ശാസ്താംകോട്ട (കൊല്ലം): കടബാധ്യതകളും ജപ്തി ഭീഷണിയും വേട്ടയാടിയ ഒരു നിര്ധന കുടുംബത്തിന്റെ കണ്ണീരൊപ്പാന് ഒടുവില് ഭാഗ്യദേവത നേരിട്ടെത്തി. മറ്റുള്ളവര്ക്ക് കോടികളുടെ ഭാഗ്യം വില്ക്കാന് തെരുവോരങ്ങളില് കിലോമീറ്ററുകള് നടന്നു തീര്ത്ത ആ കുടുംബത്തിലേക്ക് ഇത്തവണത്തെ വിഷു ബമ്പറിന്റെ 12 കോടി രൂപയുടെ ഒന്നാം സമ്മാനം എത്തുമ്പോള് അത് അര്ഹതയ്ക്കുള്ള അംഗീകാരമായി മാറുകയാണ്. കൊല്ലം ശൂരനാട് ആനയടി വയലില് കോളനി വിനോദ് ഭവനത്തില് പൊന്നന് (72) എന്ന പെയിന്റിങ് തൊഴിലാളിയും ലോട്ടറി വില്പ്പനക്കാരനുമാണ് ഇത്തവണത്തെ വിഷു ബമ്പര് ജേതാവ്. ലോട്ടറിക്കടയുടെ വരാന്തയിലെ ക്ലിപ്പില് പ്ലാസ്റ്റിക് കവറില് തൂങ്ങിക്കിടന്ന ആ അവസാന ടിക്കറ്റാണ് ഈ വൃദ്ധന്റെയും കുടുംബത്തിന്റെയും ജീവിതം മാറ്റിമറിച്ചത്.
പ്രായത്തിന്റെ അവശതകള് അലട്ടുന്നതിനാല് പൊന്നന് ഈ അടുത്ത കാലത്തായി വല്ലപ്പോഴുമേ ലോട്ടറി വില്പ്പനയ്ക്ക് പോകാറുണ്ടായിരുന്നുള്ളൂ. എന്നാല് മകന് വിനോദ് കുമാറിന് കടുത്ത പനി ബാധിച്ച ഒരു ദിവസം, വില്പ്പനയ്ക്കുള്ള ടിക്കറ്റുകള് എടുക്കാനായി പൊന്നന് കരുനാഗപ്പള്ളി മണപ്പള്ളിയിലെ ‘അമ്മ’ ലോട്ടറി ഏജന്സിയില് എത്തി. അതാണ് ഈ കുടുംബത്തിന്റെ ചരിത്രം തിരുത്തിക്കുറിച്ച നിയോഗമായത്.
വില്ക്കാനുള്ള സാധാരണ ടിക്കറ്റുകള് എടുത്തു കഴിഞ്ഞ ശേഷമാണ് കടയുടെ മുന്നിലെ ക്ലിപ്പില് പ്ലാസ്റ്റിക് കവറില് തൂക്കിയിട്ടിരുന്ന ഏക വിഷു ബമ്പര് ടിക്കറ്റ് പൊന്നന്റെ ശ്രദ്ധയില്പ്പെട്ടത്. വി.ബി. 135452 എന്ന ആ ടിക്കറ്റിന്റെ നമ്പര് കണ്ട് ഇഷ്ടപ്പെട്ട പൊന്നന്, തന്റെ കൈയിലുണ്ടായിരുന്ന തുക കൊടുത്ത് അത് സ്വന്തമാക്കുകയായിരുന്നു. ഒരു മാസത്തോളം ആ കൊച്ചുവീട്ടില് ഭദ്രമായിരുന്ന ആ ടിക്കറ്റാണ് ഇപ്പോള് 12 കോടിയുടെ മഹാഭാഗ്യമായി മാറിയത്.
മറ്റുള്ളവര്ക്ക് ഭാഗ്യം വില്ക്കുന്നവരാണെങ്കിലും കടുത്ത ദാരിദ്ര്യത്തിലും കടബാധ്യതയിലുമായിരുന്നു പൊന്നന്റെ കുടുംബം ജീവിച്ചിരുന്നത്. ബാങ്കില് നിന്നും വായ്പയെടുത്ത് തിരിച്ചടവ് മുടങ്ങിയതോടെ ഇവര് താമസിക്കുന്ന വീട് ജപ്തി നടപടികളിലേക്ക് നീങ്ങിയിരുന്നു. അന്ന് പലരില് നിന്നായി കൈവായ്പ വാങ്ങിയും കടം കൊണ്ടുമാണ് ബാങ്കിലെ കടം തീര്ത്ത് ഇവര് വീട് നിലനിര്ത്തിയത്. ആ കടങ്ങളെല്ലാം എങ്ങനെ വീട്ടുമെന്ന ആശങ്കയിലായിരുന്നു ഈ കുടുംബം.
കോവിഡ് കാലത്താണ് ജീവിതമാര്ഗ്ഗം പൂര്ണ്ണമായി അടഞ്ഞതോടെ ഈ കുടുംബം ലോട്ടറി വില്പ്പനയിലേക്ക് തിരിഞ്ഞത്. പൊന്നന്റെ ഭാര്യ രാധാമണിയമ്മ (65) വീടിന് സമീപം ഒരു ചെറിയ തട്ടിട്ടാണ് ലോട്ടറി കച്ചവടം നടത്തുന്നത്. മകന് വിനോദ്കുമാര് (39) ആകട്ടെ കിലോമീറ്ററുകളോളം കാല്നടയായി സഞ്ചരിച്ചാണ് ടിക്കറ്റുകള് വിറ്റിരുന്നത്. സംസ്ഥാന ചരിത്രത്തില് തന്നെ ഏറ്റവും കൂടുതല് ടിക്കറ്റുകള് വിറ്റഴിഞ്ഞ റെക്കോര്ഡ് വിഷു ബമ്പറാണ് ഇത്തവണത്തേത്. അച്ചടിച്ച 45 ലക്ഷം ടിക്കറ്റുകളും വിറ്റഴിഞ്ഞ ചരിത്ര വരാന്തയില് നിന്നാണ് ഭാഗ്യദേവത ശൂരനാട്ടുകാരനായ പൊന്നനെ തിരഞ്ഞെടുത്തത്. കൊല്ലം ജില്ലയിലെ കരുനാഗപ്പള്ളി സബ് ഓഫീസ് ഏജന്റായ ഡി. അനിലാണ് ഈ ഭാഗ്യ ടിക്കറ്റ് വിറ്റത്.
കോടികള് വന്നാലും ആഗ്രഹങ്ങള് ചെറുത്: തലവര മാറിയെങ്കിലും പൊന്നനും കുടുംബത്തിനും വലിയ ആകാശക്കോട്ടകളൊന്നുമില്ല. ‘മകന് വിനോദിന്റെ കല്യാണം എത്രയും വേഗം നടത്തണം. തകര്ന്നു വീഴാറായ കൊച്ചുവീട് ഒന്നു അറ്റകുറ്റപ്പണി ചെയ്യണം. മഴ പെയ്താല് വെള്ളം കെട്ടിനില്ക്കുന്ന പറമ്പില് കുറച്ചു മണ്ണടിച്ചു നികത്തണം. പിന്നെ ഞങ്ങളെ സഹായിച്ചവരുടെ കടങ്ങളെല്ലാം വീട്ടി ബാക്കി തുക ബാങ്കിലിട്ട് സമാധാനത്തോടെ ജീവിക്കണം,’ നിറഞ്ഞ കണ്ണുകളോടെ പൊന്നന് പറഞ്ഞു നിര്ത്തി.
Disclaimer:
The images displayed on this website are taken from external platforms including Google Images and social media networks (Instagram, Facebook, X, etc.) and other public sources on the internet.
ക്രിസ്മസിന് അടിച്ചുപൂസായി മലയാളി ; ബെവ്കോയ്ക്ക് റെക്കോര്ഡ് മദ്യവില്പ്പന
