കണ്ണൂര്: ആരോഗ്യമന്ത്രി വീണാ ജോര്ജിന് നേരെ കണ്ണൂര് റെയില്വേ സ്റ്റേഷനിലുണ്ടായ പ്രതിഷേധത്തില് സി.പി.എം. ജില്ലാ സെക്രട്ടറി എം.വി. ജയരാജന് ഉയര്ത്തിയ ‘കറുത്ത തുണി’ വാദം ദൃശ്യങ്ങള് പുറത്തുവന്നതോടെ തകരുന്നു. മന്ത്രിയുടെ കഴുത്തിന് പരിക്കേറ്റത് പ്രതിഷേധക്കാരുടെ ആക്രമണത്തിലല്ലെന്നും, മറിച്ച് മന്ത്രിയെ സംരക്ഷിക്കാന് ശ്രമിക്കുന്നതിനിടെ സ്വന്തം ഗണ്മാന്റെ കൈകള് തട്ടിയാണോ എന്ന സംശയമാണ് ദൃശ്യങ്ങള് നല്കുന്നത്. ഇതോടെ കരിനീല സഫാരി സ്യൂട്ട് ധരിച്ച ഗണ്മാനെ പ്രതിഷേധക്കാരനാക്കി ചിത്രീകരിച്ച ഇടത് സൈബര് പ്രചാരണവും പൊളിഞ്ഞു.
മന്ത്രിയെ കെ.എസ്.യു. പ്രവര്ത്തകര് ആയുധം ഉപയോഗിച്ച് ആക്രമിച്ചുവെന്നും കറുത്ത തുണികൊണ്ട് കഴുത്തിന് മുറുക്കിയെന്നുമായിരുന്നു സി.പി.എം. ആരോപണം. എന്നാല് ലഭ്യമായ വീഡിയോ ദൃശ്യങ്ങളില് പ്രതിഷേധക്കാര് മന്ത്രിക്ക് അത്രയും അടുത്തുപോലും എത്തുന്നില്ല. മന്ത്രിയുടെ തൊട്ടുപിന്നാലെ കരിനീല സഫാരി സ്യൂട്ട് ധരിച്ച് മന്ത്രിയെ ചേര്ത്തുപിടിച്ച് നീങ്ങുന്നത് ഗണ്മാന് എം.എസ്. അഭിലാഷാണ്. ഈ സുരക്ഷാ ഉദ്യോഗസ്ഥന് മന്ത്രിയെ സംരക്ഷിക്കാന് ശ്രമിക്കുന്നതിനിടയില് കൈകള് മന്ത്രിയുടെ കഴുത്തിന് സമീപം വരുന്ന ദൃശ്യങ്ങളാണ് ‘കഴുത്ത് ഞെക്കി കൊല്ലാന് ശ്രമിച്ചു’ എന്ന കള്ളക്കഥയ്ക്ക് ആധാരമായി സൈബര് വിംഗുകള് ഉപയോഗിച്ചത്. ജയരാജന്റെ വാദം ശരിയാണെങ്കില്, മന്ത്രിയുടെ കഴുത്തിന് പരിക്കേല്പ്പിച്ചത് സ്വന്തം ഗണ്മാനാകാം എന്ന വിരോധാഭാസത്തിലേക്കാണ് കാര്യങ്ങള് നീങ്ങുന്നത്.
മന്ത്രിയെ ആക്രമിക്കുന്ന ദൃശ്യങ്ങള് റെയില്വേ സ്റ്റേഷനിലെ സി.സി.ടി.വി.യില് ഇല്ലെന്ന് റെയില്വേ സുരക്ഷാസേന (ആര്.പി.എഫ്.) വ്യക്തമാക്കിയിട്ടുണ്ട്. കരിങ്കൊടി പ്രതിഷേധം നടന്നുവെന്നല്ലാതെ മന്ത്രിയെ ശാരീരികമായി ഉപദ്രവിക്കുന്ന ദൃശ്യങ്ങളൊന്നും ലഭ്യമല്ല. ഇതോടെ വധശ്രമത്തിന് (സെക്ഷന് 307) കേസെടുത്ത പോലീസിന്റെ നടപടിയും നിയമപരമായി ചോദ്യം ചെയ്യപ്പെടും. മന്ത്രിയുടെ മൊഴി നേരിട്ടെടുക്കാന് കഴിയാതിരുന്ന സാഹചര്യത്തില് ഗണ്മാന്റെ മൊഴി മാത്രം ആധാരമാക്കി കേസെടുത്തതും ഇപ്പോള് പോലീസിന് തിരിച്ചടിയാവുകയാണ്.
മന്ത്രിയുടെ കഴുത്തിന് ക്ഷതമേറ്റതായി മെഡിക്കല് ബുള്ളറ്റിന് പറയുന്നുണ്ടെങ്കിലും ഇത് എങ്ങനെ സംഭവിച്ചു എന്നതില് വ്യക്തതയില്ല. പ്രതിഷേധക്കാര് ആയുധവുമായി മന്ത്രിയുടെ അടുത്തെത്തിയിട്ടില്ലെന്ന് ദൃശ്യങ്ങള് വ്യക്തമാക്കുമ്പോള്, ആശുപത്രി രേഖകള് രാഷ്ട്രീയ സമ്മര്ദ്ദത്തിന് വഴങ്ങിയാണോ എന്ന സംശയം പ്രതിപക്ഷം ഉയര്ത്തുന്നു.
സുരക്ഷാ ഉദ്യോഗസ്ഥന് തൊട്ടടുത്തുണ്ടായിട്ടും മന്ത്രിക്ക് പരിക്കേറ്റുവെങ്കില് അത് സുരക്ഷാ വീഴ്ചയാണോ അതോ സി.പി.എം. ആരോപിക്കുന്ന രീതിയിലുള്ള മര്ദ്ദനം നടന്നിട്ടേയില്ലേ എന്ന് വ്യക്തമാക്കാന് നിഷ്പക്ഷമായ അന്വേഷണം വേണമെന്ന് കോണ്ഗ്രസ് ആവശ്യപ്പെട്ടു. കരിനീല സഫാരി സ്യൂട്ടിനെ ‘കറുത്ത തുണി’യാക്കി മാറ്റിയ ജയരാജന്റെ മാജിക് രാഷ്ട്രീയ ആയുധമാക്കാനാണ് പ്രതിപക്ഷത്തിന്റെ നീക്കം.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
സംസ്ഥാനത്ത് കാലവര്ഷം കനക്കുന്നു; ഇന്നും ഒമ്പത് ജില്ലകളില് യെല്ലോ അലര്ട്ട്; മലയോര-തീരദേശ മേഖലകളില് അതീവ ജാഗ്രതാ നിര്ദ്ദേശം; വടക്കന് കേരളത്തില് ‘കള്ളക്കടല്’ ഭീതി
