തിരുവനന്തപുരം: കുംഭമേള വൈറല് താരത്തിന്റെ വിവാദ വിവാഹത്തില് തമ്പാനൂര് പോലീസിന് സംഭവിച്ചത് അക്ഷന്തവ്യമായ വീഴ്ചയെന്ന് വിലയിരുത്തല്. വിവാഹ സമയത്ത് പെണ്കുട്ടിക്ക് പ്രായപൂര്ത്തിയായില്ലെന്ന് കാണിച്ച് മാതാപിതാക്കള് നല്കിയ പരാതി അവഗണിച്ചതാണ് പോലീസിനെ ഇപ്പോള് വെട്ടിലാക്കിയിരിക്കുന്നത്. സംഭവത്തില് ദേശീയ കമ്മീഷന് ഡി.ജി.പി.യെ നേരിട്ട് വിളിച്ചുവരുത്തിയതോടെ പോലീസ് ആസ്ഥാനത്ത് അടിയന്തര നടപടികള്ക്ക് നീക്കം തുടങ്ങി.
വിവാഹദിവസം പെണ്കുട്ടിയുടെ അച്ഛനും അമ്മയും തമ്പാനൂര് സ്റ്റേഷനിലെത്തി തങ്ങളുടെ മകള്ക്ക് പ്രായപൂര്ത്തിയായിട്ടില്ലെന്ന് വാവിട്ടുകരഞ്ഞ് പറഞ്ഞിട്ടും ഉദ്യോഗസ്ഥര് ചെവിക്കൊണ്ടില്ലെന്നാണ് ആക്ഷേപം. മാതാപിതാക്കള് നല്കിയ ആധികാരികമായ ജനനരേഖകള് തള്ളിക്കളഞ്ഞ പോലീസ്, വിവാഹസംഘം ഫോണിലൂടെ കാണിച്ച വ്യാജലിങ്കിലെ രേഖകള് വിശ്വസിക്കുകയായിരുന്നു. നിയമപരമായ രേഖകള് പരിശോധിക്കുന്നതില് ഉദ്യോഗസ്ഥര് കാട്ടിയ അലംഭാവമാണ് ഇപ്പോള് പോലീസിന്റെ അന്തസ്സിനെത്തന്നെ ബാധിച്ചിരിക്കുന്നത്.
2009-ല് ജനിച്ച പെണ്കുട്ടിക്ക് വിവാഹസമയത്ത് 16 വയസ്സ് മാത്രമേ ഉണ്ടായിരുന്നുള്ളൂ എന്ന് കമ്മീഷന് ശാസ്ത്രീയമായി കണ്ടെത്തിയിട്ടുണ്ട്. അതായത്, ഒരു ബാലവിവാഹത്തിന് കേരളാ പോലീസ് അറിഞ്ഞോ അറിയാതെയോ കാവല് നിന്നു എന്ന ഗൗരവകരമായ സാഹചര്യമാണ് നിലവിലുള്ളത്. വ്യാജ രേഖകള് ചമച്ച് പോലീസിന്റെ കണ്ണുവെട്ടിക്കാന് അന്യസംസ്ഥാന സംഘത്തിന് എങ്ങനെ സാധിച്ചു എന്നതില് ദുരൂഹത ഏറുകയാണ്.
ഏപ്രില് 22-ന് ഡല്ഹിയില് നേരിട്ട് ഹാജരാകാനാണ് ദേശീയ കമ്മീഷന് ഡി.ജി.പി.ക്ക് നല്കിയിരിക്കുന്ന നിര്ദ്ദേശം. ബാലവിവാഹത്തിന് ഒത്താശ ചെയ്തെന്നും പോക്സോ പ്രതിയെ സംരക്ഷിക്കാന് ശ്രമിച്ചെന്നുമുള്ള ഗുരുതര ആരോപണങ്ങളില് ഉന്നത ഉദ്യോഗസ്ഥര് മറുപടി പറയേണ്ടി വരും. രാഷ്ട്രീയ നേതാക്കള് ഉള്പ്പെടെ പങ്കെടുത്ത വിവാഹം നിയമവിരുദ്ധമാണെന്ന് തെളിഞ്ഞത് സര്ക്കാരിനും തലവേദനയായിട്ടുണ്ട്.
സംഭവത്തില് തമ്പാനൂര് സ്റ്റേഷനിലെ ഉദ്യോഗസ്ഥര്ക്കെതിരെ ആഭ്യന്തര അന്വേഷണം പ്രഖ്യാപിച്ചേക്കും. കൃത്യവിലോപം നടത്തിയവര്ക്കെതിരെ കര്ശന നടപടിയുണ്ടാകുമെന്ന് ഡി.ജി.പി.യുമായി അടുത്ത വൃത്തങ്ങള് സൂചിപ്പിച്ചു. ഒപ്പം വ്യാജ സര്ട്ടിഫിക്കറ്റ് നിര്മ്മിച്ച ഏജന്റുമാരെ കണ്ടെത്താന് പ്രത്യേക അന്വേഷണവും ആരംഭിക്കും.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ആ കുംഭമേള കല്യാണത്തിന് അനുമതി കൊടുത്തത് ആധാര് നോക്കി; വീഴ്ച പറ്റിയിട്ടില്ലെന്ന് തമ്പാനൂര് പോലീസ്; വൈറല് വിവാഹത്തില് അടിമുടി ദുരൂഹം; പോലീസ് റിപ്പോര്ട്ട് ഡിജിപിക്ക്
