തൃശ്ശൂര്/തിരുവനന്തപുരം: ഗുരുവായൂര് ദേവസ്വം ബോര്ഡ് ചെയര്മാനായി മുന് കോണ്ഗ്രസ് നേതാവും ജനകീയനുമായ എ.വി. ഗോപിനാഥിനെ ഉടന് നിയമിക്കും. നിലവിലെ ചെയര്മാന് പ്രൊഫ. വി.കെ. വിജയന് മന്ത്രി വി.എന്. വാസവന് രാജി സമര്പ്പിച്ചതോടെയാണ് ഗോപിനാഥിന്റെ നിയമനത്തിന് വഴിയൊരുങ്ങിയത്. തിരുവനന്തപുരത്തു നിന്നുള്ള പ്രമുഖരെയും പരിഗണിച്ചിരുന്നെങ്കിലും, വടക്കന് മേഖലയ്ക്കുള്ള പ്രത്യേക പരിഗണനയും ഗോപിനാഥിന്റെ ക്ലീന് ഇമേജും കണക്കിലെടുത്ത് മുഖ്യമന്ത്രി പിണറായി വിജയന് നേരിട്ടാണ് ഈ തീരുമാനമെടുത്തത്.
അഴിമതിക്കെതിരെ വിട്ടുവീഴ്ചയില്ലാത്ത നിലപാട് സ്വീകരിക്കുന്ന വ്യക്തിയെന്ന നിലയിലാണ് എ.വി. ഗോപിനാഥിന് നറുക്കുവീണത്. ഗുരുവായൂരപ്പന്റെ ഭക്തനായ ഗോപിനാഥിനെ ദേവസ്വം ഭരണമേല്പ്പിക്കുന്നത് ഭക്തര്ക്കിടയിലും വലിയ സ്വീകാര്യത നല്കും. സുതാര്യമായ ഭരണവും അഴിമതിരഹിത നിലപാടുകളും അദ്ദേഹത്തെ മറ്റുള്ളവരില് നിന്ന് വ്യത്യസ്തനാക്കുന്നു. ദേവസ്വം ബോര്ഡിന്റെ പ്രവര്ത്തനം കൂടുതല് കാര്യക്ഷമമാക്കാന് ഗോപിനാഥിന്റെ സാന്നിധ്യം സഹായിക്കുമെന്നാണ് സര്ക്കാര് വിലയിരുത്തല്. കോണ്ഗ്രസ് വിട്ട് ഇടതുപക്ഷവുമായി ചേര്ന്ന് പ്രവര്ത്തിക്കുന്ന എ.വി. ഗോപിനാഥിനെ അര്ഹമായ സ്ഥാനത്ത് പ്രതിഷ്ഠിക്കണമെന്നത് മുഖ്യമന്ത്രിയുടെ താല്പര്യമായിരുന്നു.
പാലക്കാട് പെരിങ്ങോട്ടുകുറിശ്ശിയില് നടന്ന തദ്ദേശ തിരഞ്ഞെടുപ്പില് ഇടതു പിന്തുണയോടെ മത്സരിച്ചെങ്കിലും അദ്ദേഹം പരാജയപ്പെട്ടിരുന്നു. ഇതിന് പിന്നിലെ പ്രശ്നങ്ങളും പിണക്കങ്ങളും പരിഹരിക്കാന് മുഖ്യമന്ത്രി നേരിട്ട് ഗോപിനാഥുമായി ചര്ച്ച നടത്തിയിരുന്നു. തിരഞ്ഞെടുപ്പ് വിജ്ഞാപനം വരാനിരിക്കെ, മുന്കൂട്ടി ആലോചിച്ചാണ് ഈ രാഷ്ട്രീയ നീക്കം. ഇതിലൂടെ ഗോപിനാഥിനെ ആദരിക്കാനും പാലക്കാട് ഉള്പ്പെടെയുള്ള വടക്കന് മേഖലയിലെ രാഷ്ട്രീയ സാഹചര്യം അനുകൂലമാക്കാനും സിപിഎം ലക്ഷ്യമിടുന്നു.
ഗുരുവായൂര് ദേവസ്വം ചെയര്മാന് സ്ഥാനം താന് ഏറെ ആഗ്രഹിക്കുന്ന പദവിയാണെന്ന് ബിജെപി നേതാവ് സുരേഷ് ഗോപി നേരത്തെ പരസ്യമായി വ്യക്തമാക്കിയിരുന്നു. എന്നാല്, രാഷ്ട്രീയ സാഹചര്യങ്ങള് വിലയിരുത്തിയും ഗോപിനാഥിന്റെ ജനകീയത മുന്നിര്ത്തിയും ഇടതു സര്ക്കാര് തങ്ങളുടെ തീരുമാനവുമായി മുന്നോട്ട് പോവുകയായിരുന്നു. വി.കെ. വിജയന്റെ കാലാവധി ഈ മാസം 14-ന് അവസാനിക്കാനിരിക്കെയാണ് അടിയന്തരമായി രാജി വാങ്ങി ഗോപിനാഥിനെ അവരോധിക്കുന്നത്. ഔദ്യോഗിക പ്രഖ്യാപനം ഉടന് ഉണ്ടായേക്കും.
തിരുവനന്തപുരത്ത് സിപിഎമ്മും മുഖ്യമന്ത്രിയുമായും അടുപ്പമുള്ള ഒരു വ്യക്തിയും ചരടു വലികള് നടത്തിയിരുന്നു. എന്നാല് വടക്ക് നിന്നൊരാള് ഗുരുവായൂര് ദേവസ്വത്തെ നയിക്കട്ടേ എന്ന് പിണറായി തീരുമാനിക്കുകയായിരുന്നു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കേരളത്തിലെ ആദ്യ ഹൃദയം മാറ്റിവയ്ക്കൽ ശസ്ത്രക്രിയയ്ക്ക് വിധേയനായ മാത്യു അച്ചാടൻ അന്തരിച്ചു
