നവീൻ ബാബുവിന്റെ മരണം സി.ബി.ഐക്ക്; വി.ഡി. സതീശൻ സർക്കാർ ഉടൻ വിജ്ഞാപനമിറക്കും; പി.പി. ദിവ്യയ്ക്കും കണ്ണൂരിലെ സി.പി.എം. നേതാക്കൾക്കും നെഞ്ചിടിപ്പ്; കുടുംബത്തിന്റെ കണ്ണീരൊപ്പി സർക്കാർ; പഴകുളം മധുവിന്റെ പോരാട്ടത്തിന് വിജയം

തിരുവനന്തപുരം: രാഷ്ട്രീയ കേരളത്തെ പിടിച്ചുകുലുക്കിയ കണ്ണൂർ മുൻ എ.ഡി.എം. കെ. നവീൻ ബാബുവിന്റെ ദുരൂഹ മരണക്കേസ് ഒടുവിൽ സി.ബി.ഐക്ക് വിടുന്നു. നവീൻ ബാബുവിന്റെ മരണത്തിന് കാരണക്കാരായവരെ നിയമത്തിന് മുന്നിൽ കൊണ്ടുവരുമെന്ന് നിയമസഭയ്ക്കുള്ളിലും പുറത്തും നൽകിയ ഉറപ്പ് പാലിച്ചുകൊണ്ട് മുഖ്യമന്ത്രി വി.ഡി. സതീശൻ കേസ് കേന്ദ്ര ഏജൻസിക്ക് കൈമാറാൻ ഉത്തരവിടുകയായിരുന്നു. സതീശൻ സർക്കാർ അധികാരമേറ്റ ശേഷം സി.ബി.ഐ. അന്വേഷണത്തിന് ഉത്തരവിടുന്ന ആദ്യ കേസാണിത്. ഇതുസംബന്ധിച്ച ഔദ്യോഗിക വിജ്ഞാപനം സർക്കാർ ഉടൻ പുറത്തിറക്കും.

കേസ് സി.ബി.ഐ. ഏറ്റെടുക്കുന്നതോടെ സി.പി.എം. കണ്ണൂർ മുൻ ജില്ലാ പഞ്ചായത്ത് പ്രസിഡന്റ് പി.പി. ദിവ്യ ഉൾപ്പെടെയുള്ള പ്രതികളിലേക്ക് അന്വേഷണം നീളുമെന്നാണ് സൂചന. സി.പി.എമ്മിലെ കണ്ണൂരിലെ പല പ്രമുഖ നേതാക്കളും നിലവിൽ ഈ കേസിൽ സംശയനിഴലിലാണ്. ഒരു സി.പി.എം. നേതാവിന്റെ ബിനാമി പെട്രോൾ പമ്പാണ് നവീൻ ബാബുവിന്റെ ജീവനെടുക്കാൻ കാരണമായതെന്ന ആക്ഷേപം ആദ്യമേ ശക്തമായിരുന്നു.

നവീൻ ബാബുവിന്റെ മരണവുമായി ബന്ധപ്പെട്ട് ആദ്യഘട്ടത്തിൽ ഉയർന്നുവന്ന അഴിമതി ആരോപണങ്ങളും തുടരന്വേഷണ ആവശ്യങ്ങളും ജനങ്ങളിലേക്ക് എത്തിക്കുന്നതിൽ കോൺഗ്രസ് നേതാവും റാന്നി എം.എൽ.എയുമായ പഴകുളം മധു നടത്തിയ വിട്ടുവീഴ്ചയില്ലാത്ത പോരാട്ടങ്ങൾ വലിയ രീതിയിൽ ശ്രദ്ധിക്കപ്പെട്ടിരുന്നു. കേസ് സി.ബി.ഐക്ക് വിട്ട സർക്കാർ തീരുമാനത്തോടെ രാഷ്ട്രീയ വൃത്തങ്ങളിലും പൊതുസമൂഹത്തിലും പഴകുളം മധുവിന്റെ നിലപാടുകൾക്ക് വലിയ കൈയടിയാണ് ലഭിക്കുന്നത്. നീതിക്ക് വേണ്ടിയുള്ള പോരാട്ടത്തിൽ കുടുംബത്തോടൊപ്പം ഉറച്ചുനിന്ന അദ്ദേഹത്തിന്റെ രാഷ്ട്രീയ നീക്കങ്ങൾക്ക് ലഭിച്ച വലിയൊരു അംഗീകാരം കൂടിയാണിത്.

ലോക്കൽ പോലീസ് കള്ളക്കളി നടത്തി; വഴിത്തിരിവായി ആ വെളിപ്പെടുത്തൽ നവീൻ ബാബുവിന്റെ മരണത്തിൽ ആദ്യഘട്ടത്തിൽ ലോക്കൽ പോലീസ് നടത്തിയ അന്വേഷണം വൻ വിവാദങ്ങൾക്കും ആക്ഷേപങ്ങൾക്കും വഴിവെച്ചിരുന്നു. കേസ് അന്വേഷിക്കാൻ ആദ്യം ചുമതലപ്പെടുത്തിയ ഉദ്യോഗസ്ഥൻ പിന്നീട് സർവീസിൽനിന്ന് മാറി സി.പി.എം. ജനപ്രതിനിധിയായി മാറിയത് ഈ കേസിന്റെ വലിയൊരു നാഴികക്കല്ലാണ്.

ഭരണകക്ഷിയുടെ ഉന്നത സ്വാധീനമുള്ള നേതാക്കളെ സംരക്ഷിക്കാൻ പോലീസ് ബോധപൂർവ്വം ശ്രമിക്കുന്നുവെന്നും, അന്വേഷണ ഉദ്യോഗസ്ഥന്റെ രാഷ്ട്രീയ പശ്ചാത്തലം കേസ് അട്ടിമറിക്കാൻ ഉപയോഗിച്ചുവെന്നും പ്രതിപക്ഷം നിരന്തരം ആരോപിച്ചിരുന്നു.

അന്വേഷണ ഉദ്യോഗസ്ഥൻ തന്നെ സി.പി.എം. ജനപ്രതിനിധിയായി പരസ്യമായി രംഗത്തുവന്നതോടെ പോലീസിന്റെ നിഷ്പക്ഷത പൂർണ്ണമായും ചോദ്യം ചെയ്യപ്പെട്ടു. ഈ ഗുരുതരമായ അട്ടിമറി ചൂണ്ടിക്കാണിച്ചാണ് നവീൻ ബാബുവിന്റെ കുടുംബം സംസ്ഥാന പോലീസിലുള്ള വിശ്വാസം നഷ്ടപ്പെട്ടുവെന്നും കേന്ദ്ര ഏജൻസി തന്നെ കേസ് അന്വേഷിക്കണമെന്നും ആവശ്യപ്പെട്ട് വി.ഡി. സതീശൻ സർക്കാരിനെ സമീപിച്ചത്.

നവീൻ ബാബുവിന്റെ മരണത്തിന് കാരണക്കാരായ സി.പി.എം. നേതാക്കളെ സംരക്ഷിക്കാൻ മുൻ സർക്കാർ കാണിച്ച അമിത താല്പര്യം പുതിയ സർക്കാർ തിരുത്തണമെന്നത് കുടുംബത്തിന്റെ വലിയൊരു ആവശ്യമായിരുന്നു. ഈ ആവശ്യം പൂർണ്ണമായി അംഗീകരിച്ചുകൊണ്ടാണ് മുഖ്യമന്ത്രി വി.ഡി. സതീശൻ നേരിട്ട് ഫയലിൽ ഒപ്പുവെച്ച് അന്വേഷണം സി.ബി.ഐക്ക് കൈമാറുന്നത്.

ലോക്കൽ പോലീസിന്റെ പരിധിയിൽനിന്നും കേസ് കേന്ദ്ര ഏജൻസിയുടെ കൈകളിലേക്ക് എത്തുന്നതോടെ സി.പി.എം. കോട്ടകളിൽ വലിയ ഭീതിയാണ് ഉയരുന്നത്.

പി.പി. ദിവ്യ ഉൾപ്പെടെയുള്ള നേതാക്കളെ സി.ബി.ഐ. വിശദമായ ചോദ്യം ചെയ്യലിലേക്ക് നീക്കുമെന്നും, കൃത്യമായ തെളിവുകളുടെ അടിസ്ഥാനത്തിൽ അറസ്റ്റ് ഉൾപ്പെടെയുള്ള കടുത്ത നടപടികളിലേക്ക് കടക്കുമെന്നുമാണ് നിയമവിദഗ്ദ്ധർ ചൂണ്ടിക്കാണിക്കുന്നത്.

നവീൻ ബാബുവിനെ മരണത്തിലേക്ക് തള്ളിവിട്ട ഗൂഢാലോചനയും അതിന് പിന്നിൽ പ്രവർത്തിച്ച കറുത്ത കൈകളും സി.ബി.ഐ. വലയിലാകുമെന്ന പ്രതീക്ഷയിലാണ് കുടുംബവും പൊതുസമൂഹവും.