തിരുവനന്തപുരം: കേരള നിയമസഭ പിടിക്കാന് ഇറങ്ങുമ്പോള് കെ. സുധാകരനും അടൂര് പ്രകാശും അടക്കമുള്ള കരുത്തരായ എംപിമാര് നിയമസഭയിലേക്ക് മത്സരിക്കേണ്ടെന്ന ഉറച്ച തീരുമാനത്തില് കോണ്ഗ്രസ് ഹൈക്കമാന്ഡ് എത്തിയതിന് പിന്നില് ലോക്സഭാ ഉപതിരഞ്ഞെടുപ്പ് ഒഴിവാക്കാനുള്ള തന്ത്രം തന്നെ. സാമുദായിക സംഘടനകളുടെയും അണികളുടെയും അതിശക്തമായ സമ്മര്ദ്ദമുണ്ടായിട്ടും, എംപിമാരെ നിയമസഭയിലേക്ക് ‘കെട്ടിയിറക്കിയാല്’ ഉണ്ടാകാന് പോകുന്ന വന് പ്രത്യാഘാതങ്ങള് മുന്കൂട്ടി കണ്ടാണ് ഹൈക്കമാന്ഡ് ഈ കടുത്ത തീരുമാനമെടുത്തത്. ഇതില് പ്രധാനമായും വില്ലനായത് അടൂര് പ്രകാശ് ആറ്റിങ്ങലില് നേടിയ ചെറിയ ഭൂരിപക്ഷമാണെന്ന ചര്ച്ചകള്ക്കും ഇപ്പോള് ജീവന് വെച്ചിരിക്കുകയാണ്.
സുധാകരനെയും അടൂര് പ്രകാശിനെയും മത്സരിപ്പിക്കാതിരുന്നതിന് പിന്നിലെ പ്രധാന പേടി ഉപതിരഞ്ഞെടുപ്പാണ്. സുധാകരന് കണ്ണൂരിലും അടൂര് പ്രകാശ് കോന്നിയിലോ മറ്റോ മത്സരിച്ച് ജയിച്ചാല് ലോക്സഭാ സീറ്റുകള് ഒഴിയും. ആറ്റിങ്ങലിലൊക്കെ ഇക്കഴിഞ്ഞ തവണ നേരിയ ഭൂരിപക്ഷത്തിനാണ് യുഡിഎഫ് കടന്നുകൂടിയത്. ഉപതിരഞ്ഞെടുപ്പ് വന്നാല് കേന്ദ്രം ഭരിക്കുന്ന ബിജെപി സര്വ്വസജ്ജമായി രംഗത്തിറങ്ങും. മന്ത്രിസ്ഥാനം വരെ വാഗ്ദാനം ചെയ്ത് വോട്ടര്മാരെ സ്വാധീനിച്ചാല്, ആറ്റിങ്ങല് പോലുള്ള സീറ്റുകള് ബിജെപി പിടിച്ചെടുക്കുമോ എന്ന ഭയം ഹൈക്കമാന്ഡിനുണ്ട്. ദേശീയതലത്തില് ഓരോ സീറ്റും വിലപ്പെട്ടതാണെന്നിരിക്കെ അത്തരമൊരു പരീക്ഷണത്തിന് കോണ്ഗ്രസ് തയ്യാറല്ല.
കെ. സുധാകരന് അനുമതി നല്കിയാല് സമാന താല്പര്യമുള്ള മറ്റ് അഞ്ച് എംപിമാര് കൂടി നിയമസഭയിലേക്ക് ടിക്കറ്റ് ചോദിക്കും. ഇത് നിലവിലെ സംസ്ഥാന നേതൃത്വത്തിലെ സന്തുലനാവസ്ഥയെ ബാധിക്കും. ഗ്രൂപ്പ് സമവാക്യങ്ങള് തെറ്റുന്നതും വരാനിരിക്കുന്ന ഭരണത്തില് ‘പാര’യാകാന് സാധ്യതയുള്ള നേതാക്കളെ ദൂരെ നിര്ത്തുന്നതും ഹൈക്കമാന്ഡിന്റെ തന്ത്രമാണ്. അധികാരം പിടിച്ചാല് മുഖ്യമന്ത്രി കസേരയ്ക്കായി ഡല്ഹിയില് നിന്ന് നേതാക്കളെ ഇറക്കുമതി ചെയ്യുന്ന കീഴ്വഴക്കം ഇത്തവണ വേണ്ടെന്നാണ് ഹൈക്കമാന്ഡ് മനസ്സിരുപ്പ്.
ഒരേ ആളുകള് തന്നെ ലോക്സഭയിലേക്കും നിയമസഭയിലേക്കും മാറിമാറി മത്സരിക്കുന്നു എന്ന വിമര്ശനം പാര്ട്ടിക്ക് വലിയ തിരിച്ചടിയാകുമെന്ന് ഹൈക്കമാന്ഡ് കരുതുന്നു. എംപി സ്ഥാനം എന്നത് നിയമസഭാ തിരഞ്ഞെടുപ്പ് വരുമ്പോള് വലിച്ചെറിയേണ്ട ഒന്നല്ലെന്ന കര്ശന സന്ദേശമാണ് ഇതിലൂടെ നല്കുന്നത്. ദേശീയ തലത്തിലുള്ള പോരാട്ടത്തിന് എംപിമാര് കേന്ദ്രത്തില് തന്നെ ശ്രദ്ധ കേന്ദ്രീകരിക്കണമെന്നും കേരളത്തിലെ ഭരണം പിടിക്കാന് പ്രാദേശിക നേതാക്കള് തന്നെ മതിയെന്നുമാണ് ദില്ലിയിലെ നിലപാട്.
ചുരുക്കത്തില്, സുധാകരന്റെയും അടൂര് പ്രകാശിന്റെയും മോഹങ്ങള്ക്ക് തടയിട്ടത് ബിജെപിയുടെ വളര്ച്ചയും ഉപതിരഞ്ഞെടുപ്പ് വരുത്തിവെച്ചേക്കാവുന്ന അപകടങ്ങളുമാണ്. ഈ പോയിന്റുകളിലാണ് സുധാകരനെ അനുനയിപ്പിക്കാന് ഹൈക്കമാന്ഡിന് സാധിച്ചത്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
മദ്യത്തിന് പേരിടല്, സര്ക്കാര് നീക്കം നിയമവിരുദ്ധമെന്ന് കെസിബിസി, പരസ്യം ഉടന് പിന്വലിച്ചില്ലെങ്കില് നിയമനടപടി
