കല്പറ്റ: വയനാട് മുണ്ടക്കൈ-ചൂരല്മല ഉരുള്പൊട്ടല് ദുരന്തബാധിതര്ക്കായി നിര്മ്മിക്കുന്ന പുനരധിവാസ ടൗണ്ഷിപ്പിലെ വീടുകളില് വിള്ളല് കണ്ടെത്തിയത് വലിയ ആശങ്കയ്ക്ക് വഴിവെക്കുന്നു. ആദ്യഘട്ടത്തില് കൈമാറാനിരുന്ന 178 വീടുകളില് ചിലതിനാണ് ഇപ്പോള് വിള്ളല് ദൃശ്യമായിരിക്കുന്നത്.
ഇതോടെ ഈ മാസവും ടൗണ്ഷിപ്പ് താമസയോഗ്യമാകില്ലെന്ന സൂചനയാണ് പുറത്തുവരുന്നത്. നിര്മ്മാണം അവസാനഘട്ടത്തില് എത്തിനില്ക്കെ കെട്ടിടങ്ങളുടെ ഗുണനിലവാരത്തില് സംശയം ഉയര്ന്നത് മാസങ്ങളായി വാടകവീടുകളിലും മറ്റും കഴിയുന്ന ദുരന്തബാധിതരെ മാനസികമായി തളര്ത്തുകയാണ്. മഴക്കാലം പടിവാതില്ക്കല് എത്തിനില്ക്കെ പുനരധിവാസം വൈകുന്നത് വലിയ പ്രതിസന്ധിയുണ്ടാക്കും.
പുഞ്ചിരിമട്ടം സ്വദേശി കെ.ടി. നൗഫലിന് സോണ് ഒന്നിലെ ക്ലസ്റ്റര് ‘എ’യില് ലഭിച്ച എട്ടാം നമ്പര് വീടിന്റെ മേല്ക്കൂരയിലാണ് വിള്ളലുണ്ടായത്. ടെറസിലെ വിള്ളലിലൂടെ മഴ പെയ്തപ്പോള് വീടിനുള്ളിലേക്ക് വെള്ളം ചോര്ന്നതായും പരാതിയുണ്ട്. ഡൈനിങ് ഹാളിന്റെ സീലിങ്ങിലും വിള്ളല് വ്യക്തമാണ്. ഉരുള്പൊട്ടലില് സഹോദരങ്ങള് ഉള്പ്പെടെ 16 കുടുംബാംഗങ്ങളെ നഷ്ടപ്പെട്ട നൗഫലിന്, പുഞ്ചിരിമട്ടത്ത് താന് ഏറെ ആഗ്രഹിച്ച് പണിത വീടും പ്രകൃതിക്ഷോഭത്തില് നഷ്ടമായിരുന്നു. പുതിയ ജീവിതം തുടങ്ങാന് ലഭിച്ച ടൗണ്ഷിപ്പിലെ വീടിനും ബലക്ഷയമുണ്ടെന്ന വാര്ത്ത നൗഫലിനെയും മറ്റ് ഗുണഭോക്താക്കളെയും ഒരുപോലെ ഭയപ്പെടുത്തുന്നു.
കനത്ത ചൂടില് പുതിയ കോണ്ക്രീറ്റ് ചുരുങ്ങിയതിനെത്തുടര്ന്ന് ഉണ്ടായ സ്വാഭാവിക വിള്ളലാണിതെന്നും ആശങ്കപ്പെടേണ്ട സാഹചര്യമില്ലെന്നുമാണ് നിര്മ്മാണച്ചുമതലയുള്ള ഊരാളുങ്കല് ലേബര് കോണ്ട്രാക്ട് കോപ്പറേറ്റീവ് സൊസൈറ്റി (യു.എല്.സി.സി.എസ്.) അധികൃതരുടെ വിശദീകരണം. വിള്ളല് ശ്രദ്ധയില്പ്പെട്ട ഉടനെ അപ്പോക്സി പ്രഷര് ഗ്രൗട്ടിങ് നടത്തി പരിഹരിച്ചതായും ഇനി വാട്ടര് പ്രൂഫ് ചെയ്ത ശേഷം അഞ്ച് സെന്റീമീറ്റര് കനത്തില് കോണ്ക്രീറ്റ് ചെയ്യുമെന്നും അധികൃതര് അറിയിച്ചു. എന്നാല്, കാലവര്ഷം തുടങ്ങുന്നതിന് മുന്പ് സുരക്ഷിതമായ വീട്ടിലേക്ക് മാറാന് കാത്തിരിക്കുന്ന ദുരന്തബാധിതര്ക്ക് ഈ വിശദീകരണം പൂര്ണ്ണമായ ആശ്വാസം നല്കുന്നില്ല.
മഴക്കാലത്തിന് മുന്പേ വീടുകള് കൈമാറുമെന്ന് അധികൃതര് ഉറപ്പുനല്കുന്നുണ്ടെങ്കിലും നിലവിലെ അറ്റകുറ്റപ്പണികള് പൂര്ത്തിയാക്കാന് കൂടുതല് സമയമെടുത്തേക്കും. വെള്ളം കെട്ടിനിര്ത്തിയുള്പ്പെടെയുള്ള പരിശോധനകള്ക്ക് ശേഷമേ വീടുകള് ഗുണഭോക്താക്കള്ക്ക് നല്കൂ എന്ന് അധികൃതര് വ്യക്തമാക്കുന്നു. എങ്കിലും, ഒരു മഹാദുരന്തത്തെ അതിജീവിച്ചെത്തിയവര്ക്ക് താമസിക്കാന് നല്കുന്ന വീടുകള്ക്ക് നിര്മ്മാണത്തിന്റെ ആദ്യഘട്ടത്തില് തന്നെ വിള്ളലുകള് സംഭവിക്കുന്നത് വലിയ തോതിലുള്ള വിമര്ശനങ്ങള്ക്ക് വഴിമരുന്നിട്ടിരിക്കുകയാണ്. മുണ്ടക്കൈയിലെയും ചൂരല്മലയിലെയും നൂറുകണക്കിന് കുടുംബങ്ങളുടെ ഭാവി ആശങ്കയുടെ നിഴലിലാവുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വിഭാഗീയതയില് വിട്ടുവീഴ്ചയില്ല: സൂസന് കോടിക്ക് മഹിളാ അസോസിയേഷന് പദവിയും നഷ്ടമായി; കരുനാഗപ്പള്ളിയില് ‘വെട്ടിനിരത്തല്’ തുടര്ന്ന് സി.പി.എം; ദിവ്യയ്ക്കൊപ്പം സൂസന് കോടിയ്ക്കും നഷ്ടക്കഥ
