ചെന്നൈ: തമിഴ്നാട് നിയമസഭാ തിരഞ്ഞെടുപ്പിന് മുന്നോടിയായുള്ള എക്സിറ്റ് പോള് ഫലങ്ങള് പുറത്തുവന്നതോടെ സംസ്ഥാനത്ത് ‘വിജയ് ഇഫക്ട്’ ശക്തമാകുന്നു. നടന് വിജയ്യുടെ രാഷ്ട്രീയ പ്രവേശനവും തമിഴക വെട്രി കഴകത്തിന്റെ സ്വാധീനവും പരമ്പരാഗത രാഷ്ട്രീയ പാര്ട്ടികളുടെ ഉറക്കം കെടുത്തുന്ന രീതിയിലാണ് വളരുന്നത്.
ദേശീയ ചലച്ചിത്ര വികസന കോർപ്പറേഷൻ ചെയർമാനായി നടൻ കൃഷ്ണകുമാറിനെ നിയമിച്ചു; മൂന്ന് വർഷത്തേക്കാണ് നിയമനം
വിജയ്യുടെ രാഷ്ട്രീയ നീക്കങ്ങളെ നിസ്സാരമായി കണ്ടിരുന്ന ദ്രാവിഡ പാര്ട്ടികള് ഇപ്പോള് കടുത്ത ആശങ്കയിലാണ്. എക്സിറ്റ് പോളുകള് നല്കുന്ന സൂചനകള് പ്രകാരം യുവാക്കളുടെയും സ്ത്രീകളുടെയും വോട്ടുകള് വന്തോതില് വിജയ് പക്ഷത്തേക്ക് മറിയാന് സാധ്യതയുണ്ട്. തിരഞ്ഞെടുപ്പ് ഗോദയില് വിജയ് ഒരു നിര്ണ്ണായക ശക്തിയായി മാറുമെന്ന് എം.ഡി.എം.കെ നേതാവ് വൈക്കോ പോലും സമ്മതിക്കുന്നു. രാഷ്ട്രീയ അനുഭവസമ്പത്തുള്ള നേതാക്കള് പോലും വിജയ് ഉയര്ത്തുന്ന വെല്ലുവിളിയെ ഗൗരവത്തോടെയാണ് കാണുന്നത്.
ഭരണകക്ഷിയായ ഡി.എം.കെ ക്യാമ്പില് നിലവില് വലിയ അസ്വസ്ഥതകളാണ് പുകയുന്നത്. സ്റ്റാലിന്റെ നേതൃത്വത്തിലുള്ള സര്ക്കാരിനെതിരെ ജനവികാരം വിജയ് അനുകൂല തരംഗമായി മാറുമോ എന്ന ഭയം അണികള്ക്കിടയിലുണ്ട്. കോണ്ഗ്രസ് ആകട്ടെ, വിജയ്യോട് മൃദുസമീപനം സ്വീകരിക്കുന്ന കാഴ്ചയാണ് കാണുന്നത്. ഭാവിയില് ഒരു സഖ്യത്തിനുള്ള സാധ്യത മുന്നില്ക്കണ്ട് വിജയ്യെ പിണക്കാതിരിക്കാനാണ് ദേശീയ പാര്ട്ടിയുടെ ശ്രമം.
ടെന്നീസ് ഇതിഹാസം ലിയാണ്ടർ പേസ് ബിജെപിയിൽ ചേർന്നു; രാഷ്ട്രീയത്തിൽ പുതിയ ഇന്നിംഗ്സ്
ബിജെപിയും തമിഴ്നാട്ടില് വലിയ പ്രതീക്ഷയിലാണ്. ഡി.എം.കെ വിരുദ്ധ വോട്ടുകള് ഭിന്നിക്കുന്നത് തങ്ങള്ക്ക് അനുകൂലമാകുമെന്നും വിജയ് തരംഗം ദ്രാവിഡ പാര്ട്ടികളുടെ അടിത്തറ ഇളക്കുമെന്നും അവര് കണക്കുകൂട്ടുന്നു. അതേസമയം, എ.ഡി.എം.കെ തിരിച്ചുവരുമെന്ന് പ്രവചിക്കുന്ന സര്വ്വേ ഫലങ്ങളും നിലവിലുണ്ട്. എന്നാല് അവിടെയും വിജയ് പിടിക്കുന്ന വോട്ടുകള് ആരുടെ വിജയത്തെ ബാധിക്കുമെന്നതാണ് പ്രധാന ചര്ച്ചാവിഷയം.
വിധി നിര്ണ്ണയിക്കുന്ന കിംഗ് മേക്കറായോ അതോ നേരിട്ട് ഭരണത്തിലേറുന്ന കിംഗായോ വിജയ് മാറുമോ എന്നതാണ് തമിഴകം ഉറ്റുനോക്കുന്നത്. സിനിമാ താരങ്ങളെ മുഖ്യമന്ത്രിമാരാക്കി ശീലിച്ച തമിഴ് മണ്ണില് മറ്റൊരു സിനിമാ മുഖ്യമന്ത്രി കൂടി വരുമോ എന്ന ചോദ്യം പ്രസക്തമാണ്. വിജയ്യുടെ ജനപ്രീതി രാഷ്ട്രീയ വോട്ടുകളായി മാറുന്നു എന്നതിന്റെ തെളിവാണ് അദ്ദേഹം പോകുന്നിടത്തെല്ലാം തടിച്ചുകൂടുന്ന വന് ജനക്കൂട്ടം. വേളാങ്കണ്ണിയില് വിജയ് എത്തുമെന്ന വാര്ത്തയെത്തുടര്ന്ന് ഉണ്ടായ തിരക്ക് ഇതിന്റെ ഒടുവിലത്തെ ഉദാഹരണമാണ്.
വേളാങ്കണ്ണി സെന്റ് മേരീസ് ബസിലിക്കയില് വിജയ് എത്തുമെന്ന് അറിഞ്ഞ് ആയിരക്കണക്കിന് ആരാധകരും പ്രവര്ത്തകരുമാണ് പുലര്ച്ചെ മുതല് തടിച്ചുകൂടിയത്. ഇത് പ്രദേശത്ത് വലിയ ഗതാഗത തടസ്സത്തിന് കാരണമായി. സുരക്ഷാ കാരണങ്ങളാലും മറ്റും അവസാന നിമിഷം വിജയ് സന്ദര്ശനം റദ്ദാക്കിയത് ആരാധകരെ നിരാശരാക്കി. പ്രിയ താരത്തെ കാണാന് കഴിയാത്തതിലുള്ള അമര്ഷം ചില പ്രവര്ത്തകര് പള്ളിക്കുള്ളില് പ്രകടമാക്കി.
പള്ളിക്കുള്ളില് കയറി മുദ്രാവാക്യം വിളിച്ച ടി.വി.കെ പ്രവര്ത്തകരുടെ നടപടി വിവാദങ്ങള്ക്ക് വഴിവെച്ചിട്ടുണ്ട്. അള്ത്താരയ്ക്ക് മുന്നില് നിന്നുള്ള മുദ്രാവാക്യം വിളി വിശ്വാസികള്ക്കിടയില് പ്രതിഷേധത്തിന് കാരണമായി. പ്രവര്ത്തകരുടെ തിരക്ക് കാരണം പള്ളിയില് രാവിലെ നടക്കേണ്ടിയിരുന്ന വിശുദ്ധ കുര്ബാന മുപ്പത് മിനിറ്റോളം വൈകി. ആത്മീയ കേന്ദ്രങ്ങളില് രാഷ്ട്രീയ അതിപ്രസരം പാടില്ലെന്ന വിമര്ശനം ഇതിനോടകം ഉയര്ന്നു കഴിഞ്ഞു.
പള്ളിക്കുള്ളില് മൊബൈല് ഫോണിനും ഫോട്ടോഗ്രാഫിക്കും നിരോധനം ഏര്പ്പെടുത്തിയിരുന്നെങ്കിലും, ആവേശം മൂത്ത പ്രവര്ത്തകര് ഇതൊന്നും വകവെക്കാതെ ചിത്രങ്ങള് പകര്ത്തുകയും ലൈവ് സ്ട്രീം ചെയ്യുകയും ചെയ്തു. സിനിമയില് നിന്ന് രാഷ്ട്രീയത്തിലേക്ക് എത്തിയ എം.ജി.ആറിനും ജയലളിതയ്ക്കും ലഭിച്ച അതേ സ്വീകാര്യത വിജയ്ലേക്ക് എത്തുമ്പോള്, തമിഴ് രാഷ്ട്രീയത്തിന്റെ ഭാവി വരും ദിവസങ്ങളില് കൂടുതല് വ്യക്തമാകും. ഭരണത്തുടര്ച്ച ആഗ്രഹിക്കുന്നവര്ക്കും അധികാരം പിടിക്കാന് ശ്രമിക്കുന്നവര്ക്കും ഇടയില് വിജയ് എന്ന ഘടകം വലിയൊരു സമസ്യയായി തുടരുന്നു.
