തിരുവനന്തപുരം: നിയമസഭാ തിരഞ്ഞെടുപ്പിന് മുന്നോടിയായി സി.പി.എമ്മിന്റെ സൈബര് പോരാട്ടങ്ങള്ക്ക് ചുക്കാന് പിടിക്കാന് രൂപീകരിച്ച സോഷ്യല് മീഡിയ ടീമില് വന് പൊട്ടിത്തെറി. വിഭാഗത്തിന്റെ ചുമതലയുള്ള എം.വി. നികേഷ് കുമാറിന്റെ ഏകപക്ഷീയമായ നടപടികളില് പ്രതിഷേധിച്ച് മുതിര്ന്ന മാധ്യമപ്രവര്ത്തകര് ടീമില് നിന്നും പടിയിറങ്ങി. ദേശാഭിമാനി മുന് ന്യൂസ് എഡിറ്റര്മാരായ കെ.വി. സുധാകരന്, കെ. മോഹന്ദാസ്, ഇ.എസ്. സുഭാഷ് എന്നിവരാണ് നികേഷിനോടുള്ള വിയോജിപ്പിനെത്തുടര്ന്ന് ടീം വിട്ടത്.
പാര്ട്ടിക്കുള്ളില് നികേഷ് കുമാറിന് ലഭിക്കുന്ന അമിത പ്രാധാന്യത്തിലും ഏകപക്ഷീയമായ തീരുമാനങ്ങളിലുമുള്ള അതൃപ്തിയാണ് രാജിക്കു പിന്നിലെന്നാണ് സൂചന. കണ്ണൂരിലെ സുരക്ഷിത മണ്ഡലത്തില് നികേഷ് കുമാറിനെ സ്ഥാനാര്ത്ഥിയാക്കുമെന്ന റിപ്പോര്ട്ടുകള്ക്കിടെയാണ് സൈബര് ടീമിലെ ഈ അസ്വാരസ്യങ്ങള് പുറത്തുവരുന്നത്. എം.വി. രാഘവന്റെ മകന് സി.പി.എമ്മിനെ തോല്പ്പിക്കുമെന്ന തരത്തില് സൈബര് ഇടങ്ങളില് നികേഷിനെതിരെ തന്നെ പ്രചാരണം ശക്തമാകുന്നതിനിടെയാണ് ഈ കൂട്ടരാജി.
പാര്ട്ടിയുടെ സൈബര് ഇടപെടലുകള് ലക്ഷ്യം കാണുന്നില്ലെന്ന വിലയിരുത്തലില് മുഖ്യമന്ത്രി പിണറായി വിജയനും അതൃപ്തി രേഖപ്പെടുത്തിയതായാണ് വിവരം. സി.പി.എം. സംസ്ഥാന സെക്രട്ടറി എം.വി. ഗോവിന്ദന് നേരിട്ട് ഇടപെട്ടാണ് നികേഷ് കുമാറിനെ എ.കെ.ജി സെന്ററിലെ സോഷ്യല് മീഡിയ വിഭാഗത്തിന്റെ തലപ്പത്ത് എത്തിച്ചത്. എന്നാല് സമീപകാലത്തെ മേഖലാ ജാഥകളുടെ പ്രചാരണം പരാജയപ്പെട്ടുവെന്ന വിമര്ശനം പാര്ട്ടിയില് ശക്തമാണ്. നികേഷ് കുമാറിനെ സംരക്ഷിക്കുന്നത് എം.വി. ഗോവിന്ദനാണെന്ന വികാരം ഒരു വിഭാഗം നേതാക്കള്ക്കുണ്ട്.
മാധ്യമപ്രവര്ത്തനം അവസാനിപ്പിച്ച് പാര്ട്ടി പ്രവര്ത്തനത്തിനിറങ്ങിയ എം.വി. നികേഷ് കുമാറിനെ മുന്നില് നിര്ത്തി സി.പി.എം പടുത്തുയര്ത്തിയ ‘സോഷ്യല് മീഡിയ ഹൗസ്’ തിരഞ്ഞെടുപ്പിന് മുന്പേ ഉലയുകയാണ്. ദേശാഭിമാനിയിലെ മൂന്ന് മുന് ന്യൂസ് എഡിറ്റര്മാര് പടിയിറങ്ങിയത് വെറുമൊരു രാജിയല്ല, മറിച്ച് പാര്ട്ടിയുടെ പുതിയ പ്രചാരണ ശൈലിയോടുള്ള കലാപമാണ്.
ദേശാഭിമാനിയുടെ സംഘടനാ രീതികളില് വര്ഷങ്ങളോളം പ്രവര്ത്തിച്ച മുതിര്ന്ന മാധ്യമപ്രവര്ത്തകര്ക്ക് നികേഷിന്റെ ‘ചാനല് ശൈലി’ ഉള്ക്കൊള്ളാനായില്ല എന്നതാണ് ഈ പൊട്ടിത്തെറിയുടെ പ്രധാന കാരണം. ചര്ച്ചകള് ഏകോപിപ്പിക്കുന്നതിലും ഉള്ളടക്കം നിശ്ചയിക്കുന്നതിലും നികേഷ് പുലര്ത്തുന്ന ഏകപക്ഷീയമായ നിലപാടുകള് പാര്ട്ടിയിലെ കൂട്ടായ തീരുമാനമെന്ന കീഴ്വഴക്കത്തിന് വിരുദ്ധമാണെന്ന പരാതി ശക്തമാണ്. മാധ്യമപ്രവര്ത്തനത്തിലെ കോര്പ്പറേറ്റ് ശൈലി എ.കെ.ജി സെന്ററിലേക്ക് പറിച്ചുനട്ടപ്പോള് അത് പാര്ട്ടിയുടെ കേഡര് സ്വഭാവവുമായി ഉരസിയതിന്റെ ഫലമാണ് ഈ കൂട്ടരാജി.
എം.വി. ഗോവിന്ദന് എന്ന സംരക്ഷകന് ഉള്ളതുകൊണ്ട് മാത്രമാണ് നികേഷ് ഈ പദവിയില് തുടരുന്നതെന്ന വികാരം പാര്ട്ടിയിലെ ഒരു വിഭാഗം നേതാക്കള്ക്കുണ്ട്. എം.വി. രാഘവന്റെ മകന് എന്ന ലേബല് ഇപ്പോഴും നികേഷിനെതിരെ ആയുധമാക്കാന് സൈബര് ഇടങ്ങളിലെ പഴയ സഖാക്കള് തന്നെ തയ്യാറാകുന്നു എന്നത് വിരോധാഭാസമാണ്. സര്ക്കാരിനെ പ്രതിരോധിക്കാന് ഇറക്കുന്ന പല വീഡിയോകളും ക്യാപ്സ്യൂളുകളും പൊതുസമൂഹത്തില് പരിഹാസ്യമാകുന്നത് മുഖ്യമന്ത്രിയെപ്പോലും ചൊടിപ്പിച്ചിട്ടുണ്ട്.
മേഖലാ ജാഥകളുടെ പ്രചാരണം സോഷ്യല് മീഡിയയില് പരാജയപ്പെട്ടത് പാര്ട്ടി ഗൗരവത്തോടെയാണ് കാണുന്നത്. വികസന നേട്ടങ്ങള് ജനങ്ങളിലെത്തിക്കുന്നതില് നികേഷിന്റെ 45 അംഗ സംഘം പരാജയപ്പെട്ടുവെന്ന് മുഖ്യമന്ത്രിയും വിലയിരുത്തുന്നു. ‘റിസര്ച്ച് എ ടോപ്പിക്’ എന്ന പേരില് തുടങ്ങിയ സംവാദങ്ങള് പോലും പാര്ട്ടിക്കുള്ളിലെ ശത്രുത വര്ദ്ധിപ്പിക്കാനാണ് സഹായിച്ചത്. സച്ചിദാനന്ദനെപ്പോലെയുള്ള സാംസ്കാരിക നായകരുടെ വിമര്ശനങ്ങളെ നേരിടുന്നതില് സൈബര് വിഭാഗം കാണിച്ച പക്വതയില്ലായ്മ പാര്ട്ടിയെ പ്രതിരോധത്തിലാക്കിയിരുന്നു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
Also Read
ബിജെപിക്ക് എവിടെ പിഴച്ചു? സംസ്ഥാന നേതൃത്വത്തെ കടന്നാക്രമിച്ച് മുൻ ഡിജിപി ടി.പി സെൻകുമാർ രംഗത്ത്
ബിജെപിക്ക് എവിടെ പിഴച്ചു? സംസ്ഥാന നേതൃത്വത്തെ കടന്നാക്രമിച്ച് മുൻ ഡിജിപി ടി.പി സെൻകുമാർ രംഗത്ത്
