പാറശ്ശാല: ‘ചുട്ടയിലെ ശീലം ചുടല വരെ’ എന്ന പഴഞ്ചൊല്ലിനെ അന്വര്ത്ഥമാക്കുന്ന തരത്തില്, കൈക്കൂലി കേസില് സസ്പെന്ഷനിലായി തിരിച്ചെത്തിയ ഉദ്യോഗസ്ഥന് വീണ്ടും വിജിലന്സ് പിടിയിലാകുന്നത് വിജിലന്സ് കരുതലില്. ലൈഫ് ഭവനപദ്ധതിയുടെ മൂന്നാം ഗഡു അനുവദിക്കാന് ഗുണഭോക്താവില് നിന്ന് 2500 രൂപ കൈക്കൂലി വാങ്ങുന്നതിനിടെയാണ് കാരോട് പഞ്ചായത്തിലെ വില്ലേജ് എക്സ്റ്റന്ഷന് ഓഫീസര് ടി.എസ്. സന്ദീപ് (49) പിടിയിലായത്.
ഇതൊരു ആദ്യാനുഭവമല്ല സന്ദീപിന് എന്നതാണ് ഞെട്ടിക്കുന്ന വസ്തുത. 2016-17 കാലഘട്ടത്തില് കൊല്ലത്ത് വില്ലേജ് എക്സ്റ്റന്ഷന് ഓഫീസറായിരിക്കെ സമാനമായ രീതിയില് കൈക്കൂലി വാങ്ങുമ്പോള് ഇയാള് വിജിലന്സിന്റെ വലയിലായിരുന്നു. ആ കേസില് സസ്പെന്ഷനും നടപടികളും നേരിട്ട് തിരിച്ചെത്തിയിട്ടും കൈക്കൂലിയോടുള്ള ആര്ത്തി ഇയാള്ക്ക് കുറഞ്ഞില്ലെന്ന് പുതിയ അറസ്റ്റ് തെളിയിക്കുന്നു. കൊല്ലം വിജിലന്സ് കോടതിയില് ആദ്യ കേസിന്റെ വിചാരണ നടന്നുകൊണ്ടിരിക്കെയാണ് സന്ദീപ് വീണ്ടും കുടുങ്ങുന്നത്.
പാവപ്പെട്ടവരുടെ സ്വപ്നമായ ലൈഫ് ഭവനപദ്ധതിയുടെ മറവിലായിരുന്നു ഇയാളുടെ പകല്ക്കൊള്ള. പരാതിക്കാരന് മൂന്നാം ഗഡുവായ രണ്ട് ലക്ഷം രൂപ അനുവദിക്കാന് സന്ദീപ് മനഃപൂര്വം കാലതാമസം വരുത്തുകയായിരുന്നു. ഇതിനുമുമ്പ് ആദ്യ ഗഡുവിന് 500 രൂപയും രണ്ടാം ഗഡുവിന് 1000 രൂപയും ഇയാള് കൈക്കൂലിയായി വാങ്ങിയിരുന്നു. ഇതിനുപുറമെയാണ് മൂന്നാം ഗഡുവിനായി വീണ്ടും 2500 രൂപ ആവശ്യപ്പെട്ടത്.
തുടര്ച്ചയായ പീഡനത്തിനൊടുവില് സഹികെട്ട ഗുണഭോക്താവ് വിജിലന്സിനെ സമീപിക്കുകയായിരുന്നു. വിജിലന്സ് സംഘം രണ്ടാഴ്ചയോളം സന്ദീപിനെ നിരീക്ഷിച്ച ശേഷമാണ് തിങ്കളാഴ്ച വൈകീട്ട് ‘ഓപ്പറേഷന്’ നടത്തിയത്. പ്രത്യേകം അടയാളപ്പെടുത്തിയ പണം കൈപ്പറ്റിയ ഉടനെ മഫ്തിയിലെത്തിയ വിജിലന്സ് സംഘം സന്ദീപിനെ പിടികൂടുകയായിരുന്നു.
സന്ദീപിന്റെ അറസ്റ്റ് വാര്ത്തയറിഞ്ഞ് ഓഫീസിനു മുന്നില് തടിച്ചുകൂടിയ നാട്ടുകാര് ഇയാള്ക്കെതിരെ ഗുരുതരമായ ആരോപണങ്ങളാണ് ഉന്നയിക്കുന്നത്. കാരോട് പഞ്ചായത്തില് ജോലിയില് പ്രവേശിച്ചതു മുതല് ഇയാള് ലൈഫ് പദ്ധതി ഗുണഭോക്താക്കളെ പിഴിഞ്ഞിരുന്നതായി നാട്ടുകാര് പറയുന്നു. കൈക്കൂലി നല്കിയാല് പോലും ഫയലുകള് ഓരോ ഘട്ടത്തിലും തടഞ്ഞുവെച്ച് ഉപഭോക്താക്കളെ സമ്മര്ദ്ദത്തിലാക്കുക ഇയാളുടെ സ്ഥിരം ശൈലിയായിരുന്നുവെന്നും പരാതിയുണ്ട്.
വിജിലന്സ് ഡിവൈ.എസ്.പി. ദിലീപ് കുമാറിന്റെ നേതൃത്വത്തിലുള്ള സംഘമാണ് പ്രതിയെ പിടികൂടിയത്. തിരുത്താന് അവസരം ലഭിച്ചിട്ടും വീണ്ടും അഴിമതിയുടെ വഴി തിരഞ്ഞെടുത്ത ഈ ഉദ്യോഗസ്ഥനെതിരെ കടുത്ത നടപടി വേണമെന്നാണ് ജനങ്ങളുടെ ആവശ്യം. സംശുദ്ധമായ സിവില് സര്വീസിനെ കരിവാരിത്തേക്കുന്ന ഇത്തരം പുഴുക്കുത്തുകള് ഇനിയും തുടരുന്നത് ഗൗരവകരമായ ചര്ച്ചകള്ക്ക് വഴിവെച്ചിരിക്കുകയാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
വായനക്കാരുടെ അഭിപ്രായങ്ങള് അവരുടേത് മാത്രമാണ്, വയർലെസ്സ് മീഡിയയുടെ അല്ല.
ഇവിടെ കുറിക്കുന്ന പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക.
സമൂഹത്തിൽ ഭിന്നതയോ സ്പർധയോ വളർത്തുന്നതോ, അധിക്ഷേപമാകുന്നതോ,
അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്.
അത്തരം പ്രതികരണങ്ങൾ നിയമനടപടി നേരിടേണ്ടി വരും.
കൈക്കൂലി കേസില് പോലീസ് ഉദ്യോഗസ്ഥന് ഏഴ് വര്ഷം കഠിനതടവ്; കൊല്ലം വിജിലന്സ് കോടതിയുടെ സുപ്രധാന വിധി. റിപ്പോര്ട്ട് സമര്പ്പിക്കുന്നതിന് താജുദ്ദീന് വാങ്ങിയത് 10,000 രൂപ
