തിരുവനന്തപുരം: സംസ്ഥാനത്തെ ഐ.പി.എസ്. ഉദ്യോഗസ്ഥരുടെ ഡെപ്യൂട്ടേഷന് തസ്തികകളുമായി ബന്ധപ്പെട്ട് കടുത്ത അഴിമതിയും സുതാര്യതക്കുറവും നിലനില്ക്കുന്നതായി ആക്ഷേപം. മുകള്ത്തട്ടിലെ ഉയര്ന്ന തസ്തികകള് കൃത്രിമമായി നിലനിര്ത്താന് വേണ്ടി പൊതുഭരണവകുപ്പ് എണ്ണം പെരുപ്പിച്ചു കാട്ടുകയാണെന്ന വിമര്ശനമാണ് ഇപ്പോള് സേനയ്ക്കുള്ളില് തന്നെ ശക്തമാകുന്നത്. പോലീസ് ഭരണസംവിധാനത്തില് വലിയ രീതിയിലുള്ള പുനഃക്രമീകരണത്തിനൊരുങ്ങുന്ന വി.ഡി. സതീശന് സര്ക്കാര്, ഇത്തരം വ്യക്തതയില്ലാത്ത ഡെപ്യൂട്ടേഷന് തസ്തികകള് പൂര്ണ്ണമായും അവസാനിപ്പിക്കാനും യോഗ്യരായ ഉദ്യോഗസ്ഥരെ തിരികെ യഥാര്ത്ഥ ഡ്യൂട്ടി തസ്തികകളിലേക്ക് എത്തിക്കാനുമുള്ള കടുത്ത നീക്കങ്ങളിലേക്ക് കടക്കുകയാണ്.
കേന്ദ്ര പേഴ്സണല് മന്ത്രാലയത്തിന്റെ ഔദ്യോഗിക വിജ്ഞാപനപ്രകാരം കേരള കേഡറിലുള്ള 172 ഐ.പി.എസ്. ഉദ്യോഗസ്ഥരില് 37 പേര് കേന്ദ്ര ഡെപ്യൂട്ടേഷനിലും 23 പേര് സംസ്ഥാന ഡെപ്യൂട്ടേഷനിലും പോകേണ്ടതുണ്ട്. എന്നാല് ഒരുകാലത്തും ഇത്രയും തസ്തികകളില് ആളുകളെ നിയമിക്കാറില്ല. ആകെയുള്ള 60 ഡെപ്യൂട്ടേഷന് തസ്തികകളില് പകുതിയില് താഴെ മാത്രമാണ് യഥാര്ത്ഥത്തില് നിയമനം നടക്കുന്നത്.
പോലീസിലെ മുകള്ത്തട്ടിലുള്ള ഡി.ജി.പി., എ.ഡി.ജി.പി. തസ്തികകളുടെ എണ്ണം കുറയാതിരിക്കാന് വേണ്ടി മാത്രമാണ് നിയമനം നടത്താതെ ഈ ഡെപ്യൂട്ടേഷന് തസ്തികകള് എണ്ണത്തില് കൂടുതല് കാണിക്കുന്നതെന്നാണ് സേനയ്ക്കുള്ളിലെ പ്രധാന വിമര്ശനം. 172 ഐ.പി.എസ്. ഉദ്യോഗസ്ഥരുണ്ട് എന്ന വ്യാജ കണക്കിന്റെ അടിസ്ഥാനത്തിലാണ് കേന്ദ്രത്തില് നിന്ന് എ.ഡി.ജി.പി., ഡി.ജി.പി. തസ്തികകള് സംസ്ഥാനം നിലനിര്ത്തിപ്പോരുന്നത്.
എസ്.പി. മുതല് മുകളിലേക്കുള്ള സീനിയര് ഡ്യൂട്ടി പോസ്റ്റുകളുടെ എണ്ണം സംസ്ഥാനത്ത് ആകെ 94 മാത്രമാണ്. ഇതിന്റെ അടിസ്ഥാനത്തിലാണ് പരമാവധി 37 പേര്ക്ക് കേന്ദ്ര ഡെപ്യൂട്ടേഷനും 23 പേര്ക്ക് സംസ്ഥാന ഡെപ്യൂട്ടേഷനും അനുവദിച്ചിരിക്കുന്നത്. എന്നാല് മിക്കപ്പോഴും മൂന്നോ നാലോ പേരെ മാത്രമാണ് സംസ്ഥാന ഡെപ്യൂട്ടേഷനിലേക്ക് വിടാറുള്ളത്.
ബാക്കി വരുന്ന 23 സംസ്ഥാന ഡെപ്യൂട്ടേഷന് തസ്തികകള് ഏതൊക്കെയാണെന്ന കാര്യത്തില് പൊതുഭരണവകുപ്പിന് ഇപ്പോഴും യാതൊരു വ്യക്തതയുമില്ല. വിവരാവകാശ നിയമപ്രകാരം ചോദിക്കുന്ന ചോദ്യങ്ങള്ക്ക് പോലും കൃത്യമായ മറുപടി നല്കാന് വകുപ്പ് തയ്യാറാകാത്തത് ഈ മേഖലയിലെ ദുരൂഹത വര്ദ്ധിപ്പിക്കുന്നു. ഐ.ബി., സി.ബി.ഐ., എന്.ഐ.എ. തുടങ്ങിയ കേന്ദ്ര ഏജന്സികളിലേക്ക് ഉദ്യോഗസ്ഥരുടെ അനുവാദം കൂടാതെ തന്നെ ഡെപ്യൂട്ടേഷന് നല്കാന് നിയമപരമായി വ്യവസ്ഥയുണ്ടായിട്ടും പകുതിപ്പേരെപ്പോലും അങ്ങോട്ട് അയക്കാത്തത് ഉന്നത തസ്തികകള് സംരക്ഷിക്കാനുള്ള ഉദ്യോഗസ്ഥ ലോബിയുടെ തന്ത്രമായാണ് വിലയിരുത്തപ്പെടുന്നത്.
പോലീസിന്റെ ഔദ്യോഗിക സിവില് ലിസ്റ്റ് അനുസരിച്ച് ഈ വര്ഷം ജനുവരി ഒന്നിന് സംസ്ഥാനത്ത് ആകെ 146 ഐ.പി.എസ്. ഉദ്യോഗസ്ഥര് മാത്രമാണുള്ളത്. യാഥാര്ത്ഥ്യം ഇതായിരിക്കെ, 60 ഡെപ്യൂട്ടേഷന് തസ്തികകളുണ്ടെന്ന് കേന്ദ്ര ആഭ്യന്തര മന്ത്രാലയത്തെ തെറ്റിദ്ധരിപ്പിച്ചാണ് കേഡര് ബലം 172 ആയി നിലനിര്ത്തിയിരിക്കുന്നത്.
ഈ പശ്ചാത്തലത്തിലാണ് വി.ഡി. സതീശന് സര്ക്കാര് പോലീസിലെ ഈ അനാവശ്യ തസ്തികപ്പെരുപ്പം അവസാനിപ്പിക്കാന് ഒരുങ്ങുന്നത്. അനാവശ്യമായി ആളില്ലാതെ ഇട്ടിരിക്കുന്ന ഡെപ്യൂട്ടേഷന് തസ്തികകള് റദ്ദാക്കാനും, നിലവില് ഡെപ്യൂട്ടേഷന്റെ പേരില് മറ്റ് കസേരകളില് ഇരിക്കുന്ന യോഗ്യരായ ഉദ്യോഗസ്ഥരെ ക്രമസമാധാന ചുമതലകളിലേക്ക് തിരികെ എത്തിക്കാനും ആഭ്യന്തര വകുപ്പ് നടപടികള് ആരംഭിച്ചു കഴിഞ്ഞു. ഡെപ്യൂട്ടേഷന് തസ്തികകള് സുതാര്യമാക്കുന്നതോടെ ഡി.ജി.പി, എ.ഡി.ജി.പി റാങ്കിലുള്ള പല തസ്തികകളുടെയും എണ്ണം കുറയേണ്ടി വരുമെന്നതിനാല് ഐ.പി.എസ്. ലോബിക്കുള്ളില് പുതിയ നീക്കങ്ങള് വലിയ ചര്ച്ചയായി മാറിയിട്ടുണ്ട്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
തെരഞ്ഞെടുപ്പ് കമ്മീഷന്റെ കര്ശന ഇടപെടല്; മുഖ്യമന്ത്രിയുടെ മണ്ഡലത്തിലടക്കം ഉദ്യോഗസ്ഥര്ക്ക് പുതിയ ചുമതല; ഐ.എ.എസ്, ഐ.പി.എസ് തലപ്പത്ത് അഴിച്ചുപണി; അഞ്ച് മുതിര്ന്ന ഉദ്യോഗസ്ഥരെ മാറ്റി നിയമിച്ച് കേന്ദ്ര തെരഞ്ഞെടുപ്പ് കമ്മീഷന്
