തിരുവനന്തപുരം: അന്താരാഷ്ട്ര തലത്തില് വരെ വാഴ്ത്തപ്പെടുന്ന കേരളത്തിന്റെ ആരോഗ്യമേഖലയ്ക്ക് കനത്ത ആഘാതമേല്പ്പിച്ച് തലസ്ഥാനത്തെ മെഡിക്കല് കോളേജില് നിന്ന് വീണ്ടും മനുഷ്യമനസ്സാക്ഷിയെ ഞെട്ടിക്കുന്ന ക്രൂരത. ശസ്ത്രക്രിയ കഴിഞ്ഞ് അതീവ സുരക്ഷിതമായി സൂക്ഷിക്കേണ്ട തീവ്രപരിചരണ വിഭാഗത്തില് (ഐ.സി.യു) വച്ച് രോഗിയുടെ കാലില് പുഴു അരിച്ച സംഭവം മെഡിക്കല് കോളേജിന്റെ നാഥനില്ലാ കളരിയാണ് തുറന്നുകാട്ടുന്നത്. പുതിയ ആരോഗ്യമന്ത്രിയായി ചുമതലയേറ്റ കെ. മുരളീധരന് ഈ വിഷയത്തില് അടിയന്തരമായി ഇടപെട്ട് കുറ്റക്കാര്ക്കെതിരെ കര്ശന നടപടി സ്വീകരിക്കണമെന്നാണ് പൊതുസമൂഹത്തിന്റെ ആവശ്യം.
ലക്ഷക്കണക്കിന് പാവപ്പെട്ട രോഗികള്ക്ക് ഏക ആശ്രയമാകേണ്ട തിരുവനന്തപുരം മെഡിക്കല് കോളേജ് ആശുപത്രിയില് കടുത്ത നിസ്സംഗതയും ജീവനക്കാരുടെ അനാസ്ഥയും തുടര്ച്ചയായ വലിയ വിവാദങ്ങള്ക്കാണ് വഴിതുറക്കുന്നത്. കാല് മസിലിന് ഗുരുതരമായി പരിക്കേറ്റ് അടിയന്തര ശസ്ത്രക്രിയയ്ക്ക് വിധേയനായ രോഗിയുടെ മുറിവിലാണ് പുഴുക്കള് കൂടുകൂട്ടിയത്. ഐ.സി.യു.വില് ദിവസങ്ങളോളം കിടന്ന രോഗിയെ ജനറല് വാര്ഡിലേക്ക് മാറ്റിയപ്പോഴാണ് ഈ ഭീകരമായ കാഴ്ച പുറംലോകം കാണുന്നത്.
കഴിഞ്ഞ മേയ് 28-നാണ് മസിലിന് ഗുരുതരമായി പൊട്ടലേറ്റതിനെത്തുടര്ന്ന് രോഗിയെ മെഡിക്കല് കോളേജില് പ്രവേശിപ്പിച്ചത്. ഓപ്പറേഷന് ശേഷം ഐ.സി.യു.വില് നിരീക്ഷണത്തിലായിരുന്ന ഇയാളെ ഇന്ന് രാവിലെയാണ് വാര്ഡിലേക്ക് മാറ്റിയത്. വാര്ഡിലെത്തിച്ച രോഗിയുടെ കാലിലെ കെട്ടുകള്ക്കിടയിലൂടെ പുഴുക്കള് അരിച്ചുനടക്കുന്നത് കണ്ട് കൂടെയുണ്ടായിരുന്ന ബന്ധുക്കള് ഭയന്നുവിറയ്ക്കുകയായിരുന്നു. തുടര്ന്ന് ബന്ധുക്കള് ബഹളം വെച്ചതോടെയാണ് വാര്ഡിലെ ജീവനക്കാര് പോലും ഈ ഗുരുതരമായ വിവരം അറിയുന്നത്.
ശസ്ത്രക്രിയ കഴിഞ്ഞ രോഗികളുടെ മുറിവുകള് നിശ്ചിത സമയങ്ങളില് പരിശോധിച്ച് വൃത്തിയാക്കുകയും മരുന്ന് വെച്ചു കെട്ടുകയും ചെയ്യേണ്ടത് ഡ്യൂട്ടിയിലുള്ള നഴ്സുമാരുടെയും മറ്റ് ആരോഗ്യപ്രവര്ത്തകരുടെയും പ്രാഥമികമായ കടമയാണ്. എന്നാല് ദിവസങ്ങളോളം ഐ.സി.യു.വില് കിടന്ന രോഗിയുടെ കാലിലെ കെട്ടഴിച്ചു നോക്കാന് പോലും ആരും തയ്യാറായില്ലെന്നാണ് ബന്ധുക്കളുടെ ആക്ഷേപം. ഈ കടുത്ത അനാസ്ഥ മൂലം മുറിവില് ഈച്ച വന്നിരിക്കുകയും അത് പുഴുവരിക്കുകയുമായിരുന്നു.
ആരോഗ്യവകുപ്പിന്റെ തലപ്പത്തേക്ക് പുതുതായി എത്തിയ മന്ത്രി കെ. മുരളീധരന് മുന്നിലുള്ള വലിയൊരു വെല്ലുവിളിയാണ് തലസ്ഥാനത്തെ മെഡിക്കല് കോളേജിലെ ഈ അവസ്ഥ. മുന്പ് കോവിഡ് കാലത്തും സമാനമായ രീതിയില് രോഗിയുടെ ശരീരത്തില് പുഴുവരിച്ച സംഭവം വലിയ രാഷ്ട്രീയ കൊടുങ്കാറ്റ് ഉയര്ത്തിയിരുന്നു. ആ പഴയ പാഠങ്ങളില് നിന്ന് മെഡിക്കല് കോളേജ് അധികൃതര് ഒന്നും പഠിച്ചില്ലെന്നാണ് പുതിയ സംഭവം തെളിയിക്കുന്നത്. മന്ത്രി നേരിട്ടെത്തി ഈ ഉദ്യോഗസ്ഥ മാഫിയയ്ക്ക് കടിഞ്ഞാണിടണമെന്നാണ് ജനങ്ങള് ആവശ്യപ്പെടുന്നത്.
ലോകോത്തര നിലവാരമെന്ന് നാം അഭിമാനിക്കുന്ന ‘കേരള മോഡല്’ വെറും പരസ്യവാചകമായി ഒതുങ്ങുകയാണോ എന്ന ചോദ്യമാണ് ഇപ്പോള് ഉയരുന്നത്. സംസ്ഥാനത്തെ ഏറ്റവും വലിയ റഫറല് ആശുപത്രിയിലെ ഐ.സി.യു.വില് പോലും രോഗികള്ക്ക് സുരക്ഷിതത്വമില്ലെങ്കില് പിന്നെ സാധാരണക്കാര് എങ്ങോട്ട് പോകണം? പാവപ്പെട്ടവരുടെ ജീവന് വെച്ച് പന്താടുന്ന ഇത്തരം ആശുപത്രി സംവിധാനങ്ങള് അടിയന്തരമായി അഴിച്ചുപണിയാന് പുതിയ മന്ത്രി തയ്യാറാകണം.
സംഭവം പുറത്തറിഞ്ഞതോടെ മെഡിക്കല് കോളേജ് വാര്ഡില് വലിയ ജനരോഷമാണ് ഇരമ്പുന്നത്. കൃത്യമായ പരിചരണം നല്കുന്നതില് വീഴ്ച വരുത്തിയ ഡ്യൂട്ടി ഡോക്ടര്മാര്ക്കും നഴ്സിങ് ജീവനക്കാര്ക്കുമെതിരെ നരഹത്യയ്ക്ക് തുല്യമായ കുറ്റത്തിന് കേസെടുക്കണമെന്ന് ആവശ്യപ്പെട്ട് ബന്ധുക്കള് ആശുപത്രി സൂപ്രണ്ടിനും മെഡിക്കല് വിദ്യാഭ്യാസ ഡയറക്ടര്ക്കും (ഡി.എം.ഇ) പരാതി നല്കാന് ഒരുങ്ങുകയാണ്. ആരോഗ്യവകുപ്പിന്റെ ഭാഗത്തുനിന്ന് അടിയന്തരമായ ഒരു ഉന്നതതല അന്വേഷണം തന്നെയാണ് പൊതുസമൂഹം പ്രതീക്ഷിക്കുന്നത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
കൊച്ചി കമ്മീഷണറും കൊച്ചി റേഞ്ച് ഡിഐജിയും എസ് ഹരിശങ്കര്; കാര്ത്തിക്ക് തിരുവനന്തപുരം കമ്മീഷണര്; നിശാന്തിനിയ്ക്ക് പോലീസ് ആസ്ഥാനത്ത് ഐജി പദം; സിപിഐയുടെ എതിര്പ്പ് ‘എംആറിന്’ തിരിച്ചടി; പോലീസ് തലപ്പത്ത് അഴിച്ചു പണി
