വാഷിംഗ്ടണ്: ഇറാന് ആയുധങ്ങള് കൈമാറാനുള്ള ചൈനയുടെ നീക്കത്തിനെതിരെ കര്ശന മുന്നറിയിപ്പുമായി അമേരിക്കന് പ്രസിഡന്റ് ഡൊണാള്ഡ് ട്രംപ്. സമാധാന ചര്ച്ചകള് പുരോഗമിക്കുന്നതിനിടെ ഇറാനിലേക്ക് ചൈന ആയുധങ്ങള് എത്തിച്ചാല് അത് വലിയ പ്രത്യാഘാതങ്ങള്ക്ക് വഴിവെക്കുമെന്ന് ട്രംപ് വ്യക്തമാക്കി.
വരും ആഴ്ചകളില് ഇറാനിലേക്ക് ആധുനിക വ്യോമപ്രതിരോധ സംവിധാനങ്ങള് അയക്കാന് ചൈന തയ്യാറെടുക്കുന്നതായി അന്താരാഷ്ട്ര മാധ്യമങ്ങള് റിപ്പോര്ട്ട് ചെയ്തിരുന്നു. ഇതിന്റെ പശ്ചാത്തലത്തിലാണ് ട്രംപിന്റെ പ്രതികരണം. ‘ചൈന അത്തരമൊരു നീക്കത്തിന് മുതിര്ന്നാല് അവര് വലിയ പ്രതിസന്ധിയിലാകും,’ ട്രംപ് പറഞ്ഞു. ചൈനയുടെ നീക്കങ്ങളെ അമേരിക്ക സസൂക്ഷ്മം നിരീക്ഷിച്ചു വരികയാണെന്നും അദ്ദേഹം കൂട്ടിച്ചേര്ത്തു.
മൂന്നാം രാജ്യങ്ങള് വഴി ഇറാനിലേക്ക് ആന്റി എയര്ക്രാഫ്റ്റ് മിസൈല് സംവിധാനങ്ങള് ചൈന രഹസ്യമായി എത്തിക്കുന്നതായി യുഎസ് രഹസ്യാന്വേഷണ ഏജന്സികളെ ഉദ്ധരിച്ച് ന്യൂയോര്ക്ക് ടൈംസും സിഎന്എന്നും റിപ്പോര്ട്ട് ചെയ്തു. ആയുധങ്ങളുടെ ഉറവിടം മറച്ചുവെക്കാനാണ് ഇത്തരത്തില് സങ്കീര്ണ്ണമായ മാര്ഗ്ഗങ്ങള് ഉപയോഗിക്കുന്നതെന്നാണ് റിപ്പോര്ട്ടുകള് സൂചിപ്പിക്കുന്നത്.
എന്നാല് ഈ ആരോപണങ്ങള് വാഷിംഗ്ടണിലെ ചൈനീസ് എംബസി പൂര്ണ്ണമായും നിഷേധിച്ചു. തങ്ങള് ഒരു പക്ഷത്തിനും ആയുധങ്ങള് നല്കുന്നില്ലെന്നും ഉത്തരവാദിത്തമുള്ള രാജ്യമെന്ന നിലയില് ചൈന അന്താരാഷ്ട്ര ബാധ്യതകള് നിറവേറ്റുന്നുണ്ടെന്നും എംബസി വക്താവ് വ്യക്തമാക്കി. അടിസ്ഥാനരഹിതമായ ആരോപണങ്ങള് ഉന്നയിക്കുന്നതില് നിന്ന് അമേരിക്ക പിന്മാറണമെന്നും ചൈന ആവശ്യപ്പെട്ടു.
ആറാഴ്ച നീണ്ട യുദ്ധത്തിന് ശേഷം കഴിഞ്ഞ ബുധനാഴ്ച പ്രഖ്യാപിച്ച വെടിനിര്ത്തലിനെത്തുടര്ന്ന് പാകിസ്താന് തലസ്ഥാനമായ ഇസ്ലാമാബാദില് യുഎസ്-ഇറാന് സമാധാന ചര്ച്ചകള് ശനിയാഴ്ച ആരംഭിച്ചിരുന്നു. ചര്ച്ചകളുടെ ഗതിയെന്തായാലും വിജയം അമേരിക്കയ്ക്കൊപ്പമാണെന്ന നിലപാടാണ് ട്രംപ് സ്വീകരിച്ചത്. ചര്ച്ചകളില് ഉടമ്പടി ഉണ്ടായാലും ഇല്ലെങ്കിലും തനിക്ക് ആശങ്കയില്ലെന്നും അദ്ദേഹം പറഞ്ഞു.
ഇറാന്റെ പരാജയം ഇതിനകം പൂര്ത്തിയായതായും ഒരു കരാര് ഉണ്ടായാലും ഇല്ലെങ്കിലും അമേരിക്കയ്ക്ക് നേട്ടമാണെന്നും ട്രംപ് അവകാശപ്പെട്ടു. ‘എന്തുതന്നെ സംഭവിച്ചാലും ഞങ്ങള് വിജയിച്ചു. ആ രാജ്യത്തെ ഞങ്ങള് പൂര്ണ്ണമായും തോല്പ്പിച്ചു കഴിഞ്ഞു. കരാര് ഉണ്ടായാലും ഇല്ലെങ്കിലും അമേരിക്കയുടെ കാഴ്ചപ്പാടില് ഞങ്ങള് ജയിച്ചു കഴിഞ്ഞു,’ അദ്ദേഹം ആത്മവിശ്വാസം പ്രകടിപ്പിച്ചു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഉക്രൈന് യുദ്ധം അവസാനിച്ചാല് വെറും ഒരു വര്ഷത്തിനുള്ളില് റഷ്യ നാറ്റോ സഖ്യത്തിനെതിരെ സായുധ പോരാട്ടത്തിന് മുതിര്ന്നേക്കാമെന്ന് യൂറോപ്യന് രഹസ്യാന്വേഷണ ഏജന്സി; യൂറോപ്പ് നേരിടുന്ന ഏറ്റവും വലിയ ഭീഷണി പുടിന്
