നാടിനെ നടുക്കി മൂഴിക്കല്‍ കൊലപാതകം: സ്വാഭാവദൂഷ്യം ചോദ്യം ചെയ്ത പകയില്‍ പൊലിഞ്ഞത് കൗമാരക്കാരിയുടെ ജീവന്‍; യുവാവ് ജീവനൊടുക്കിയത് അതിക്രൂരമായി; മൂഴിക്കലിലെ പ്രതികാര കഥ

കോഴിക്കോട്: ഈസ്റ്റ് മൂഴിക്കലില്‍ ഉറക്കത്തിനിടെ പതിനാറുകാരിയെ കഴുത്തുഞെരിച്ചു കൊലപ്പെടുത്തി ബന്ധുവായ യുവാവ് ജീവനൊടുക്കിയ സംഭവത്തിന്റെ നടുക്കത്തിലാണ് നാട്. സഹോദരിപുത്രിയായ നസ്രിനയെ കൊലപ്പെടുത്തിയ ശേഷം പ്രതിയായ അദ്നാന്‍ ആത്മഹത്യ ചെയ്തത് സിനിമകളെ വെല്ലുന്ന ക്രൂരതയോടെയാണെന്ന് പ്രാഥമിക വിവരങ്ങള്‍ സൂചിപ്പിക്കുന്നു. കുടുംബാംഗങ്ങള്‍ വീട്ടിലുള്ളപ്പോള്‍ തന്നെ നടന്ന ഈ ഇരട്ട മരണം നാടിനെ അക്ഷരാര്‍ത്ഥത്തില്‍ സ്തബ്ധരാക്കിയിരിക്കുകയാണ്.

യുവാവിന്റെ സ്വാഭാവദൂഷ്യത്തെച്ചൊല്ലി കുടുംബത്തില്‍ നിലനിന്നിരുന്ന തര്‍ക്കങ്ങളാണ് ദാരുണമായ കൊലപാതകത്തില്‍ കലാശിച്ചതെന്നാണ് പ്രാഥമിക നിഗമനം. അദ്നാന്‍ പണം മോഷ്ടിച്ചതുമായി ബന്ധപ്പെട്ട് പെണ്‍കുട്ടി ഇയാളെ ചോദ്യം ചെയ്തിരുന്നതായും ഇത് വലിയ ശത്രുതയ്ക്ക് കാരണമായെന്നും പറയപ്പെടുന്നു. താന്‍ വിശ്വസിച്ചു കൂടെനിന്ന ബന്ധുവില്‍ നിന്ന് ഇത്തരമൊരു ക്രൂരത നസ്രിന പ്രതീക്ഷിച്ചിരുന്നില്ല.

ഇന്ന് പുലര്‍ച്ചെയോടെയാണ് നടുക്കുന്ന സംഭവങ്ങളുടെ തുടക്കം. വീട്ടില്‍ കള്ളന്‍ കയറിയെന്ന് കരുതി വീട്ടുകാര്‍ നടത്തിയ തിരച്ചിലിനൊടുവിലാണ് മുകള്‍ നിലയിലെ കിടപ്പുമുറിയില്‍ നസ്രിനയെ അബോധാവസ്ഥയില്‍ കണ്ടെത്തിയത്. കഴുത്തില്‍ ഷാള്‍ മുറുക്കി ശ്വാസം മുട്ടിച്ച നിലയിലായിരുന്നു പെണ്‍കുട്ടി. ഒപ്പമുണ്ടായിരുന്ന മുത്തശ്ശിയെയും വകവരുത്താന്‍ അദ്നാന്‍ ശ്രമിച്ചതായാണ് പോലീസിന് ലഭിക്കുന്ന സൂചനകള്‍.

സംഭവം നടക്കുമ്പോള്‍ നസ്രിനയുടെ അമ്മയും സഹോദരങ്ങളും മുത്തശ്ശിയും വീട്ടിലുണ്ടായിരുന്നു. വീട്ടുകാര്‍ ഉണര്‍ന്നതോടെ പരിഭ്രാന്തനായ അദ്നാനെ ഒരു മുറിയില്‍ പൂട്ടിയിട്ട ശേഷമാണ് അബോധാവസ്ഥയിലായ പെണ്‍കുട്ടിയെയും കൊണ്ട് വീട്ടുകാര്‍ ആശുപത്രിയിലേക്ക് പാഞ്ഞത്. എന്നാല്‍ ആശുപത്രിയിലെത്തും മുന്‍പേ നസ്രിനയുടെ മരണം സംഭവിച്ചിരുന്നു.

പെണ്‍കുട്ടിയുടെ മരണവിവരമറിഞ്ഞ് വീട്ടില്‍ തിരിച്ചെത്തിയ ബന്ധുക്കളും പോലീസും കണ്ടത് അതിക്രൂരമായ മറ്റൊരു കാഴ്ചയായിരുന്നു. പൂട്ടിയിട്ട മുറിയില്‍ അദ്നാമിനെ മരിച്ച നിലയില്‍ കണ്ടെത്തി. മുഖത്ത് സെല്ലോ ടേപ്പ് പലതവണ ചുറ്റി ശ്വാസം മുട്ടിച്ച നിലയിലായിരുന്നു മൃതദേഹം. ആത്മഹത്യ ചെയ്യുന്നതിനായി ഇയാള്‍ തിരഞ്ഞെടുത്ത രീതി പോലീസിനെ പോലും അമ്പരപ്പിച്ചിട്ടുണ്ട്.

നസ്രിനയുടെ വീട്ടില്‍ നിന്നാണ് അദ്നാന്‍ പഠിച്ചിരുന്നത്. സഹോദരിമാരുടെ മക്കളായതിനാല്‍ ഇരുവരും അടുത്ത ബന്ധം പുലര്‍ത്തിയിരുന്നു. എന്നാല്‍ അദ്നാന്റെ പെരുമാറ്റദൂഷ്യവും പണം മോഷണവും ശ്രദ്ധയില്‍പ്പെട്ടതോടെ നസ്രിന ഇതിനെ ശക്തമായി എതിര്‍ത്തു. തന്റെ തെറ്റുകള്‍ ചോദ്യം ചെയ്ത കൗമാരക്കാരിയോടുള്ള കടുത്ത പക ഇയാള്‍ ഉള്ളില്‍ കൊണ്ടുനടന്നിരുന്നു എന്നാണ് നാട്ടുകാര്‍ പറയുന്നത്.

അടുത്തിടെ നസ്രിനയുടെ കുടുംബവുമായി അദ്നാന്‍ പിണക്കത്തിലായിരുന്നു. വീട്ടില്‍ നിന്ന് ചില പ്രശ്‌നങ്ങളുടെ പേരില്‍ ഇയാളെ മാറ്റിനിര്‍ത്താന്‍ ശ്രമിച്ചതും കൊലപാതകത്തിന് പ്രേരണയായെന്ന് സംശയിക്കുന്നു. പിണക്കം മാറ്റാനെന്ന വ്യാജേന വീട്ടിലെത്തിയ അദ്നാന്‍ കൊടുംക്രൂരതയ്ക്കായി നേരത്തെ പദ്ധതിയിട്ടിരുന്നോ എന്നും പോലീസ് അന്വേഷിക്കുന്നുണ്ട്.

പെണ്‍കുട്ടിയുടെ മുത്തശ്ശിയുടെ മൊഴി ഈ കേസില്‍ നിര്‍ണ്ണായകമാണ്. ഇവരെയും ആക്രമിക്കാന്‍ ശ്രമിച്ചതിലൂടെ വീട്ടിലുള്ളവരെ മുഴുവന്‍ അപായപ്പെടുത്താന്‍ പ്രതിക്ക് ഉദ്ദേശ്യമുണ്ടായിരുന്നോ എന്ന സംശയവും ഉയരുന്നുണ്ട്. കുടുംബാംഗങ്ങള്‍ ഒന്നടങ്കം തളര്‍ന്ന അവസ്ഥയിലായതിനാല്‍ വിശദമായ മൊഴി രേഖപ്പെടുത്താന്‍ പോലീസിന് കഴിഞ്ഞിട്ടില്ല.

ഫോറന്‍സിക് വിദഗ്ധരും ഡോഗ് സ്‌ക്വാഡും സ്ഥലത്തെത്തി തെളിവുകള്‍ ശേഖരിച്ചു. രണ്ട് മരണങ്ങളും ശ്വാസം മുട്ടിയാണെന്ന് ഉറപ്പാണെങ്കിലും കൃത്യമായ കാരണങ്ങള്‍ പോസ്റ്റ്മോര്‍ട്ടം റിപ്പോര്‍ട്ട് വന്നതിന് ശേഷമേ വ്യക്തമാകൂ. അദ്നാന്‍ ആത്മഹത്യയ്ക്ക് തിരഞ്ഞെടുത്ത വിചിത്രമായ രീതിയെക്കുറിച്ചും ശാസ്ത്രീയമായ പരിശോധനകള്‍ നടക്കും.