കൊച്ചി: മലയാളത്തിന്റെ രണ്ട് ഇതിഹാസ താരങ്ങളായ മമ്മൂട്ടിയും മോഹന്ലാലും വര്ഷങ്ങള്ക്കുശേഷം ഒന്നിച്ചെത്തിയ ‘പേട്രിയറ്റ്’ ബോക്സ് ഓഫീസില് കൊടുങ്കാറ്റാവുന്നു. ആഗോളതലത്തില് ആദ്യദിനം 29.37 കോടി രൂപ ഗ്രോസ് കളക്ഷന് നേടിയ ചിത്രം മലയാള സിനിമയിലെ ഏറ്റവും വലിയ ഓപ്പണിംഗുകളില് ഒന്നായി മാറി. എന്നാല്, ഈ വമ്പന് നേട്ടത്തിനിടയിലും സോഷ്യല് മീഡിയയില് ആരാധകര്ക്കിടയില് ‘ഹൈപ്പി’നെച്ചൊല്ലിയുള്ള വാക്പോര് മുറുകുകയാണ്.
‘കാണിച്ച് തരാന് പറ പ്രൂഫ്, ഒരു ലക്ഷമൊക്കെ എന്റെ റേഞ്ചിന് പറ്റിയതാണോ?’; മാധവ് സുരേഷിനും അണിയറപ്രവര്ത്തകര്ക്കുമെതിരെ ആഞ്ഞടിച്ച് അശ്വന്ത് കോക്ക്; ആരോപണങ്ങള്ക്ക് മറുപടി തെറിവിളിയിലും വെല്ലുവിളിയിലും; കള്ളം പറഞ്ഞാല് വനവാസത്തിന് പോകാനും റെഡി
കേരള ബോക്സ് ഓഫീസില് മാത്രം ആദ്യദിനം 8.30 കോടി രൂപയാണ് ചിത്രം സ്വന്തമാക്കിയത്. ഇതോടെ മോഹന്ലാല് ചിത്രം ‘ഒടിയന്റെ’ (7.25 കോടി) റെക്കോര്ഡ് പേട്രിയറ്റ് മറികടന്നു. നിലവില് 14.07 കോടി നേടിയ ‘എമ്പുരാന്’ മാത്രമാണ് കേരളത്തിലെ ഓപ്പണിംഗില് പേട്രിയറ്റിന് മുന്നിലുള്ളത്. ഇന്ത്യയില് നിന്ന് മൊത്തം 11.37 കോടിയും ഓവര്സീസ് മാര്ക്കറ്റില് നിന്ന് 18 കോടിയുമാണ് ചിത്രം വാരിക്കൂട്ടിയത്. 2,636 ഷോകളാണ് റിലീസ് ദിനത്തില് ആഗോളതലത്തില് നടന്നത്.
രണ്ട് സൂപ്പര് താരങ്ങള് ഒന്നിച്ച് സ്ക്രീനിലെത്തിയിട്ടും ചിത്രത്തിന് വേണ്ടത്ര പബ്ലിസിറ്റി ലഭിച്ചില്ലെന്നാണ് ഒരു വിഭാഗം ആരാധകരുടെ ആരോപണം. ‘ട്വന്റി ട്വന്റി’ക്ക് ശേഷം ഇരുവരും ഒന്നിക്കുന്ന ചിത്രമായിട്ടും റിലീസിന് മുന്പ് വേണ്ടത്ര ആഘോഷങ്ങള് നടന്നില്ലെന്ന് മമ്മൂട്ടി-മോഹന്ലാല് ആരാധകര് ഒരേപോലെ പഴിചാരുന്നു. ചിത്രത്തിന്റെ സ്പൈ-ഓറിയന്റഡ് പ്രമേയവും മഹേഷ് നാരായണന്റെ ക്രാഫ്റ്റും ഗംഭീരമാണെങ്കിലും, പ്രൊമോഷനിലെ പോരായ്മയാണ് കളക്ഷന് 30 കോടി കടക്കാതിരിക്കാന് കാരണമെന്ന് ഇവര് വാദിക്കുന്നു. എമ്പുരാന് സൃഷ്ടിച്ച തരംഗവുമായി താരതമ്യം ചെയ്യുമ്പോഴാണ് ആരാധകരുടെ ഈ അതൃപ്തി പുകയുന്നത്.
‘അമ്മ’യിലെ രാജിക്ക് കാരണം ടിനി ടോമും കൂട്ടരും; ജിഹാദി എന്ന് വിളിച്ച് അധിക്ഷേപിച്ചു, അവിഹിത കഥകള് പ്രചരിപ്പിച്ചു: കടുത്ത വെളിപ്പെടുത്തലുകളുമായി നടി അന്സിബ ഹസ്സന്
കേവലം ഫാന്സ് ആവേശം ലക്ഷ്യമിട്ടുള്ള മാസ്സ് പടമല്ല പേട്രിയറ്റ് എന്നാണ് സിനിമ കണ്ടവരുടെ വിലയിരുത്തല്. സൈബര് സുരക്ഷയും സ്വകാര്യത ചോര്ച്ചയും പ്രമേയമായ ചിത്രം ഗൗരവമേറിയ രാഷ്ട്രീയമാണ് സംസാരിക്കുന്നത്. ആദ്യ പകുതി മമ്മൂട്ടിയും രണ്ടാം പകുതി മോഹന്ലാലും തകര്പ്പന് പ്രകടനമാണ് കാഴ്ചവെച്ചിരിക്കുന്നത്. മൂന്ന് മണിക്കൂറിലധികം ദൈര്ഘ്യമുള്ള ചിത്രം ഒരു സ്ലോ-പേസ് പൊളിറ്റിക്കല് ഡ്രാമയായതിനാല് സാധാരണ ആരാധകര് പ്രതീക്ഷിച്ച ‘തലപ്പൊക്കത്തിന്’ അപ്പുറം ഒരു ഇന്റര്നാഷണല് മേക്കിംഗ് നിലവാരമാണ് മഹേഷ് നാരായണന് പിന്തുടരുന്നത്.
നയന്താര, ഫഹദ് ഫാസില്, കുഞ്ചാക്കോ ബോബന് തുടങ്ങി വമ്പന് താരനിരയും സുഷിന് ശ്യാമിന്റെ പശ്ചാത്തല സംഗീതവും ചിത്രത്തിന് കരുത്താകുന്നുണ്ട്. വരും ദിവസങ്ങളില് മൗത്ത് പബ്ലിസിറ്റിയിലൂടെ ചിത്രം കൂടുതല് നേട്ടങ്ങള് കൊയ്യുമെന്നാണ് ബോക്സ് ഓഫീസ് അനലിസ്റ്റുകളുടെ പ്രതീക്ഷ. ഹൈപ്പിനെച്ചൊല്ലിയുള്ള തര്ക്കങ്ങള്ക്കിടയിലും മലയാള സിനിമയുടെ പ്രൗഢി ആഗോളതലത്തില് ഉയര്ത്താന് പേട്രിയറ്റിന് സാധിച്ചിട്ടുണ്ട് എന്നതില് തര്ക്കമില്ല.
