ന്യൂഡൽഹി: സാധാരണയായി വാഗ്വാദങ്ങൾക്കും ബഹളങ്ങൾക്കും വേദിയാകാറുള്ള രാജ്യസഭയിൽ ഭരണ-പ്രതിപക്ഷ ഭേദമന്യേ ചിരി പടർത്തി പ്രതിപക്ഷ നേതാവ് മല്ലികാർജുൻ ഖാർഗെയുടെ വിടവാങ്ങൽ പ്രസംഗം. വിരമിക്കുന്ന അംഗങ്ങൾക്ക് നൽകിയ യാത്രയയപ്പ് വേളയിൽ ഖാർഗെ നടത്തിയ നർമ്മം കലർന്ന പരാമർശങ്ങൾ സഭയിലുടനീളം ആവേശം വിതറി. ശരദ് പവാർ, എച്ച്.ഡി. ദേവഗൗഡ തുടങ്ങിയ മുതിർന്ന നേതാക്കളുടെ കാലാവധി അവസാനിക്കുന്നതിനെക്കുറിച്ചുള്ള പരാമർശങ്ങളാണ് ശ്രദ്ധേയമായത്.
മുൻ പ്രധാനമന്ത്രി എച്ച്.ഡി. ദേവഗൗഡയുടെ രാഷ്ട്രീയ മാറ്റത്തെ ഖാർഗെ രസകരമായി അവതരിപ്പിച്ചു. “അദ്ദേഹം ഞങ്ങളുമായി ഡേറ്റ് ചെയ്തു, ഞങ്ങളെ സ്നേഹിച്ചു, പക്ഷേ അവസാനം വിവാഹം കഴിച്ചത് പ്രധാനമന്ത്രി നരേന്ദ്ര മോദിയെയാണ്,” എന്ന ഖാർഗെയുടെ വാക്കുകൾ കേട്ട് സഭയിലിരുന്ന പ്രധാനമന്ത്രി നരേന്ദ്ര മോദി ഉൾപ്പെടെയുള്ളവർ പൊട്ടിച്ചിരിച്ചു. 1996-ൽ കോൺഗ്രസ് പിന്തുണയോടെ പ്രധാനമന്ത്രിയായ ദേവഗൗഡ പിന്നീട് ബിജെപിയുമായി സഖ്യമുണ്ടാക്കിയ പശ്ചാത്തലത്തിലായിരുന്നു ഈ പരാമർശം.
കേന്ദ്രമന്ത്രി രാംദാസ് അത്താവാലയുടെ കവിതകൾ എപ്പോഴും മോദിയെ പുകഴ്ത്തുന്നവ മാത്രമാണെന്നും അദ്ദേഹത്തിന് മറ്റ് കവിതകളൊന്നും അറിയില്ലെന്നും ഖാർഗെ പരിഹസിച്ചു. ശരദ് പവാർ, ഡിഎംകെയുടെ തിരുച്ചി ശിവ എന്നിവരുമായുള്ള തന്റെ ദീർഘകാല ബന്ധത്തെക്കുറിച്ചും അവർ വീണ്ടും സഭയിലേക്ക് തിരിച്ചുവരുന്നതിലുള്ള സന്തോഷവും അദ്ദേഹം പങ്കുവെച്ചു.
വിരമിക്കുന്ന അംഗങ്ങളുടെ സേവനങ്ങളെ പ്രശംസിച്ച പ്രധാനമന്ത്രി നരേന്ദ്ര മോദി, “രാഷ്ട്രീയത്തിൽ ഫുൾസ്റ്റോപ്പുകളില്ല” എന്ന് ഓർമ്മിപ്പിച്ചു. രാംദാസ് അത്താവാലയെ ‘എവർഗ്രീൻ’ എന്ന് വിശേഷിപ്പിച്ച അദ്ദേഹം, സഭയിൽ ഹാസ്യത്തിനും ആക്ഷേപഹാസ്യത്തിനും വലിയ സ്ഥാനമുണ്ടെന്നും എന്നാൽ ഇപ്പോൾ അത് ക്രമേണ കുറഞ്ഞുവരികയാണെന്നും നിരീക്ഷിച്ചു. പുതുതായി തിരഞ്ഞെടുക്കപ്പെട്ട എംപിമാർ ദേവഗൗഡ, ഖാർഗെ, പവാർ തുടങ്ങിയ മുതിർന്ന നേതാക്കളിൽ നിന്ന് പാർലമെന്ററി കാര്യങ്ങൾ കണ്ടു പഠിക്കണമെന്നും മോദി ഉപദേശിച്ചു.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഒന്പതാം ബജറ്റിലും പതിവ് തെറ്റിക്കാതെ നിര്മല സീതാരാമന്; ഇത്തവണ പാരമ്പര്യം തുളുമ്പുന്ന കാഞ്ചീപുരം പട്ട് സാരി ധരിച്ച് ധനമന്ത്രി
