വാഷിംഗ്ടണ്: പശ്ചിമേഷ്യയെ ഒന്നാകെ ചാരമാക്കാന് പോന്ന യുദ്ധസന്നദ്ധത പ്രഖ്യാപിച്ചതിന് പിന്നാലെ, ഇറാനുമായി ചരിത്രപരമായ സമാധാനക്കരാറിലെത്തിയെന്ന യു.എസ് പ്രസിഡന്റ് ഡൊണാള്ഡ് ട്രംപിന്റെ അവകാശവാദം വെറും മണിക്കൂറുകള്ക്കകം പൊളിഞ്ഞുപാളീസായി. ഇറാനുമേല് നടത്താനിരുന്ന വ്യോമാക്രമണങ്ങള് റദ്ദാക്കിയെന്നും ഇസ്രായേല് അടക്കമുള്ള സഖ്യകക്ഷികളുടെ അംഗീകാരത്തോടെ ‘സമാധാന ഡീല്’ ഉറപ്പിച്ചെന്നുമായിരുന്നു ട്രംപിന്റെ തള്ളല്. എന്നാല് ട്രംപിനെ പൂര്ണ്ണമായും തള്ളിക്കൊണ്ട് ഇറാനും ഇസ്രായേലും ഒരേസ്വരത്തില് രംഗത്തെത്തിയതോടെ വൈറ്റ് ഹൗസ് വന് നാണക്കേടിലായിരിക്കുകയാണ്.
അമേരിക്ക മുന്നോട്ടുവെച്ച ഒരു കരാറിനും തങ്ങള് അംഗീകാരം നല്കിയിട്ടില്ലെന്ന് ഇറാന്റെ ഔദ്യോഗിക വാര്ത്താ ഏജന്സിയായ ഫാര്സ് വ്യക്തമാക്കിയപ്പോള്, അങ്ങനെ ഒരു കരാറിനെക്കുറിച്ച് തങ്ങള്ക്ക് അറിവേയില്ലെന്നായിരുന്നു ഇസ്രായേലിന്റെ മറുപടി. ട്രംപിന്റെ പ്രഖ്യാപനം അന്താരാഷ്ട്ര തലത്തില് കടുത്ത ചര്ച്ചകള്ക്ക് വഴിവെച്ചതിന് പിന്നാലെയാണ് ഇരുരാജ്യങ്ങളും അമേരിക്കയെ പരസ്യമായി നാണംകെടുത്തിയത്. ഇതോടെ പശ്ചിമേഷ്യയിലെ യുദ്ധഭീതി ഒഴിഞ്ഞിട്ടില്ലെന്ന് മാത്രമല്ല, വരും ദിവസങ്ങളില് സ്ഥിതിഗതികള് കൂടുതല് സങ്കീര്ണ്ണമാകുമെന്നും ഉറപ്പായി.
ഇറാനെ തകര്ക്കാന് ലക്ഷ്യമിട്ട് വന് ബോംബാക്രമണത്തിന് ഉത്തരവിട്ടതിന് തൊട്ടുപിന്നാലെയാണ് ട്രംപ് തന്റെ സോഷ്യല് മീഡിയ പ്ലാറ്റ്ഫോമായ ‘ട്രൂത്ത് സോഷ്യല്’ വഴി നാടകീയമായ മലക്കംമറച്ചില് നടത്തിയത്. ഇറാന്റെ പരമോന്നത നേതൃത്വവുമായി നടത്തിയ ചര്ച്ചകള് വിജയകരമാണെന്നും സൗദി അറേബ്യ, യു.എ.ഇ, ഖത്തര്, തുര്ക്കി, പാകിസ്ഥാന്, ഈജിപ്ത് തുടങ്ങിയ രാജ്യങ്ങള് കരാറിന് പച്ചക്കൊടി കാട്ടിയെന്നുമായിരുന്നു ട്രംപിന്റെ വാദം. കരാര് ഒപ്പിടുന്നതിനുള്ള സമയവും സ്ഥലവും ഉടന് പ്രഖ്യാപിക്കുമെന്നും അതുവരെ ഇറാനെതിരെയുള്ള നാവിക ഉപരോധം തുടരുമെന്നും ട്രംപ് വ്യക്തമാക്കിയിരുന്നു.
കരാര് പ്രഖ്യാപിക്കുന്നതിന് തൊട്ടുമുന്പ് ഇറാന്റെ ജീവരക്തമായ ഖാര്ഗ് ദ്വീപ് എണ്ണശേഖരം പിടിച്ചെടുക്കുമെന്നും ഇറാനെ തരിപ്പണമാക്കുമെന്നുമായിരുന്നു ട്രംപിന്റെ ഭീഷണി. ഇറാന്റെ നാവിക-വ്യോമ പ്രതിരോധ സംവിധാനങ്ങളെല്ലാം തകര്ത്തതായും വെനസ്വേലയിലെ എണ്ണവിപണി പിടിച്ചെടുത്തതുപോലെ ഖാര്ഗ് ദ്വീപിന്റെ പൂര്ണ്ണ നിയന്ത്രണം അമേരിക്ക ഏറ്റെടുക്കുമെന്നും ട്രംപ് വെല്ലുവിളിച്ചിരുന്നു. ഇറാന്റെ അസംസ്കൃത എണ്ണ കയറ്റുമതിയുടെ 90 ശതമാനവും കൈകാര്യം ചെയ്യുന്ന അതീവ സുരക്ഷാ മേഖലയായ ഖാര്ഗ് പിടിച്ചെടുക്കാന് ആയിരക്കണക്കിന് അമേരിക്കന് സൈനികര് ബൂട്ടിടേണ്ടി വരുമെന്നിരിക്കെയാണ് ട്രംപിന്റെ ഈ തീയുണ്ട പ്രസ്താവനകള് വന്നത്.
കഴിഞ്ഞ ഏപ്രിലില് പ്രഖ്യാപിച്ച വെടിനിര്ത്തലിന് ശേഷം മാസങ്ങളായി തുടരുന്ന പ്രതിസന്ധിക്ക് അറുതി വരുത്താന് ഇറാനെ നിര്ബന്ധിതരാക്കുക എന്ന തന്ത്രമാണ് ട്രംപ് പയറ്റുന്നത്. ഇറാന് തങ്ങളെ വിഡ്ഢികളാക്കുകയാണെന്നും ആണവബോംബ് നിര്മ്മിക്കാന് അവരെ അനുവദിക്കില്ലെന്നുമുള്ള കടുത്ത നിലപാടിലാണ് വാഷിംഗ്ടണ്. യുറേനിയം സമ്പുഷ്ടീകരണം കുറഞ്ഞത് 20 വര്ഷത്തേക്ക് ഇറാന് നിര്ത്തിവെക്കണമെന്നാണ് ട്രംപിന്റെ ആവശ്യം. എന്നാല് 15 വര്ഷത്തെ നിയന്ത്രണത്തിന് ഇറാന് തയ്യാറായേക്കുമെന്നാണ് അമേരിക്കന് ഉദ്യോഗസ്ഥരുടെ വിലയിരുത്തല്.
ആണവ നിലയങ്ങള് പൂര്ണ്ണമായി അടച്ചുപൂട്ടുന്നതിലും മരവിപ്പിച്ച കോടിക്കണക്കിന് ഡോളറിന്റെ ആസ്തികള് തിരികെ നല്കുന്നതിലും ഇരുരാജ്യങ്ങളും തമ്മില് കടുത്ത തര്ക്കം നിലനില്ക്കുന്നുണ്ട്. കരാര് നടപ്പാക്കുന്നതിനനുസരിച്ച് മാത്രമേ പണം ഘട്ടംഘട്ടമായി നല്കൂ എന്ന് അമേരിക്ക വാശിപിടിക്കുമ്പോള്, തങ്ങളുടെ ഫണ്ട് മുന്കൂറായി റിലീസ് ചെയ്യണമെന്നാണ് ഇറാന്റെ ആവശ്യം. ഇതിനിടയിലാണ് ചര്ച്ചകള് വഴിമുട്ടിയതും ഒടുവില് യുദ്ധപ്രഖ്യാപനത്തിലേക്ക് കാര്യങ്ങള് നീങ്ങിയതും.
അമേരിക്കന് സൈനിക ഹെലികോപ്റ്റര് ഇറാന് വെടിവെച്ചിട്ടതിനെത്തുടര്ന്ന് മേഖലയില് യു.എസ് സൈന്യം കനത്ത ബോംബാക്രമണം നടത്തിയിരുന്നു. ഇറാന്റെ റഡാര്, കമ്മ്യൂണിക്കേഷന് കേന്ദ്രങ്ങള് തകര്ത്തതായി യു.എസ് സെന്ട്രല് കമാന്ഡ് അറിയിച്ചപ്പോള്, ജോര്ദാനിലെ അമേരിക്കന് സൈനിക താവളത്തിന് നേരെ ഇറാന് തിരിച്ചടിയും നല്കി. ഇറാന് തൊടുത്തുവിട്ട 20 മിസൈലുകള് ജോര്ദാന് വെടിവെച്ചിട്ടപ്പോള്, കുവൈറ്റും ബഹ്റൈനും ഇറാന്റെ വ്യോമാക്രമണത്തിനെതിരെ ശക്തമായി രംഗത്തുവന്നു.
അതേസമയം, ഗള്ഫ് മേഖലയിലെ യുദ്ധം ആഗോള സമ്പദ്വ്യവസ്ഥയെയും എണ്ണവിപണിയെയും തകിടം മറിക്കുമെന്ന ആശങ്കയില് ചൈനയും റഷ്യയും തുര്ക്കിയും രംഗത്തെത്തിയിട്ടുണ്ട്. സൈനിക നീക്കങ്ങള് ഉടനടി അവസാനിപ്പിച്ച് ഇരുവിഭാഗവും സമാധാന ചര്ച്ചകളിലേക്ക് മടങ്ങണമെന്നാണ് ചൈനയുടെ ആവശ്യം. ലോകത്തെ പ്രധാന എണ്ണക്കടത്തു പാതയായ ഹോര്മുസ് കടലിടുക്ക് അടച്ചിടുമെന്ന ഇറാന്റെ മുന്നറിയിപ്പ് അന്താരാഷ്ട്ര വിപണിയില് വലിയ പരിഭ്രാന്തിയാണ് ഉണ്ടാക്കിയിരിക്കുന്നത്.
സംഘര്ഷത്തിനിടയിലും ഖത്തറിന്റെയും പാകിസ്ഥാന്റെയും നേതൃത്വത്തില് അണിയറയില് സമാധാന ചര്ച്ചകള് നടക്കുന്നുണ്ടെന്നാണ് സൂചന. ഖത്തര് പ്രതിനിധി സംഘം ടെഹ്റാനിലെത്തി പുലര്ച്ചെ വരെ ചര്ച്ചകള് നടത്തിയിരുന്നു. എന്നാല് അമേരിക്ക ബോംബുകള് കൊണ്ടാണ് ചര്ച്ച നടത്തുന്നതെന്ന പെന്റഗണ് മേധാവി പീറ്റ് ഹെഗ്സെത്തിന്റെ പ്രസ്താവന ചര്ച്ചകളുടെ അന്തരീക്ഷം വഷളാക്കി. അമേരിക്കയുടെ ആക്രമണങ്ങള് വെടിനിര്ത്തല് കരാറിനെ അര്ത്ഥശൂന്യമാക്കിയെന്നാണ് ഇറാന്റെ നിലപാട്.
അമേരിക്കന് നാവികസേന ഒമാന് തീരത്ത് വാണിജ്യക്കപ്പലിന് നേരെ നടത്തിയ ആക്രമണത്തില് മൂന്ന് ഇന്ത്യന് നാവികര് കൊല്ലപ്പെട്ടത് ഇന്ത്യയെയും പ്രകോപിപ്പിച്ചിട്ടുണ്ട്. സംഭവത്തില് ന്യൂഡല്ഹി അമേരിക്കന് നയതന്ത്രജ്ഞനെ വിളിച്ചുവരുത്തി ശക്തമായ പ്രതിഷേധം അറിയിച്ചുകഴിഞ്ഞു. ട്രംപിന്റെ സമാധാന പ്രഖ്യാപനം പാളിയതോടെ, വരും ദിവസങ്ങളില് പശ്ചിമേഷ്യ വീണ്ടുമൊരു ചോരപ്പുഴയ്ക്ക് സാക്ഷ്യം വഹിക്കുമോ എന്ന ഭീതിയിലാണ് ലോകരാജ്യങ്ങള്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ഇറാന് യുദ്ധത്തെച്ചൊല്ലി ഉടക്കി ട്രംപ്; ബ്രിട്ടനുമായുള്ള വ്യാപാര കരാര് തരംതാഴ്ത്തുമെന്ന് ഭീഷണി; സ്റ്റാര്മറെ ‘തോല്വി’യെന്ന് വിളിച്ച് അമേരിക്കന് പ്രസിഡന്റ്
