ശശി തരൂര്‍ മത്സരിക്കില്ല; അനന്തപുരിയില്‍ ചാണക്യതന്ത്രവുമായി യു.ഡി.എഫ്: മുരളി ‘സ്റ്റാര്‍’; തിരുവനന്തപുരം സിപി ജോണിന് തന്നെ; നേമത്ത് വൈഷ്ണാ സുരേഷ് അട്ടിമറി നടത്തുമോ? മുട്ടടയിലെ വിസ്മയം നേമത്ത് വീണ്ടും ആവര്‍ത്തിക്കുമോ?

തിരുവനന്തപുരം: നിയമസഭാ തിരഞ്ഞെടുപ്പിന്റെ കാഹളം മുഴങ്ങാന്‍ മാസങ്ങള്‍ ബാക്കിനില്‍ക്കെ, കേരള രാഷ്ട്രീയത്തിന്റെ ഹൃദയഭൂമിയായ തിരുവനന്തപുരത്ത് അപ്രതീക്ഷിത നീക്കങ്ങളുമായി യു.ഡി.എഫ് ക്യാമ്പ്. തോറ്റവനെ വിജയിയാക്കിയും, പഴയ പുലിക്കുട്ടികളെ തിരിച്ചിറക്കിയും തലസ്ഥാനത്തിന്റെ ചുവപ്പ് കോട്ടകള്‍ തകര്‍ക്കാനാണ് ഇക്കുറി കോണ്‍ഗ്രസ് പദ്ധതിയിടുന്നത്. എന്നാല്‍ ഈ സീറ്റ് വിഭജനത്തിന് പിന്നില്‍ രാഷ്ട്രീയക്കളികള്‍ക്കപ്പുറം വൈകാരികമായ ചില ‘അഡ്ജസ്റ്റ്മെന്റുകള്‍’ ഉണ്ടോ എന്നാണ് അണിയറയിലെ സംസാരം.

ശശി തരൂര്‍ ഇക്കുറി നിയമസഭാ ഗോദയിലുണ്ടാകില്ലെന്നത് അണികളെ ഞെട്ടിച്ചിട്ടുണ്ട്. എന്നാല്‍ ആ വിടവ് നികത്താന്‍ ‘അനന്തപുരിയുടെ കനല്‍ത്തരി’ കെ. മുരളീധരനെ തന്നെ ഹൈക്കമാന്‍ഡ് രംഗത്തിറക്കുന്നു. വട്ടിയൂര്‍ക്കാവ് തിരിച്ചുപിടിക്കാന്‍ മുരളിയല്ലാതെ മറ്റൊരു മരുന്നില്ലെന്ന തിരിച്ചറിവിലാണ് ഈ നീക്കം. തിരുവനന്തപുരം സെന്‍ട്രല്‍ സീറ്റില്‍ ഇക്കുറി കോണ്‍ഗ്രസ് കൈപ്പത്തി പതിക്കില്ല. സി.എം.പി നേതാവ് സി.പി. ജോണിനായി ഈ സീറ്റ് വിട്ടുനല്‍കാന്‍ മുസ്ലീം ലീഗ് ഉള്‍പ്പെടെയുള്ള ഘടകകക്ഷികള്‍ സമ്മര്‍ദ്ദം ചെലുത്തിയതായാണ് വിവരം. സ്വന്തം തട്ടകത്തില്‍ നിന്ന് സി.പി. ജോണിന് വഴിമാറിക്കൊടുത്ത് മുന്‍ മന്ത്രി വി.എസ്. ശിവകുമാര്‍ അരുവിക്കരയിലേക്ക് വണ്ടി കയറുന്നത് കോണ്‍ഗ്രസ് രാഷ്ട്രീയത്തിലെ വിട്ടുവീഴ്ചയുടെ പുതിയ അധ്യായമായി മാറും.

 ബി.ജെ.പിയുടെ ഉരുക്കുകോട്ടയായ നേമത്ത് എസ്.എഫ്.ഐയുടെ കുന്തമുനകളെ നേരിടാന്‍ കെ.എസ്.യുവിന്റെ പെണ്‍കരുത്തായ വൈഷ്ണ സുരേഷിനെയാണ് യു.ഡി.എഫ് നിയോഗിക്കുന്നത്. നെയ്യാറ്റിന്‍കരയില്‍ തന്റെ പഴയ പ്രതാപം വീണ്ടെടുക്കാന്‍ മുന്‍ സ്പീക്കര്‍ എന്‍. ശക്തന്‍ വീണ്ടും അങ്കത്തിനിറങ്ങുന്നു. നെയ്യാറ്റിന്‍കര സനലാകട്ടെ പാറശ്ശാലയില്‍ തന്റെ ഭാഗ്യം പരീക്ഷിക്കാനും. ഘടകകക്ഷികളെ തൃപ്തിപ്പെടുത്താനുള്ള കോണ്‍ഗ്രസിന്റെ ഈ നീക്കം താഴെത്തട്ടിലുള്ള പ്രവര്‍ത്തകര്‍ എങ്ങനെ സ്വീകരിക്കുമെന്നത് കണ്ടറിയണം. പ്രത്യേകിച്ചും സി.എം.പിക്കായി ഉറച്ച സീറ്റുകള്‍ വിട്ടുനല്‍കുന്നതിലെ അപകടം പലരും ചൂണ്ടിക്കാട്ടുന്നുണ്ട്.

വൈഷ്ണ സുരേഷിനെ കോണ്‍ഗ്രസ് നേമത്തേക്ക് പരിഗണിക്കാന്‍ പ്രധാന കാരണം 2025-ലെ തദ്ദേശ തിരഞ്ഞെടുപ്പിലെ പ്രകടനമാണ്. തിരുവനന്തപുരം കോര്‍പ്പറേഷനിലെ സി.പി.എമ്മിന്റെ ഉറച്ച കോട്ടയായ മുട്ടട വാര്‍ഡില്‍ വോട്ടര്‍ പട്ടികയില്‍ നിന്നുള്ള അയോഗ്യതാ വിവാദങ്ങളെയെല്ലാം അതിജീവിച്ച് വൈഷ്ണ അട്ടിമറി വിജയം നേടിയിരുന്നു. ഇടത് തട്ടകങ്ങളില്‍ വിള്ളലുണ്ടാക്കാന്‍ ഈ യുവനേതാവിന് കഴിയുമെന്ന വിശ്വാസമാണ് നേമത്തെ സ്ഥാനാര്‍ത്ഥിത്വത്തിന് പിന്നില്‍. നേമത്തെ പോരാട്ടം ഒട്ടും എളുപ്പമല്ല. അവിടെ വൈഷ്ണയ്ക്ക് നേരിടേണ്ടി വരുന്നത് അതികായന്മാരെയാണ്:

സിറ്റിംഗ് എം.എല്‍.എയും മന്ത്രിയുമായ ശിവന്‍കുട്ടിക്ക് മണ്ഡലത്തിലുള്ള വ്യക്തിപരമായ സ്വാധീനം ചെറുതല്ല. ബി.ജെ.പി സംസ്ഥാന അധ്യക്ഷന്‍ നേരിട്ട് അങ്കത്തിനിറങ്ങുന്നതോടെ നേമം ഇക്കുറി ബി.ജെ.പിയുടെ അഭിമാന പോരാട്ടമായി മാറും. കഴിഞ്ഞ ലോകസഭാ തിരഞ്ഞെടുപ്പിലും തദ്ദേശ തിരഞ്ഞെടുപ്പിലും ബി.ജെ.പിക്ക് നേമത്ത് ലഭിച്ച വലിയ വോട്ട് വിഹിതം വൈഷ്ണയ്ക്ക് വലിയ വെല്ലുവിളിയാണ്. ഒരു ‘യൂത്ത് കാര്‍ഡ്’ ആണ് വൈഷ്ണയിലൂടെ കോണ്‍ഗ്രസ് കളിക്കുന്നത്. വോട്ടര്‍മാര്‍ക്കിടയില്‍ പ്രത്യേകിച്ച് യുവാക്കള്‍ക്കിടയില്‍ ഇത് സ്വാധീനം ചെലുത്താം.

കോണ്‍ഗ്രസിന്റെ ഉയിര്‍ത്തെഴുന്നേല്‍പ്പ്: 2021-ല്‍ കെ. മുരളീധരന്‍ മത്സരിച്ചിട്ടും മൂന്നാം സ്ഥാനത്തേക്ക് പോയ ചരിത്രം നേമത്ത് കോണ്‍ഗ്രസിനുണ്ട്. എന്നാല്‍ തദ്ദേശ തിരഞ്ഞെടുപ്പില്‍ യു.ഡി.എഫ് തിരിച്ചുപിടിച്ച വോട്ടുകള്‍ വൈഷ്ണയ്ക്ക് കരുത്താകും. നേമത്തെ സംബന്ധിച്ച് ഇതൊരു ‘ഹൈ പ്രൊഫൈല്‍’ പോരാട്ടമാണ്. യു.ഡി.എഫ് വോട്ടുകള്‍ കൃത്യമായി പെട്ടിയിലാക്കാനും ബി.ജെ.പി-എല്‍.ഡി.എഫ് പോരാട്ടത്തിനിടയില്‍ നിഷ്പക്ഷ വോട്ടുകള്‍ നേടിയെടുക്കാനും വൈഷ്ണയ്ക്ക് കഴിഞ്ഞാല്‍ അത് കേരളം ഉറ്റുനോക്കുന്ന അട്ടിമറിയായി മാറും.