുനാളിന്റെ കിടപ്പുമുറിയും ആഭരണങ്ങള് സൂക്ഷിച്ചിരുന്ന ലോക്കറിലെ പ്രത്യേക അറയും കൃത്യമായി അറിയുന്നവര്ക്ക് മാത്രമേ ഇത്തരമൊരു മോഷണം നടത്താന് കഴിയൂ എന്ന ഉറച്ച നിഗമനത്തിലാണ് പോലീസ്.
സംശയനിഴലിലുള്ള രണ്ട് ജീവനക്കാര് കൊട്ടാരത്തിലെ ദൈനംദിന കാര്യങ്ങളിലും സുരക്ഷാ ക്രമീകരണങ്ങളിലും വലിയ സ്വാധീനമുള്ളവരാണ്. എന്നാല്, ഇവര്ക്കെതിരെ ഇതുവരെ പ്രത്യക്ഷമായ തെളിവുകളൊന്നും ലഭിച്ചിട്ടില്ല എന്നത് അന്വേഷണ സംഘത്തെ വലയ്ക്കുന്നുണ്ട്. മോഷണം നടന്ന് മാസങ്ങള് പിന്നിട്ട ശേഷം പരാതി നല്കിയതിനാല് ശാസ്ത്രീയ തെളിവുകള് ശേഖരിക്കുക അസാധ്യമാണ്. വിരലടയാളങ്ങളോ മറ്റ് ഫോറന്സിക് തെളിവുകളോ ഇതിനകം നശിച്ചുപോയിരിക്കാം.
കൊട്ടാരത്തിലെ മോഷണക്കേസ് പാങ്ങോട് സൈനിക ക്യാമ്പില് നിന്ന് ആനക്കൊമ്പ് മോഷണം പോയ കേസിലെ സമാനമായ സാഹചര്യത്തിലേക്കാണോ നീങ്ങുന്നത് എന്ന ആശങ്ക പോലീസിനുണ്ട്. പാങ്ങോട് കേസില് സൈനിക ഉദ്യോഗസ്ഥര് അന്വേഷണവുമായി സഹകരിക്കാത്തതിനാല് പ്രതികളെ കണ്ടെത്താനോ ആനക്കൊമ്പ് വീണ്ടെടുക്കാനോ പോലീസിന് കഴിഞ്ഞിരുന്നില്ല. സമാനമായി, കവടിയാര് കൊട്ടാരത്തിലെ ജീവനക്കാരെ തടഞ്ഞുവെക്കുകയോ കടുപ്പത്തില് ചോദ്യം ചെയ്യുകയോ ചെയ്യരുതെന്ന് കൊട്ടാരം അധികൃതര് പോലീസിനോട് ആവശ്യപ്പെട്ടിട്ടുണ്ട്. ഈ ‘മിതത്വം’ പാലിക്കേണ്ടി വരുന്നത് അന്വേഷണത്തെ പ്രതികൂലമായി ബാധിച്ചേക്കാം.
കേസിന്റെ ഗൗരവം കണക്കിലെടുത്ത് അസിസ്റ്റന്റ് കമ്മീഷണറുടെ നേതൃത്വത്തിലുള്ള പ്രത്യേക അന്വേഷണ സംഘത്തെ കേസ് ഏല്പ്പിക്കാന് തീരുമാനിച്ചിട്ടുണ്ട്. മോഷണം പോയത് വെറും സ്വര്ണ്ണമല്ല, മറിച്ച് പത്മനാഭസ്വാമിയുടെ ചിത്രം ആലേഖനം ചെയ്ത പതക്കം ഉള്പ്പെടെയുള്ള ചരിത്ര പ്രാധാന്യമുള്ള അമൂല്യ ശേഖരമാണ്. രത്ന മാഫിയയുടെ സാന്നിധ്യമുണ്ടോ എന്ന കാര്യവും സംഘം പരിശോധിക്കും.
കൊട്ടാരത്തിനുള്ളിലെ സുരക്ഷാ വലയങ്ങള് ഭേദിക്കാതെ നടന്ന ഈ കവര്ച്ചയില്, ആഭ്യന്തരമായ ഒത്താശയില്ലാതെ പുറത്തുനിന്നൊരാള്ക്ക് ഒന്നും ചെയ്യാനാകില്ലെന്ന് പോലീസ് ഉറപ്പിച്ചു പറയുന്നു. സന്ദര്ശകരായ യൂട്യൂബര്മാരെയും വിദേശത്തുള്ള ചില വ്യക്തികളെയും ഫോണ് വഴി ബന്ധപ്പെടാനും പോലീസ് തീരുമാനിച്ചിട്ടുണ്ട്. പാങ്ങോട് ആനക്കൊമ്പ് കേസിന്റെ വിധി ഈ കേസിനും ഉണ്ടാകുമോ അതോ ‘കള്ളന് കപ്പലില് തന്നെ’ ഉണ്ടെന്ന് പോലീസ് തെളിയിക്കുമോ എന്നാണ് ഇനി അറിയേണ്ടത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കൊച്ചിയിൽ ഹണി ട്രാപ്പിനായി ഭിന്നശേഷിക്കാരനെ ഹോട്ടൽ മുറിയിലേക്ക് വിളിച്ചുവരുത്തി, ലൈംഗിക ബന്ധത്തിന് വിസമ്മതിച്ച യുവാവിനെ മർദിച്ച് അവശനാക്കി നഗ്നനാക്കി വീഡിയോ പകർത്തി; യുവതി ഉൾപ്പടെ നാലു പേര് അറസ്റ്റിൽ
