ബെംഗളൂരു: ആത്മവിശ്വാസത്തിന്റെ ആള്രൂപമെന്ന് വിശേഷിപ്പിക്കപ്പെട്ട കോണ്ഫിഡന്റ് ഗ്രൂപ്പ് ഉടമ ഡോ. സി.ജെ. റോയിയുടെ (57) മരണം ബിസിനസ് ലോകത്തെ ഞെട്ടിക്കുമ്പോള് പുറത്തുവരുന്നത് സിനിമയെ വെല്ലുന്ന ദുരൂഹതകള്. ആദായനികുതി വകുപ്പ് ഉദ്യോഗസ്ഥരുടെ റെയ്ഡ് മുറുകുന്നതിനിടെ, ‘അമ്മയെ ഒന്ന് ഫോണ് വിളിക്കണം’ എന്ന് പറഞ്ഞ് തന്റെ സ്വകാര്യ മുറിയിലേക്ക് കയറിയ റോയ്, മിനിറ്റുകള്ക്കകം ജീവനൊടുക്കുകയായിരുന്നു. എന്നാല് സാധാരണ ആത്മഹത്യകളില് കാണാത്ത ചില ‘അസ്വാഭാവികതകള്’ ഈ മരണത്തിലുണ്ടെന്ന് അന്വേഷണ സംഘം സംശയിക്കുന്നു.
ശബ്ദം പുറത്തുവരാത്ത സൈലന്സര് തോക്ക്! ഏറ്റവും ഞെട്ടിക്കുന്ന വിവരം റോയ് വെടിയുതിര്ത്തത് സൈലന്സര് ഘടിപ്പിച്ച തോക്കുപയോഗിച്ചാണ് എന്നതാണ്. റെയ്ഡിന് എത്തിയ ഉദ്യോഗസ്ഥരോ പുറത്തുണ്ടായിരുന്ന ജീവനക്കാരോ വെടിയൊച്ച കേട്ടില്ല. തോക്കിന്റെ ശബ്ദം പുറത്തുവരാതിരിക്കാന് റോയ് മുന്കൂട്ടി നിശ്ചയിച്ചതുപോലെ സൈലന്സര് ഉപയോഗിച്ചത് എന്തിനായിരുന്നു? 15 മിനിറ്റോളം കഴിഞ്ഞാണ് രക്തത്തില് കുളിച്ചു കിടക്കുന്ന റോയിയെ മറ്റുള്ളവര് കാണുന്നത്. അതീവ സുരക്ഷയുള്ള ഓഫീസിലെ സിസിടിവി ക്യാമറകള് കൃത്യസമയത്ത് പ്രവര്ത്തനരഹിതമായതും നിഗൂഢത വര്ദ്ധിപ്പിക്കുന്നു.
സിഐഡി രംഗത്തിറങ്ങുന്നു തന്റെ മരണത്തിന് ഉത്തരവാദി ആദായനികുതി വകുപ്പ് അഡീഷണല് കമ്മീഷണര് കൃഷ്ണപ്രസാദ് ആണെന്ന് കുടുംബം ആരോപിച്ചു. അഞ്ച് പേജുള്ള പരാതിയാണ് കുടുംബം പോലീസിന് നല്കിയത്. റോയ് മരിച്ചു കിടക്കുമ്പോഴും ഉദ്യോഗസ്ഥര് റെയ്ഡ് തുടര്ന്നു എന്ന ആരോപണം ബിസിനസ് ലോകത്ത് വലിയ പ്രതിഷേധത്തിന് കാരണമായിട്ടുണ്ട്. കേസിലെ ഗൗരവം കണക്കിലെടുത്ത് കര്ണാടക സര്ക്കാര് അന്വേഷണം സിഐഡിക്ക് കൈമാറി. റിയല് എസ്റ്റേറ്റ് മേഖലയിലെ വമ്പന് സ്രാവുകളുമായുള്ള റോയിയുടെ ബന്ധവും ഇതിന് പിന്നിലുണ്ടോ എന്ന് സിഐഡി പരിശോധിക്കും.
വായ്പകളില്ലാതെ ബിസിനസ് പടുത്തുയര്ത്താന് റോയിയെ സഹായിച്ച പ്രമുഖരുടെ നിക്ഷേപങ്ങളാണ് ഇപ്പോള് തുലാസിലായിരിക്കുന്നത്. കേരളത്തിലെ സിനിമാ-രാഷ്ട്രീയ പ്രമുഖര് റോയിയുമായി നടത്തിയ രഹസ്യ ഇടപാടുകള് ഐടി വകുപ്പ് പിടിച്ചെടുത്ത രേഖകളിലുണ്ടെന്നാണ് സൂചന. ഈ പണം തിരികെ കിട്ടില്ലെന്ന ഭയം പല ഉന്നതരെയും അങ്കലാപ്പിലാക്കിയിട്ടുണ്ട്.
ആത്മവിശ്വാസത്തിന്റെ പേരില് സാമ്രാജ്യം പണിത റോയ്, എന്തിന് ഒരു സൈലന്റ് വെടിയൊച്ചയില് ജീവിതം അവസാനിപ്പിച്ചു? ഉത്തരം കിട്ടാത്ത ഈ ചോദ്യങ്ങള്ക്കിടയില് സി.ജെ. റോയ് എന്ന ബിസിനസ് ഇതിഹാസം വിടവാങ്ങുമ്പോള് അനാഥമാകുന്നത് കോടിക്കണക്കിന് രൂപയുടെ നിക്ഷേപങ്ങളാണ്.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
മണിയന്പിള്ള രാജുവും മ്യൂസിയം പോലീസും; ചോര വാര്ന്ന യുവാക്കള്, ഒളിച്ചുകളിച്ച പോലീസ്
